બેદરકારી / વીરપુર રોડ પર મળેલી ઉત્તરવહી મામલે શિક્ષણમંત્રીએ કહ્યું- કડક પગલા લેવાશે, તો કોંગ્રેસે મોટા આરોપ લગાવ્યા

• ઉત્તરવાહી મળવા મામલે શિક્ષણમંત્રીનુ નિવેદન
• એક બેગમાં 475 શીટ હતીઃ શિક્ષણમંત્રી
• અગાઉ પણ શિક્ષણના કૌભાંડો સામે આવ્યા છે: કોંગ્રેસ

વીરપુર અને જેતપુરમાં અવાવરૂ જગ્યાએથી ઉત્તરવહીઓ મળી આવી છે. આ ઉત્તરવહી મળવા મામલે શિક્ષણમંત્રી ભૂપેન્દ્રસિંહ ચૂડાસમાએ કહ્યું હતું કે વીરપુર ચોકડી પાસેથી કેટલીક ઉત્તરવહીઓ મળી આવી છે. એક બેગમાં 475 શીટ હતી. બધી બેગો સહીસલામત છે. કમિશનરને સમગ્ર મામલે તપાસ સોંપી છે. 5 વ્યક્તિ સામે પોલીસે કાર્યવાહી શરૂ કરી છે.

ભૂપેન્દ્રસિંહ ચૂડાસમાએ આ મામલે કહ્યું હતું કે, જિલ્લા શિક્ષણ અધિકારીઓને તપાસના આદેશ આપ્યા છે. કેટલીક ઉત્તરવહી હજુ નથી મળી તેની પણ તપાસ ચાલુ છે. જે કોઇ દોષિત હશે તેની સામે કડક કાર્યવાહી કરાશે. વીરપુર અને જેતપુરમાંથી અવાવરૂ જગ્યા પરથી ધોરણ-10 અને 12ની ઉત્તરવાહીઓ મળી આવી હતી.

બોર્ડની બેજવાબદારીભરી કામગીરીનું ઉદાહરણ છે: કોંગ્રેસ

જેતપુર અને ગોંડલમાં ઉત્તરવહી મળવા મામલે કોંગ્રેસે ભાજપ સરકાર પર પ્રહાર કર્યા છે. મનીષ દોશીએ કહ્યું કે શિક્ષણ વિભાગ ભ્રષ્ટાચારનું એપી સેન્ટર બની ગયું છે. મહેનત કરનાર વિદ્યાર્થીઓના ભવિષ્ય સાથે ચેડા થઇ રહ્યાં છે. બોર્ડની બેજવાબદારીભરી કામગીરીનું ઉદાહરણ છે. અગાઉ પણ શિક્ષણના કૌભાંડો સામે આવ્યા છે. બાળકોના વાલીઓ પણ ચિંતામાં છે. ત્યારે ભાજપ સરકાર માત્ર તપાસની વાતો કરે છે. બેદરકારી દાખવનાર સામે કડક પગલા લેવાય અને બાળકોના ભવિષ્ય સાથે ચેડા ન થાય તે જોવું જોઇએ.

અમારી જવાબદારી પાલા કેન્દ્ર સુધી ઉત્તરવહી પહોંચાડવાનીઃ ઇન્ચાર્જ શિક્ષણાધિકારી

ઉત્તરવહી મળવાના મામલે મહેસાણા જિલ્લા ઇન્ચાર્જ શિક્ષણાધિકારી સ્મિતા પટેલનું નિવેદન સામે આવ્યું છે. તેમને કહ્યું હતું કે ઉત્તરવહી કેવી રીતે ત્યાં પહોંચી તેનો કોઇ ખ્યાલ નથી. અમારી જવાબદારી પાલા કેન્દ્ર સુધીની છે. મહેસાણા જિલ્લામાં ધોરણ 10 માટે પાલા કેન્દ્ર નંદાસણ છે. ધોરણ 12 માટે પાલા કેન્દ્ર ગાંધીનગર છે. અમારી જવાબદારી પાલા કેન્દ્ર સુધી ઉત્તરવહી પહોંચાડવાની છે. અમે પોલીસ બંદોબસ્ત સાથે પાલા કેન્દ્ર સુધી ઉત્તરવહી પહોંચાડી હતી. પાલા કેન્દ્રથી ઉત્તરવહીઓ ઝોનમાં જાય છે. ઉત્તરવહી ઝોનથી મધયસ્થ મૂલ્યાંકન કેન્દ્ર પર જાય છે.