આગાહી / ગુજરાતમાં આગામી 2 દિવસ ગાજવીજ સાથે હળવા વરસાદની આગાહી, તો અહીં અનુભવાશે ઠંડીનો ચમકારો

Gujarat IMD Forecast : ગુજરાતમાં દિવાળીના પડઘમ સંભળાઈ રહ્યા છે ત્યારે હવે હવામાનમાં પલટો જોવા મળી રહ્યો છે. રાજ્યના અનેક વિસ્તારોમાં વાદળછાયું વાતાવરણ સર્જાયું છે, જ્યારે અમદાવાદમાં ગુરુવાર સાંજથી જ આકાશ વાદળોથી ઘેરાયેલું જોવા મળ્યું હતું. શહેરના એસ.જી. હાઇવે વિસ્તારમાં હળવો વરસાદ પણ નોંધાયો હતો. બીજી તરફ, હવામાન વિભાગે આગામી બે દિવસ દરમિયાન સૌરાષ્ટ્ર અને દક્ષિણ ગુજરાતના કેટલાક જિલ્લાઓમાં ગાજવીજ સાથે હળવો વરસાદ થવાની શક્યતા વ્યક્ત કરી છે. આ સાથે આગામી દિવસોમાં રાજ્યના મહત્તમ તાપમાનમાં પણ ઘટાડો થઈ શકે છે, જેના કારણે ઠંડીનો અનુભવ વધવાની શક્યતા છે.

ત્રણ દિવસમાં મહત્તમ તાપમાન 2થી 3 ડિગ્રી ઘટશે

હવામાન વિભાગના જણાવ્યા અનુસાર, હાલમાં ગુજરાતમાં ઉત્તર-પૂર્વથી પૂર્વ દિશાના પવનો ફૂંકાઈ રહ્યા છે. હવામાનની આ સ્થિતિને પગલે આગામી ત્રણ દિવસ દરમિયાન રાજ્યના મહત્તમ તાપમાનમાં ધીમે ધીમે 2થી 3 ડિગ્રી સેલ્સિયસનો ઘટાડો થઈ શકે છે. જોકે, ત્યારબાદ તાપમાનમાં ફરી 2થી 3 ડિગ્રીનો વધારો થવાની સંભાવના છે. રાહતની વાત એ છે કે લઘુત્તમ તાપમાનમાં હાલ મોટા ફેરફારની શક્યતા વ્યક્ત કરવામાં આવી નથી.

ચક્રવાતી સિસ્ટમ અને પશ્ચિમી વિક્ષોભની અસર

હવામાન વિભાગના બુલેટિન મુજબ, અત્યંત તીવ્ર ચક્રવાતી વાવાઝોડા 'અર્નબ'ના અવશેષરૂપે સર્જાયેલું ડિપ્રેશન છત્તીસગઢ અને ઓડિશાના આસપાસના વિસ્તારોમાં સક્રિય હતું. 29 ઓક્ટોબરની સવારે આ સિસ્ટમ મધ્ય છત્તીસગઢ અને નજીકના ઓડિશા વિસ્તારમાં કેન્દ્રિત હતી. ત્યારબાદ તે ઉત્તર તરફ આગળ વધીને નબળી પડવાની અને ઉત્તર છત્તીસગઢ તથા ઉત્તર-પશ્ચિમ ઓડિશા આસપાસ નોંધપાત્ર લો-પ્રેશર વિસ્તારમાં ફેરવાવાની શક્યતા હતી. આ ઉપરાંત ઉત્તર પાકિસ્તાન અને આસપાસના વિસ્તારોમાં પશ્ચિમી વિક્ષોભની અસર પણ યથાવત્ છે. આ તમામ હવામાન પ્રણાલીઓ વચ્ચે ગુજરાતમાં પણ વાતાવરણમાં ફેરફાર જોવા મળી રહ્યો છે.

આજે આ જિલ્લાઓમાં વરસાદની આગાહી

હવામાન વિભાગની આગાહી પ્રમાણે આજે એટલે કે શુક્રવાર 30 ઓક્ટોબરે સૌરાષ્ટ્ર અને દક્ષિણ ગુજરાતના કેટલાક વિસ્તારોમાં ગાજવીજ સાથે હળવો વરસાદ પડી શકે છે. જેમાં ખાસ કરીને સૌરાષ્ટ્રમાં અમરેલી અને ભાવનગર, દક્ષિણ ગુજરાતમાં તાપી, ડાંગ, વલસાડ અને નવસારી, કેન્દ્રશાસિત પ્રદેશ: દમણ અને દાદરા-નગર હવેલીમાં છૂટાછવાયાં સ્થળોએ વરસાદની શક્યતા છે. જ્યારે રાજ્યના અન્ય વિસ્તારોમાં હવામાન મુખ્યત્વે શુષ્ક રહેવાની આગાહી કરવામાં આવી છે.

આ પણ વાંચો : આજથી બે દિવસ PM મોદી ગુજરાતને આંગણે, ₹750 કરોડની આંગણવાડીઓની ભેટ આપશે

31 ઓક્ટોબરે વરસાદનો વ્યાપ ઘટશે

શનિવાર 31 ઓક્ટોબરે વરસાદની શક્યતા ધરાવતા વિસ્તારોમાં ઘટાડો થઈ શકે છે. આ દિવસે અમરેલી, ભાવનગર, નવસારી અને વલસાડ જિલ્લામાં છૂટાછવાયાં સ્થળોએ ગાજવીજ સાથે હળવો વરસાદ પડી શકે છે. આ ઉપરાંત દમણ અને દાદરા-નગર હવેલીમાં પણ વરસાદની સંભાવના છે. જોકે, શુક્રવારની સરખામણીએ શનિવારે વરસાદનો વ્યાપ ઓછો રહેવાની શક્યતા હવામાન વિભાગે વ્યક્ત કરી છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ