કવાયત / ગુજરાતમાં નવા એપાર્ટમેન્ટમાં નહીં ચાલે PG! સરકારના નવા નિયમોમાં શું બદલાશે? જાણો સંપૂર્ણ માહિતી

Published By: Priykant Shrimali

Reported By: Mehul Desai

Last Updated: 11:49 AM, 5 August 2026

FOLLOW ON

શેર કરો

Ahmedabad PG Rules : ગુજરાતમાં PG અંગે નવા નિયમોની તૈયારી, નવા એપાર્ટમેન્ટમાં હવે મંજૂરી નહીં, PG માટે અલગ અને સ્વતંત્ર બાંધકામને જ મંજૂરી આપવાની જોગવાઈ ?

Ahmedabad PG Rules : ગુજરાતમાં PG એટલે કે Paying Guest સુવિધાને લઈને રાજ્ય સરકાર નિયમોમાં મોટો ફેરફાર કરવાની તૈયારીમાં છે. શહેરી વિકાસ અને શહેરી ગૃહ નિર્માણ વિભાગે Comprehensive General Development Control Regulations (CGDCR)માં સુધારા માટેની પ્રક્રિયા શરૂ કરી છે. પ્રસ્તાવિત નિયમો મુજબ નવા એપાર્ટમેન્ટ બ્લોક કે કોમર્શિયલ કોમ્પ્લેક્સમાં PG સુવિધા શરૂ કરવાની મંજૂરી નહીં મળે. PG માટે અલગ અને સ્વતંત્ર બાંધકામને જ મંજૂરી આપવાની જોગવાઈ કરવામાં આવી રહી છે. હાલ સુધી ગુજરાતના શહેરી આયોજનના નિયમોમાં ‘Paying Guest’ માટે સ્પષ્ટ જોગવાઈ નહોતી. 28 જુલાઈએ રાજ્ય સરકારે CGDCRમાં સુધારા અંગે જાહેરનામું બહાર પાડીને લોકો પાસેથી વાંધા અને સૂચનો મંગાવ્યા છે. આ પ્રક્રિયા માટે 3 ઓક્ટોબર સુધી રજૂઆતો કરી શકાશે.

PG માટે DW3 કેટેગરી હેઠળ નિયમો

પ્રસ્તાવિત સુધારા મુજબ PG આવાસને Dwelling 3 (DW3) કેટેગરીમાં સામેલ કરવામાં આવશે. PG માટે અલગ બાંધકામ જરૂરી રહેશે અને તેને અન્ય એપાર્ટમેન્ટ કે કોમર્શિયલ બાંધકામની અંદર મિશ્ર રીતે ચલાવવાની મંજૂરી નહીં મળે. આ ફેરફારથી PG સંચાલન અંગે અત્યાર સુધી રહેલી નિયમોની અસ્પષ્ટતા દૂર થવાની શક્યતા છે.

અમદાવાદમાં છેલ્લા કેટલાક સમયથી PG અંગે નિયમન અને મંજૂરીને લઈને વિવાદ જોવા મળ્યો છે. વર્ષ 2025 દરમિયાન શહેરમાં 401 PG યુનિટ હોવાની ઓળખ થઈ હતી. તેમાંથી જરૂરી પોલીસ અને સોસાયટી NOC ન ધરાવતા 385 PG યુનિટને નોટિસ આપવામાં આવી હતી, જ્યારે 25થી વધુ PGને સીલ કરવામાં આવ્યા હતા. PG માટે સ્પષ્ટ વ્યાખ્યા અને બાંધકામના નિયમો અગાઉ CGDCRમાં ન હોવાથી સ્થાનિક તંત્રની કાર્યવાહી સામે પણ સવાલો ઊભા થયા હતા. અમદાવાદ મ્યુનિસિપલ કોર્પોરેશન દ્વારા અગાઉ PG માટે હોસ્ટેલ અને બોર્ડિંગ પ્રકારના બાંધકામના નિયમોનો આધાર લેવામાં આવતો હતો.

પ્રી-સ્કૂલ માટે પણ નવી કેટેગરી

CGDCRમાં PG સાથે પ્રી-સ્કૂલ માટે પણ અલગ નિયમો ઉમેરવામાં આવી રહ્યા છે. પ્રસ્તાવિત સુધારા મુજબ પ્રી-સ્કૂલને*‘Education-1’ કેટેગરીમાં રાખવામાં આવશે. પ્રી-સ્કૂલ માટે 200 ચોરસ મીટરથી 1,000 ચોરસ મીટર સુધીના પ્લોટ પર બાંધકામની મંજૂરી આપવાની જોગવાઈ છે. તેમાં ઓછામાં ઓછું 50 ચોરસ મીટરનું બિલ્ટ-અપ એરિયા અને મહત્તમ 12 મીટર સુધીની ઊંચાઈ રાખી શકાશે. રહેણાક વિસ્તારમાં આવેલા બંગલા સ્કીમમાં પ્રી-સ્કૂલ શરૂ કરી શકાશે, પરંતુ રહેણાક એપાર્ટમેન્ટ સ્કીમમાં આવી સુવિધાને મંજૂરી નહીં મળે.

આ પણ વાંચો : ગુજરાતમાં ભૂગર્ભજળને લઈને મોટો નિર્ણય! ખાનગી નહીં, જાહેર સંસાધન ગણાશે; ગેરકાયદે ઉપયોગ પર જેલ-દંડ

2017થી પહેલીવાર PG માટે સ્પષ્ટ જોગવાઈ

ગુજરાતના તમામ શહેરી વિસ્તારો માટે એકસમાન CGDCR વર્ષ 2017માં અમલમાં આવ્યો હતો. જોકે તેમાં PG સુવિધા માટે કોઈ સ્પષ્ટ નિયમ નહોતો. હવે લગભગ એક દાયકા બાદ PG અને પ્રી-સ્કૂલ જેવી સુવિધાઓ માટે અલગ જોગવાઈ ઉમેરવાની પ્રક્રિયા શરૂ કરવામાં આવી છે. સરકારનો આ સુધારો અમદાવાદના આગામી Development Plan 2041ને મંજૂરી મળે તે પહેલાં કરવામાં આવી રહ્યો છે. નવા નિયમો અમલમાં આવ્યા બાદ PG અને પ્રી-સ્કૂલ અંગે મંજૂરી, બાંધકામ અને અમલીકરણની પ્રક્રિયા વધુ સ્પષ્ટ બનવાની અપેક્ષા છે.