- નબીરા તથ્ય પટેલનો વધુ એક અકસ્માતનો કેસ
- 31મી ડિસેમ્બર 2022ની મોડી રાત્રે અકસ્માત કર્યો હતો
- શીલજ રોડ પર જેગુઆર ગાડી થાંભલા પર ચઢાવી દીધી હતી
અમદાવાદમાં ચિત્તા ઝડપે જેગુઆર ચલાવી 9 ઝીંદગીને કચડી નાખનાર નબીરા તથ્ય પટેલનો વધુ એક અકસ્માતનો કેસ સામે આવ્યો છે. આરોપી તથ્યએ 31મી ડિસેમ્બર 2022ની મોડી રાત્રે અકસ્માત કર્યો હતો. જેમાં બેફામ સ્પીડે કાર ચલાવી શીલજ રોડ પર જેગુઆર ગાડી થાંભલા પર ચઢાવી દીધી હતી. અકસ્માત સમયે આરોપી તથ્ય પટેલની ગાડીમાં તેના મિત્રો પણ સવાર હોવાનું જાણવા મળી રહ્યું છે.
અકસ્માતમાં કોઇ જાનહાની થઈ ન હતી
તથ્ય પટેલે 9 જિંદગીને મોતને ઘાટ ઉતારી દીધા બાદ પોલીસ દ્વારા આરોપી સામે તપાસનો ધમધમાટ શરૂ કરાયો હતો. આ દરમિયાન ફાંટીને ધુમાડે ગયેલા તથ્યના એક પછી એક કરનારા ઉઘાડા પડી રહ્યા છે. ત્યારે પોલીસ તપાસમાં વધુ એક અકસ્માતનો બનાવ પણ સામે આવ્યો છે. પોલીસની તપાસ દરમિયાન જેગુઆર કંપનીમાં નો-ક્લેઇમ ઇન્શ્યોરન્સ તપાસમાં અકસ્માતની વિગતો આવી સામે હતી. માતેલા સાંઢની માફક દોડતી કારે ઓવરસ્પીડમાં અકસ્માત કર્યો હતો. જોકે આ દરમિયાન અકસ્માતમાં કોઇ જાનહાની થઈ ન હતી.
શું હતી સમગ્ર ઘટના ?
19 જુલાઈનાં રોજ શહેરના ઇસ્કોન બ્રિજ પર ડમ્પરની પાછળ મહેન્દ્રા થાર ઘૂસી જતા અકસ્માત સર્જાયો હતો. અકસ્માતને જોવા માટે મોટી સંખ્યામાં લોકો એકઠા થયા હતા. અકસ્માત બાદ પોલીસ તપાસ કરવા માટે બ્રિજ પર પહોંચી હતી. આ દરમિયાન કર્ણાવતી ક્લબ પાસે પૂર ઝડપે આવતી લક્ઝ્યૂરિયસ કારે અકસ્માત જોવા ઉભેલા લોકોને અડફેટે લીધા હતા. 160થી વધુની સ્પીડમાં આવેલા કાર ચાલકે ટોળા પર કાર ચડાવી દીધી હતી. આ ભયાનક અકસ્માતમાં 3 પોલીસ કોન્સ્ટેબલ સહિત 9 લોકોના મૃત્યુ નિપજ્યાં છે. જ્યારે આ અકસ્માતમાં 10થી વધુ લોકોને ઈજાઓ પહોંચી છે.ઈજાગ્રસ્તોને સારવાર અર્થે સોલા સિવીલ લઈ જવામાં આવ્યા છે. તથ્ય પટેલ નામના કાર ચાલકે અકસ્માત સર્જ્યો હોવાનું સામે આવ્યું છે. અકસ્માત સર્જનાર જગુઆર ચાલક પણ ઘાયલ થતા સિમ્સ હોસ્પિટલમાં ખસેડવામાં આવ્યો હતો.
