Surat Rain Video / સુરતમાં બારે મેઘ ખાંગા જેવી સ્થિતિ, 24 કલાકમાં 9 લોકોએ જીવ ગુમાવ્યા, કાલે પણ સ્થિતિ વણસી શકે

Surat Rain News: સુરતમાં મૂશળધાર વરસાદને પગલે શહેરના અનેક માર્ગો પાણીમાં ગરકાવ થયા છે. જેને લઇ જનજીવનને અસર થઇ છે. બે દિવસમાં 12 ઇંચ વરસાદથી આખું સુરત શહેર પાણીમાં ગરકાવ થઇ ગયું છે. 9 લોકોએ જીવ ગુમાવ્યા છે. જેમાં કરંટ લાગવાથી 4 લોકોના જ્યારે ડૂબવાથી બે ના અને એક મહિલાનું વીજળી પડવાથી મોત થયું છે.

સુરત શહેરમાં બે દિવસથી ગાજવીજ અને પવન સાથે વરસાદ વરસી રહ્યો છે. જેને લઇ જનજીવન સંપૂર્ણપણે અસ્તવ્યસ્ત થઈ ગયું છે. ધોધમાર વરસાદને પગલે શહેરના અનેક વિસ્તારોમાં પાણી ભરાતા બેટમાં ફેરવાયા છે. રસ્તાઓ પણ પાણીમાં ગરકાવ થયા છે. અનેક જગ્યાએ વૃક્ષો પડી જવાના બનાવ પણ બન્યા છે. તંત્ર દ્વારા લોકોને બિનજરૂરી બહાર ન નીકળવા અપીલ કરવામાં આવી છે.

સુરતમાં સોમવારે બે કલાકમાં વીજળીના કડાકા સાથે 4 ઇચ વરસાદ પડ્યો હતો તેમજ મંગળવારે પણ 7 ઇંચ જેટલો વરસાદ વરસતા આખુ શહેર પાણીમાં ગરકાવ થઇ ગયું છે. શહેરના મુખ્ય માર્ગો નદીઓમાં ફેરવાઈ જતા લોકો ભારે હાલાકીનો સામનો કરી રહ્યા છે. 24 કલાકમાં 9 લોકોના મોત થઈ ગયા છે અને પશુઓ પણ પાણી સાથે તણાયા છે.

બસમાં ફસાયેલા મુસાફરોને બચાવાયા

અત્યારે બે ખાડી ભયજનક સપાટી પર વહી રહી છે. કતારગામ, વરાછા, રાંદેર, વેસુ અને પૂણા પાટિયા જેવા વિસ્તારો પાણીમાં ગરકાવ થયા છે. સરથાણા જકાતનાકા પાસેના અંડરપાસમાં ગુજરાત એસટીની બસ ફસાઈ હતી. સરથાણા ફાયર સ્ટેશનની ટીમ ઘટનાસ્થળે પહોચી બસમાં ફસાયેલા 15 મુસાફરોને બચાવી લીધા હતા.

આ પણ વાંચોઃ એલર્ટ જાહેર / દક્ષિણ ગુજરાતમાં ધોધમાર વરસાદ, ડોસવાડા વિયર ડેમ થયો ઓવરફ્લો, 17 ગામ એલર્ટ કરાયાં

વરસાદને કારણે 8 જુલાઇએ સુરત અને વલસાડમાં શાળા-કોલેજોમાં રજા

ભારે વરસાદમાં સુરતમાં જનજીવન અસ્તવ્યસ્ત બન્યુ છે જેને લઇ સુરતમાં પણ વહીવટી તંત્રની સૂચનાથી 8 જુલાઇએ તમામ શાળાઓ અને કોલેજોમાં શૈક્ષણિક કાર્ય બંધ રાખીને રજા જાહેર કરવામાં આવી છે. બીજી બાજુ વલસાડ જિલ્લામાં ભારે વરસાદને પગલે વલસાડ જિલ્લા કલેક્ટરની સૂચના અનુસાર આગામી બુધવાર 8 જુલાઈ 2026ના જિલ્લાની તમામ શાળાઓ, કોલેજો, આઈ.ટી.આઈ. અને આંગણવાડી કેન્દ્રોમાં શૈક્ષણિક કાર્ય બંધ રાખવાની જાહેરાત કરવામાં આવી છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ