ગુજરાત / ટ્રેનો રદ, ST બંધ, સ્ટેશન પર અટવાયેલા પ્રવાસીઓ ઘરે પહોંચવા કરી રહ્યાં છે મથામણ

રાજ્યમાં સતત વરસી રહેલા ભારે વરસાદે પરિવહન વ્યવસ્થાને ગંભીર રીતે ખોરવી નાખી છે. આજે પણ સૌરાષ્ટ્ર, અમદાવાદ, મુંબઈ રૂટની અનેક ટ્રેનો રદ અને મોડી રહેતાં હજારો મુસાફરો વિવિધ રેલવે સ્ટેશનો પર અટવાઈ ગયા છે. ટ્રેન ન મળતાં ઘણા પ્રવાસીઓને સ્ટેશન પર જ રાત વિતાવવાની અને આશ્રય લેવાની ફરજ પડી છે, બીજી તરફ વરસાદના કારણે અનેક માર્ગો બંધ થતાં એસટી બસ સેવા પણ મોટા પ્રમાણમાં પ્રભાવિત થઈ છે. અનેક રૂટ પર બસો બંધ રાખવામાં આવતાં મુસાફરોને પોતાના ગંતવ્ય સુધી પહોંચવા માટે ભારે સંઘર્ષ કરવો પડી રહ્યો છે.

રેલવે સ્ટેશનો અને બસ સ્ટેન્ડ પર મોટી સંખ્યામાં મુસાફરોની ભીડ જોવા મળી રહી છે. કેટલાક લોકો વૈકલ્પિક વાહનોની શોધમાં છે તો કેટલાક પોતાનાં સગાંસંબંધીઓનો સંપર્ક કરીને ઘરે પહોંચવાના પ્રયાસો કરી રહ્યા છે. સતત વરસાદ અને બંધ માર્ગોના કારણે પરિવહન વ્યવસ્થા ખોરવાતાં સામાન્ય જનજીવન અસ્તવ્યસ્ત બની ગયું છે.

ટેક્સીનો સહારો લેતા મુસાફરોને વધારાનું ભાડું ચૂકવવું પડી

વૈકલ્પિક વ્યવસ્થા તરીકે ખાનગી વાહનો અને ટેક્સીનો સહારો લેતા મુસાફરોને વધારાનું ભાડું ચૂકવવું પડી રહ્યું છે. ઘણાં સ્થળોએ પાણી ભરાવા અને રસ્તા ધોવાઈ જવાના કારણે ખાનગી વાહનો પણ આગળ વધી શકતાં નથી. કેટલાક વિસ્તારોમાં લોકો પોતાના ગામ કે શહેર સુધી પહોંચવા માટે કલાકો સુધી રાહ જોતા જોવા મળ્યા હતા.

કેટલીક ટ્રેનોને ટૂંકા અંતર સુધી જ દોડાવવામાં આવી રહી

અનેક ટ્રેનોના રૂટમાં ફેરફાર કરવામાં આવ્યા છે, જ્યારે કેટલીક ટ્રેનોને ટૂંકા અંતર સુધી જ દોડાવવામાં આવી રહી છે, પરિણામે મુસાફરો કલાકો સુધી રેલવે સ્ટેશનો પર અટવાઈ રહ્યા છે. પ્લેટફોર્મ પર બાળકો અને વૃદ્ધો સાથે બેઠેલા પરિવારોની સંખ્યા વધી રહી છે. ખાવા-પીવાની વસ્તુઓ અને પીવાના પાણીની વ્યવસ્થા માટે પણ લોકોને મુશ્કેલીનો સામનો કરવો પડી રહ્યો છે. ટ્રેન ક્યારે શરૂ થશે તેની સ્પષ્ટ માહિતી ન મળતાં મુસાફરોમાં ભારે અનિશ્ચિતતા અને ચિંતા જોવા મળી રહી છે.

આ પણ વાંચો : એલર્ટ! ગુજરાત સહિત આ રાજ્યોમાં અતિભારે વરસાદની ચેતવણી

બીજી તરફ વરસાદના કારણે અનેક હાઇવે અને આંતરિક માર્ગો બંધ થતાં રાજ્ય પરિવહનની એસટી બસ સેવા પણ વ્યાપક રીતે પ્રભાવિત થઈ છે. અનેક જિલ્લાઓના રૂટ પર બસ સેવા સંપૂર્ણપણે સ્થગિત કરવામાં આવી છે, જ્યારે કેટલાક રૂટ પર માત્ર મર્યાદિત બસો જ દોડાવવામાં આવી રહી છે, જેના કારણે બસ સ્ટેન્ડ પર પણ મુસાફરોની ભારે ભીડ જોવા મળી રહી છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ