સ્કાયમેટ આગાહી / તો શું ચોમાસું આ વર્ષે મોડું આવશે? ડિપ ડિપ્રેશન વધારશે ખેડૂતોનું ટેન્શન

Skymet Weather Forecast : દેશભરના ખેડૂતો માટે આગામી ચોમાસાને લઈને ચિંતાજનક સંકેતો સામે આવી રહ્યા છે. વાસ્તવમાં ખાનગી હવામાન એજન્સી Skymet Weather દ્વારા જાહેર કરાયેલી આગાહી મુજબ આ વર્ષે ચોમાસું ભારતના દરિયાકાંઠે સામાન્ય સમય કરતાં મોડું પહોંચી શકે છે. ખાસ કરીને અરબ સાગરમાં સર્જાતી હવામાન પરિસ્થિતિઓને કારણે ચોમાસાની ગતિ ધીમી પડી હોવાનું માનવામાં આવી રહ્યું છે.

મહત્વનું છે કે, હવામાન નિષ્ણાતોના જણાવ્યા મુજબ અરબ સાગરમાં આગામી 24થી 48 કલાક દરમિયાન ડિપ ડિપ્રેશન સર્જાવાની શક્યતા છે. આ સિસ્ટમના કારણે દક્ષિણ પશ્ચિમ ચોમાસાની આગળ વધવાની પ્રક્રિયા પર અસર પડી રહી છે. સામાન્ય રીતે આ સમયગાળા દરમિયાન ચોમાસું ઝડપથી આગળ વધતું હોય છે, પરંતુ હાલ હવામાનમાં આવેલા ફેરફારોને કારણે તેની ગતિ ઘટી હોવાનું જણાવવામાં આવ્યું છે.

આ તરફ ચોમાસું મોડું પડવાની શક્યતાએ ખાસ કરીને ખેતી પર નિર્ભર ખેડૂતોની ચિંતા વધારી છે. કારણ કે સમયસર વરસાદ ન આવે તો વાવણી પ્રક્રિયા પ્રભાવિત થઈ શકે છે. ખેડૂતો માટે પાણી, પાક આયોજન અને કૃષિ કામગીરીનું સમયપત્રક ચોમાસા પર જ આધારિત હોય છે.

આ પણ વાંચો : પેટ્રોલ-ડીઝલ બાદ હવે દવાઓના પણ ભાવમાં થઇ શકે ઉછાળો, જાણો કેમ

હાલમાં દેશના અનેક વિસ્તારોમાં ગરમીનો પ્રકોપ યથાવત છે અને વરસાદ અંગે લોકો રાહ જોઈ રહ્યા છે. હવામાન વિભાગ અને ખાનગી એજન્સીઓ સતત પરિસ્થિતિ પર નજર રાખી રહી છે. આગામી દિવસોમાં અરબ સાગરમાં સર્જાનારી હવામાન સિસ્ટમ ચોમાસાની દિશા અને ગતિ નક્કી કરવામાં મહત્વની સાબિત થઈ શકે છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ