નિર્ણય / હવેથી આટલી સ્પીડ પર નહીં આવે ટ્રાફિક મેમો! ઓવરસ્પીડિંગના કારણે વધતા ચલણને લઇ ગડકરીનું મોટું એલાન

હાઈવે પર વાહન ચલાવતી વખતે સ્પીડ લિમિટનું ધ્યાન રાખવું દરેક ડ્રાઈવર માટે જરૂરી છે. જોકે વધુ ઝડપે વાહન ચલાવવાના મેમોને લઈને હવે નવી ચર્ચા શરૂ થઈ છે. નીતિન ગડકરીએ એક કાર્યક્રમમાં સ્પીડ અને ટ્રાફિક મેમો અંગે પોતાની વાત રજૂ કરી હતી. તેમણે 120 કિમી પ્રતિ કલાકની ઝડપ સુધી મેમો ન મોકલવા અને તેનાથી 20 ટકા વધુ ઝડપ સુધી પણ છૂટ આપવાની વાત કરી છે. જોકે આ નિવેદનનો અર્થ એ નથી કે એક્સપ્રેસવે પર 144 કિમી પ્રતિ કલાકની ઝડપે વાહન ચલાવવાની કાયદેસર છૂટ મળી ગઈ છે.

વાહનચાલકોને સ્પીડિંગ મેમોમાં મોટી રાહત?

120 કિમીની ઝડપ સુધી મેમો નહીં મોકલવાની સૂચના

એક્સપ્રેસવે પર વાહન ચલાવતા લોકોને ઓવરસ્પીડિંગના મેમો અંગે મોટી રાહત મળી શકે છે. કેન્દ્રીય માર્ગ પરિવહન મંત્રી નીતિન ગડકરીએ જણાવ્યું છે કે તેમણે અધિકારીઓને 120 કિમી પ્રતિ કલાકની ઝડપ સુધી વાહનચાલકોને ટ્રાફિક મેમો ન મોકલવા કહ્યું છે. તેમના જણાવ્યા મુજબ આ ઝડપથી વધુ વાહન ચલાવતા લોકોને પણ 20 ટકા સુધીની વધારાની છૂટ આપવાની વાત કરવામાં આવી છે. જોકે નક્કી કરેલી મર્યાદા કરતાં વધુ ઝડપે વાહન ચલાવનારાઓ સામે જ મેમો જારી કરવાની વાત તેમણે કરી છે.

144 કિમીની ઝડપે ગાડી ચલાવવાની છૂટ મળી ગઈ?

ગડકરીના આ નિવેદન બાદ વાહનચાલકોમાં ચર્ચા શરૂ થઈ છે. એક્સપ્રેસવે પર સામાન્ય રીતે 120 કિમી પ્રતિ કલાકની સ્પીડ લિમિટ હોય છે. જો તેમાં 20 ટકા વધારાની છૂટ ગણવામાં આવે તો આ ઝડપ લગભગ 144 કિમી પ્રતિ કલાક થાય છે. જોકે અહીં એક વાત સમજવી જરૂરી છે કે ગડકરીએ અધિકારીઓને મેમો મોકલવા અંગે સૂચના આપવાની વાત કરી છે. તેનો અર્થ એવો નથી કે હવે એક્સપ્રેસવે પર 144 કિમી પ્રતિ કલાકની ઝડપે વાહન ચલાવવાનો નવો નિયમ બની ગયો છે. વાહનચાલકોએ રસ્તા પર દર્શાવેલી સ્પીડ લિમિટ અને ટ્રાફિકના નિયમોનું પાલન કરવું જરૂરી છે.

📍New Delhi | Addressing CII’s National Conference on ‘Highways of India’s Future: Smart, Safe and Sustainable‘ https://t.co/nDLJYhbWcj

— Nitin Gadkari (@nitin_gadkari) October 27, 2026

એક કાર્યક્રમમાં ગડકરીએ કરી વાત

નીતિન ગડકરીએ મંગળવારે કન્ફેડરેશન ઓફ ઇન્ડિયન ઇન્ડસ્ટ્રી (CII)ના એક કાર્યક્રમમાં આ વાત કરી હતી. આ કાર્યક્રમમાં ભારતના હાઈવે નેટવર્કના ભવિષ્ય અને માર્ગ પરિવહન સાથે જોડાયેલા મુદ્દાઓ પર ચર્ચા થઈ હતી. ગડકરીએ જણાવ્યું કે ઘણા વાહનચાલકોને વધુ ઝડપે વાહન ચલાવવાના કારણે મેમો મળી રહ્યા છે. આ અંગે તેમણે અધિકારીઓને 120 કિમી પ્રતિ કલાક સુધીની ઝડપે વાહન ચલાવતા લોકોને નોટિસ ન મોકલવા કહ્યું છે. સાથે જ આ મર્યાદાથી 20 ટકા સુધી વધુ ઝડપ હોય તો પણ વાહનચાલકોને રાહત આપવાની વાત કરી હતી.

આ પણ વાંચોઃ બનાસકાંઠાથી PM મોદીએ જાહેર કર્યો PM કિસાન સન્માન નિધિનો 24મો હપ્તો, ખેડૂતો ચેક કરી લેજો

હાઈવે પર AI સિસ્ટમથી રાખવામાં આવશે નજર

ગડકરીએ હાઈવે પર વધતા ટ્રાફિક અને માર્ગ અકસ્માતોને રોકવા માટે આર્ટિફિશિયલ ઇન્ટેલિજન્સ (AI) આધારિત એડવાન્સ્ડ ટ્રાફિક મેનેજમેન્ટ સિસ્ટમ (ATMS)ને મજબૂત બનાવવા પર પણ ભાર મૂક્યો હતો. આ વ્યવસ્થા લાગુ કરવા માટે તેમણે ઉદ્યોગ જગતનો સહયોગ પણ માગ્યો હતો. AI આધારિત સિસ્ટમની મદદથી હાઈવે પર દોડતાં વાહનો પર નજર રાખી શકાશે. આ ઉપરાંત ખોટી લેનમાં વાહન ચલાવવું અને ટ્રાફિકના અન્ય નિયમોનું ઉલ્લંઘન જેવી બાબતો પણ પકડી શકાશે.

E20 પેટ્રોલ અંગે પણ ગડકરીએ કરી વાત

આ કાર્યક્રમમાં ગડકરીએ E20 પેટ્રોલ અંગે ચાલી રહેલા વિરોધ પર પણ પોતાની વાત રજૂ કરી હતી. તેમણે પેટ્રોલમાં ઇથેનોલ મિશ્રણને લઈને થઈ રહેલી ટીકા અને વિરોધને 'પેઇડ પ્રોપેગેન્ડા' ગણાવ્યો હતો. તેમના જણાવ્યા મુજબ વર્ષ 2022થી અત્યાર સુધીમાં લગભગ 4 કરોડ કાર અને 20 કરોડ ટુ-વ્હીલર E20 ફ્યુઅલનો ઉપયોગ કરી રહ્યાં છે. તેમણે સવાલ કર્યો હતો કે આટલા મોટા પ્રમાણમાં વાહનોમાં આ પેટ્રોલ વપરાઈ રહ્યું છે તો શું કોઈનું વાહન ખરાબ થયું છે?ગડકરીએ વધુમાં કહ્યું હતું કે થોડા મહિના પહેલાં ઇથેનોલ મિશ્રણને લઈને ઘણો વિરોધ થયો હતો, પરંતુ હવે આ મુદ્દે હોબાળો ઓછો થયો છે. આ રીતે કાર્યક્રમમાં તેમણે એક તરફ હાઈવે પર સ્પીડ મેમો અંગે રાહતની વાત કરી તો બીજી તરફ AI આધારિત ટ્રાફિક સિસ્ટમ અને E20 પેટ્રોલ અંગે પણ પોતાનો મત રજૂ કર્યો હતો.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ