નેશનલ / ''છેલ્લાં 10 દિવસથી ચાલતા ઘટનાક્રમથી મારું મન દુ:ખી છે'', અંતે ધર્મેન્દ્ર 'પ્રધાન' ના રહ્યાં

NEET-UG પરીક્ષામાં ગેરરીતિના આરોપો અને દેશભરમાં ચાલી રહેલા વિદ્યાર્થી આંદોલન વચ્ચે કેન્દ્રીય શિક્ષણ મંત્રી ધર્મેન્દ્ર પ્રધાને રાજીનામું આપી દીધું છે. તેમણે વડાપ્રધાન નરેન્દ્ર મોદીને મોકલેલા રાજીનામા પત્રમાં છેલ્લા કેટલાક દિવસોના ઘટનાક્રમથી દુઃખી હોવાનું જણાવ્યું છે. તેમણે કહ્યું કે આ નિર્ણય વ્યક્તિગત પ્રતિષ્ઠાનો નહીં પરંતુ દેશના વિદ્યાર્થીઓના ભવિષ્ય સાથે જોડાયેલો છે.

રાજીનામામાં શું લખ્યું ધર્મેન્દ્ર પ્રધાને?

ધર્મેન્દ્ર પ્રધાને પોતાના પત્રમાં જણાવ્યું કે તેઓ ચાર દાયકાથી વધુ સમયથી વિદ્યાર્થીઓ, શિક્ષકો અને શિક્ષણ ક્ષેત્રના સુધારા માટે કામ કરી રહ્યા છે. તેમણે કહ્યું કે મજબૂત અને પારદર્શક શિક્ષણ વ્યવસ્થા કોઈપણ દેશના વિકાસનો આધાર છે.

NEET વિવાદથી થયા વ્યથિત

ધર્મેન્દ્ર પ્રધાને લખ્યું કે છેલ્લા 10 દિવસથી ચાલી રહેલી ઘટનાઓથી તેમનું મન ખૂબ દુઃખી છે. તેમણે કહ્યું કે આ મુદ્દો તેમના વ્યક્તિગત સન્માનનો નથી પરંતુ દેશના લાખો વિદ્યાર્થીઓના ભવિષ્યનો છે.

પરીક્ષા સુધારા અને CBI તપાસનો કર્યો ઉલ્લેખ

પત્રમાં તેમણે NEET-UG પરીક્ષામાં સામે આવેલી ગેરરીતિઓ બાદ સરકાર દ્વારા લેવામાં આવેલા પગલાંનો ઉલ્લેખ કર્યો છે. તેમણે કહ્યું કે મામલાની તપાસ CBIને સોંપવામાં આવી અને પરીક્ષા વ્યવસ્થામાં સુધારા માટે જરૂરી નિર્ણયો લેવામાં આવ્યા.

વિદ્યાર્થીઓના ભવિષ્યને આપી પ્રાથમિકતા

ધર્મેન્દ્ર પ્રધાને કહ્યું કે તેઓ નથી ઈચ્છતા કે વિદ્યાર્થીઓનું ભવિષ્ય કાયદાકીય વિવાદો અને રાજકીય ચર્ચાઓમાં અટવાઈ જાય. વિદ્યાર્થીઓનું ધ્યાન અભ્યાસ પરથી ન ભટકે તે માટે તેમણે આ નિર્ણય લીધો હોવાનું જણાવ્યું.

આ પણ વાંચોઃ કેન્દ્રીય શિક્ષણ મંત્રી ધર્મેન્દ્ર પ્રધાનનું રાજીનામું, પોસ્ટ કરીને આપી માહિતી

વડાપ્રધાન અને મંત્રાલયનો માન્યો આભાર

રાજીનામાના અંતમાં ધર્મેન્દ્ર પ્રધાને વડાપ્રધાન નરેન્દ્ર મોદી, મંત્રિમંડળના સહયોગીઓ અને શિક્ષણ મંત્રાલયના અધિકારીઓનો આભાર વ્યક્ત કર્યો. તેમણે કહ્યું કે જાહેર જીવનમાં આગળ પણ દેશના યુવાનો અને લોકો માટે કામ કરતા રહેશે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ