આરોગ્ય / શું ગરમીની સિઝનમાં તમે પણ પીવો છો અતિશય કોલ્ડ વૉટર, તો પહેલા જાણી લેજો તેના સાઇડ ઇફેક્ટ્સ

ઉનાળામાં તડકો અને કાળઝાળ ગરમીથી બચવા માટે લોકો ઠંડી વસ્તુઓ ખાવા-પીવાનું પસંદ કરે છે. ખાસ કરીને આ સિઝનમાં લોકો વધારે પડતું ઠંડુ પાણી પીવે છે. આપણામાંના ઘણાને આદત હોય છે કે આકરી ગરમીમાંથી ઘરે આવીને તરત જ ફ્રિજમાંથી બોટલ કાઢીને પાણી પી લઈએ છીએ. ઠંડુ પાણી પીવાથી ત્વરિત થોડીક રાહત મળે છે અને ગરમી દૂર થાય છે, પરંતુ ઠંડા પાણીથી મળતી રાહત માત્ર થોડી ક્ષણો માટે જ હોય ​​છે. તમને થોડી અસ્થાયી રાહત આપતું ઠંડુ પાણી તમારા સ્વાસ્થ્ય માટે ઘણું નુકસાનકારક હોય છે.

બહુ ઓછા લોકો જાણતા હશે કે બરફનું પાણી અથવા ઠંડુ પાણી પીવાથી સ્વાસ્થ્યને ગંભીર નુકસાન થાય છે. તેનાથી તમારું વજન તો વધી જ શકે છે સાથે સાથે તમારા હૃદયને પણ નુકસાન થાય છે. જો તમે એવા લોકોમાંથી એક છો, જેઓ ગરમીથી રાહત મેળવવા વારંવાર ઠંડુ પાણી પીવે છે, તો ચાલો જાણીએ તેનાથી થતા કેટલાક ગંભીર ગેરફાયદા-

પાચનની સમસ્યાઓ - 

ઠંડુ પાણી તમારા પાચનતંત્રને ઝડપથી અસર કરે છે. ઠંડુ પાણી નિયમિત પીવાથી ખોરાક પચવામાં મુશ્કેલી પડે છે અને પેટમાં દુખાવો, ઉબકા, કબજિયાત અને પેટ ફૂલવું જેવી સમસ્યાઓ પણ થઈ શકે છે. આવું એટલા માટે થાય છે કારણ કે જ્યારે આપણે ઠંડુ પાણી પીએ છીએ ત્યારે તે શરીરના તાપમાન સાથે મેળ ખાતું નથી અને શરીરમાં પહોંચ્યા પછી પેટમાં રહેલા ખોરાકને પચાવવામાં મુશ્કેલી પડે છે.

માથાનો દુખાવો અને સાઇનસ - 

જો તમે વારંવાર જરૂર કરતાં વધુ ઠંડા પીણાં પીતા હોવ તો તેનાથી 'બ્રેઈન ફ્રીઝ'ની સમસ્યા પણ થઈ શકે છે. એટલું જ નહીં, આ બરફનું પાણી પીવાથી અથવા વધુ પડતો આઈસ્ક્રીમ ખાવાથી પણ થાય છે. વાસ્તવમાં, ઠંડુ પાણી કરોડરજ્જુની સંવેદનશીલ ચેતાને ઠંડુ કરે છે, જે મગજને અસર કરે છે. તેનાથી માથાનો દુખાવો અને સાઇનસની સમસ્યા થઈ શકે છે.

હૃદયના ધબકારા ધીમા થઈ જાય છે -

આપણા શરીરમાં એક વેગસ નર્વ હોય છે, જે ગરદન દ્વારા હૃદય, ફેફસાં અને પાચનતંત્રને નિયંત્રિત કરે છે. જો તમે વધુ પડતું ઠંડું પાણી પીઓ છો, તો તે તમારા જ્ઞાનતંતુઓને ઝડપથી ઠંડું કરે છે અને હૃદયના ધબકારા અને પલ્સ રેટને ધીમો પાડે છે, જેનાથી સ્વાસ્થ્ય સંબંધિત સમસ્યાઓ વધી શકે છે.

વજન વધવું - 

જો તમારે વજન ઓછું કરવું હોય તો ભૂલથી પણ ઠંડુ પાણી ન પીવો. વાસ્તવમાં, ઠંડુ પાણી પીવાથી તમારા શરીરમાં સંગ્રહિત ચરબી સખત થઈ જાય છે, જેના કારણે ચરબી બર્ન કરવી મુશ્કેલ બની જાય છે. આવી સ્થિતિમાં, જો તમે વજન ઘટાડવાનું વિચારી રહ્યાં છો, તો ઠંડા પાણીથી દૂર રહો.

વધુ વાંચો: જો તમને પણ વારંવાર દાળ-શાકમાં છે ખાંડ નાખવાની આદત, તો આ વીડિયો એકવાર જરૂરથી જોજો

ગળામાં ઈંફેક્શન થાય છે - 

વધુ પડતું ઠંડુ પાણી પીવાથી ગળામાં દુખાવો અને કંજેશન થવાની શક્યતા વધી જાય છે. ઠંડુ પાણી પીવાથી, ખાસ કરીને ખાધા પછી, વધારાની લાળ ઉત્પન્ન થાય છે, જે શ્વસન માર્ગમાં જમા થઈ જાય છે અને સોજો આવે છે અને ઈંફેક્શનનું કારણ બને છે. તેથી શક્ય હોય ત્યાં સુધી ઠંડુ પાણી પીવાનું ટાળો.

VTV Gujarati Newsની તમામ અપડેટ સૌથી પહેલા મેળ​વ​વા માટે અમારી WhatsApp ચેનલ ફોલો કરો