નેશનલ / 600 મિલિયનના સોદા સાથે વિશ્વના ડિફેન્સ માર્કેટમાં ભારતનો મજબૂત દબદબો, નિકાસ ₹38,424 કરોડને પાર

ભારત હવે માત્ર પોતાની સુરક્ષા માટે જ નહીં પરંતુ વિશ્વના ડિફેન્સ માર્કેટમાં પણ મજબૂત પગપેસારો કરી રહ્યું છે. જેમાં બ્રહ્મોસ મિસાઈલ આ ક્ષેત્રમાં સૌથી મોટું નામ બની ગઈ છે. રક્ષા સચિવ રાજેશ કુમાર સિંહના જણાવ્યા અનુસાર, ફિલિપાઈન્સ, વિયેતનામ અને ઇન્ડોનેશિયા સાથે મળીને 60 કરોડ ડોલરથી વધુ એટલે કે લગભગ 58 અબજ રૂપિયાના સોદા પૂરા થઈ ચૂક્યા છે.

ફિલિપાઈન્સ સાથે લગભગ 33 કરોડ ડોલરનો કરાર થયો છે અને મિસાઈલોની સપ્લાય પણ શરૂ થઈ ગઈ છે. વિયેતનામ સાથે 10 કરોડ ડોલર અને ઇન્ડોનેશિયા સાથે 20 કરોડ ડોલરના કરાર થયા છે. આ મિસાઈલ હવે વિમાનમાંથી છોડવાના વર્ઝનમાં પણ તૈયાર થઈ ચૂકી છે. સુખોઈ ફાઈટર જેટમાંથી તેને છોડવાની કસોટી સફળ રહી છે.

જેમાં રાજેશ કુમાર સિંહે જણાવ્યું કે, ઓપરેશન સિંદૂર દરમિયાન બ્રહ્મોસે પોતાની ચોકસાઈ અને ક્ષમતા સાબિત કરી છે. તે ધ્વનિ કરતાં વધુ ઝડપથી ટાર્ગેટને નિશાન બનાવે છે અને પ્રોગ્રેસની પ્રક્રિયા હજુ પણ ચાલુ છે. આથી આગળ પણ ભારતના હથિયારોના નિકાસમાં તે મોટી ભૂમિકા ભજવતી રહેશે.

રક્ષા મંત્રી રાજનાથ સિંહે પણ અગાઉ કહ્યું હતું કે, બ્રહ્મોસ માત્ર એક મિસાઈલ નથી, પરંતુ ભારતની વધતી રક્ષા ક્ષમતાનું પ્રતીક છે. ભારતનો રક્ષા નિકાસ હવે વિશ્વના 80 દેશો સુધી પહોંચી ગયો છે. વર્ષ 2025-26માં તે વધીને 38,424 કરોડ રૂપિયા થયો છે જે એક વર્ષમાં જ 62 ટકાથી વધુની ગ્રોથ દર્શાવે છે.

વધુ વાંચો :કોકપિટમાં જીવલેણ હુમલો છતાં ન હારી હિંમત, અંદરથી દરવાજો ખોલી બચાવ્યા હતા દરેકના જીવ

આ સાથે ચીન અને પાકિસ્તાન વચ્ચે વધતા નૌસેનિક સહયોગને ધ્યાનમાં રાખીને ભારત પણ પોતાની સમુદ્રી શક્તિ વધારી રહ્યું છે. જર્મની સાથે 80 હજાર કરોડ રૂપિયાના ખર્ચે 6 સબમરીન બનાવવાનો કોન્ટ્રાકટ અંતિમ તબક્કામાં છે. આ સબમરીન ભારતમાં જ બનશે. જેમાં ત્રણ સ્કાર્પીન સિરીઝના યુદ્ધજહાજો બનાવવાની પણ ચર્ચા ચાલી રહી છે, જે મુંબઈના મઝગાંવ ડોકયાર્ડમાં બનશે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ