મોટા સમાચાર / અંતે અનિરુદ્ધસિંહ જાડેજા ગોંડલ કોર્ટમાં થયા હાજર, હત્યા કેસમાં હતા ફરાર

ગોંડલના પૂર્વ ધારાસભ્ય પોપટ લાખા સોરઠીયાની 1989ની હત્યાના કેસમાં અનિરુદ્ધસિંહ જાડેજાની મુશ્કેલી વધી છે. સુપ્રીમ કોર્ટે તેમને આપેલા સાત દિવસના સ્ટે ઓર્ડરને પરત ખેંચી લીધો છે, જેના કારણે તેઓને આજે રાત્રે 8 વાગ્યા સુધીમાં જૂનાગઢ જેલમાં સરેન્ડર કરવાનું હતું. આ કેસમાં ગુજરાત હાઈકોર્ટે 22 ઓગસ્ટ 2025ના રોજ તેમની 2018ની સજા માફીને ગેરકાયદેસર જાહેર કરીને રદ કરી હતી અને એક મહિનામાં સરેન્ડર કરવાનો આદેશ આપ્યો હતો. આ કેસની વિગતો પર નજર કરીએ તો, 15 ઓગસ્ટ 1988ના રોજ ગોંડલમાં પોપટ સોરઠીયાની હત્યા કરવામાં આવી હતી. અનિરુદ્ધસિંહ જાડેજા અને અન્ય આરોપીઓને ટાડા હેઠળ સજા ફટકારવામાં આવી હતી.

તેઓએ 18 વર્ષની સજા ભોગવી હતી અને 2018માં રાજ્ય સરકારે તેમને માફી આપી હતી. પરંતુ હાઈકોર્ટે આ માફીને અમાન્ય ગણીને તેમને ફરી જેલમાં જવાનો આદેશ કર્યો છે. સુપ્રીમ કોર્ટમાં અરજી કરીને તેઓએ એક અઠવાડિયાની રાહત મેળવી હતી, પરંતુ આજે તેને પણ રદ કરી દેવામાં આવી છે. આ કેસમાં અનિરુદ્ધસિંહને જૂનાગઢ જેલમાં સરેન્ડર કર્યું છે. જો તેઓ આજે સરેન્ડર ન કરે તો તેમની મિલકત જપ્ત કરવાની કાર્યવાહી શરૂ થઈ શકે છે. તેમના વકીલોએ જણાવ્યું કે તેઓ કાયદાનું પાલન કરશે અને કોર્ટના આદેશ મુજબ કાર્ય કરશે. આ કેસમાં અનિરુદ્ધસિંહને પહેલા નિર્દોષ જાહેર કરવામાં આવ્યા હતા, પરંતુ અપીલ પછી તેમને સજા થઈ હતી.

આ ઉપરાંત, અનિરુદ્ધસિંહ જાડેજા અને તેમના પુત્ર રાજદીપસિંહ પર રીબડાના પાટીદાર યુવાન અમિત ખૂંટની આત્મહત્યા કેસનો પણ આરોપ છે. અમિત ખૂંટે 5 મે 2025 ના રોજ આત્મહત્યા કરી હતી અને તેની સુસાઈડ નોટમાં અનિરુદ્ધસિંહને જવાબદાર ગણાવ્યા હતા. આ કેસમાં અમિત વિરુદ્ધ દુષ્કર્મની ફરિયાદ નોંધાવવામાં આવી હતી, જેને અનિરુદ્ધસિંહ અને તેમના પુત્રની ષડયંત્ર તરીકે જોવામાં આવે છે. ગુજરાત હાઈકોર્ટે અનિરુદ્ધસિંહ અને રાજદીપસિંહની આગોતરા જામીન અરજીઓને ફગાવી દીધી છે. આ કેસમાં તેઓ છેલ્લા કેટલાક મહિનાઓથી ફરાર હતા અને વિદેશ ભાગી ગયા હોવાની આશંકા છે, જેના કારણે લૂકઆઉટ નોટિસ જારી કરવામાં આવી શકે છે. અમિત ખૂંટના પરિવારજનોએ આરોપ લગાવ્યો છે કે અનિરુદ્ધસિંહે તેમને ત્રાસ આપીને આત્મહત્યા માટે મજબૂર કર્યા હતા.

વધુમાં વાંચો: સુરતના લિંબાયત વાદળ ફાટ્યું! સાડા ચાર ઇંચ વરસાદ ખાબકી પડ્યો, અનેક વિસ્તાર ગળાડૂબ

આ કેસમાં પોલીસે વિશેષ તપાસ શરૂ કરી છે અને સ્પેશિયલ પબ્લિક પ્રોસિક્યુટરની નિમણૂક કરવામાં આવી છે. રાજદીપસિંહ પર પણ યુવતીઓને ખોટી ફરિયાદ કરવા માટે લાલચ આપવાના આરોપ છે, જેમાં આઈફોન અને ઠગલો રૂપિયાની ઓફર કરવામાં આવી હતી. આ બંને કેસોએ રાજકોટ અને ગોંડલ વિસ્તારમાં રાજકીય અને સામાજિક વર્તુળોમાં હલચલ મચાવી છે. અનિરુદ્ધસિંહ જાડેજા રીબડા વિસ્તારના પ્રભાવશાળી વ્યક્તિ છે અને તેમના પર અનેક આરોપો છે. પોપટ સોરઠીયા હત્યા કેસમાં તેમને ફરી જેલમાં જવું પડશે તેનાથી તેમના સમર્થકોમાં નિરાશા છે, જ્યારે અમિત ખૂંટના પરિવારને ન્યાય મળવાની આશા છે. પોલીસ અધિકારીઓએ જણાવ્યું કે જેલમાં સરેન્ડર બાદ અમિત ખૂંટ કેસમાં પણ તેમની ધરપકડ કરવામાં આવશે. આ કેસોમાં વધુ તપાસ અને કોર્ટના આદેશોનું પાલન કરવામાં આવશે. સમાજમાં આ પ્રકારના કેસોને લઈને ચર્ચા ચાલુ છે અને ન્યાય વ્યવસ્થા પર વિશ્વાસ વ્યક્ત કરવામાં આવી રહ્યો છે. અનિરુદ્ધસિંહના સરેન્ડર બાદ આ કેસમાં વધુ વિકાસ થવાની અપેક્ષા છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ