બનાસકાંઠા / ''દીકરીઓને સલાહ આપો તો...'', આનંદીબેન પટેલના દીકરીની સમાજને ટકોર

બનાસકાંઠા જિલ્લાના ગઢ ગામ ખાતે યોજાયેલા સરદાર પટેલની પ્રતિમાનાં અનાવરણ કાર્યક્રમમાં પાટીદાર અગ્રણી અનાર પટેલ એ સમાજમાં વધી રહેલા દારૂના દૂષણ અને પ્રેમલગ્નોના મુદ્દે ખુલ્લેઆમ ચિંતા વ્યક્ત કરી હતી.

પાટીદાર સમાજને અનાર પટેલની ટકોર

કાર્યક્રમ દરમિયાન અનાર પટેલે સમાજને સંબોધતા કહ્યું કે માત્ર દીકરીઓને જ સલાહ આપવાથી કામ નહીં ચાલે, દીકરાઓને પણ સંસ્કાર અને જવાબદારી શીખવવાની જરૂર છે. તેમણે કહ્યું કે, “આપણો છોકરો દારૂ પીતો હોય, રખડતો હોય અને કોઈ કામધંધો ન કરતો હોય તો દીકરીઓ બીજા સમાજમાં કેમ નહીં જાય?”

દારૂના દૂષણ અને પ્રેમલગ્ન વિશે કરી વાત

તેમણે દારૂના વધતા પ્રભાવ પર પણ કડક ટકોર કરતાં કહ્યું કે જો ઘરમાં કોઈ ભાઈ દારૂ પીને આવે તો દીકરીઓએ પણ તેનો વિરોધ કરવો જોઈએ. “ઘરમાં ભાઈ દારૂ પીને આવે તો તેને બહાર કાઢજો,” એમ કહી તેમણે યુવતીઓને પણ સમાજ સુધારામાં ભાગીદાર બનવા આહ્વાન કર્યું.

દીકરીઓને સલાહ આપીએ તો દીકરાને કેમ નહીં? તે સમાજ નથી બગાડતો"

અનાર પટેલે જણાવ્યું કે સમાજમાં પ્રેમલગ્નોના વધતા પ્રમાણ પાછળ માત્ર દીકરીઓને જવાબદાર ગણવું યોગ્ય નથી. “દીકરીઓને સલાહ આપીએ છીએ, પણ દીકરાને કેમ નહીં? સમાજને બગાડવામાં દીકરાઓની જવાબદારી પણ એટલી જ છે,” એમ તેમણે સ્પષ્ટ કહ્યું.

આ પણ વાંચોઃ ''પ્રેમલગ્નથી પણ કોઇને વાંધો ના હોઇ શકે પરંતુ...'', આંતરજ્ઞાતિય લગ્ન મુદ્દે લાલજી પટેલએ આ શું કહ્યું?

કાર્યક્રમમાં મોટી સંખ્યામાં સમાજના આગેવાનો અને ગ્રામજનો હાજર રહ્યા હતા. અનાર પટેલના આ નિવેદનો બાદ સમાજમાં ચર્ચાનો માહોલ સર્જાયો છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ