મનોરંજન / ''આ ઘટના 5 મહિના જૂની છે કે જ્યારે મારું એકાઉન્ટ હેક...'', અભિનેત્રીના આક્ષેપ પર કરણ જોષીનો મોટો ધડાકો

ગુજરાતી ફિલ્મ ઇન્ડસ્ટ્રીમાં છેલ્લા કેટલાક દિવસોથી અભિનેતા કરણ જોષી અને અભિનેત્રી નેહલ વડોલિયાને લઈને ભારે ચર્ચા ચાલી રહી છે. સમગ્ર મામલો સોશિયલ મીડિયા પર વાયરલ થયા બાદ અભિનેતા કરણ જોષીએ પોતાનું સ્પષ્ટીકરણ જાહેર કર્યું હતું. કરણ જોષીએ જણાવ્યું હતું કે આ ઘટના લગભગ પાંચ મહિના જૂની હતી અને જાન્યુઆરી મહિનામાં તેનું ઇન્સ્ટાગ્રામ એકાઉન્ટ હેક થયું હતું. તેણે કહ્યું હતું કે તે સમયે તેના મિત્રોને પણ અયોગ્ય મેસેજ મોકલાયા હતા અને ત્યારબાદ મિત્રોના માધ્યમથી જ તેને એકાઉન્ટ હેક થયાની જાણ થઈ હતી.

સોશિયલ મીડિયા પર શેર કર્યો વીડિયો

કરણ જોષીએ પોતાના સોશિયલ મીડિયા વીડિયોમાં જણાવ્યું છે કે, નેહલ વડોલિયાએ જે વીડિયો અને સ્ક્રીનશોટ શેર કર્યા હતા, તેના અંગે તે સમયે જ સ્પષ્ટતા કરવામાં આવી ગઈ હતી. તેમ છતાં હવે આ વીડિયોને અલગ રીતે રજૂ કરવામાં આવી રહ્યો હોવાનું તેણે કહ્યું હતું. કરણે વધુમાં ઉમેર્યું હતું કે સોશિયલ મીડિયાને કાયદો સમજીને ફાયદો ઉઠાવી રહ્યા હોય એવું લાગી રહ્યું છે. તેણે સ્પષ્ટ કહ્યું છે કે, દરેક સ્ત્રીનું સન્માન કરવું આપણા બધાના સંસ્કારનો ભાગ છે અને તે સત્ય પર વિશ્વાસ રાખે છે.

વિવાદ ક્યારે આવ્યો બહાર

સમગ્ર વિવાદ ત્યારે સામે આવ્યો હતો જ્યારે અભિનેત્રી નેહલ વડોલિયાએ સોશિયલ મીડિયા પર એક વીડિયો શેર કર્યો હતો. વીડિયોમાં તેણે દાવો કર્યો હતો કે કરણ જોષી દ્વારા ઇન્સ્ટાગ્રામ પર તેને વાંધાજનક અને અભદ્ર મેસેજ મોકલવામાં આવ્યા હતા. નેહલે કથિત ચેટના સ્ક્રીનશોટ પણ શેર કર્યા હતા અને પોતાની સાથે થયેલી વાતચીત અંગે ખુલાસો કર્યો હતો. તેણે એવો પણ આક્ષેપ કર્યો હતો કે સામે પક્ષ દ્વારા “એકાઉન્ટ હેક” થવાનું કારણ આપવામાં આવ્યું હતું.

View this post on Instagram

A post shared by Sambhaav Nascent LLP (@vtv_gujarati_news)

વીડિયો સોશિયલ મીડિયા પર વાયરલ

આ વીડિયો સોશિયલ મીડિયા પર ઝડપથી વાયરલ થયો હતો અને નેટીઝન્સમાં ભારે ચર્ચા શરૂ થઈ ગઈ હતી. ઘણા લોકોએ આવા વર્તન સામે રોષ વ્યક્ત કર્યો હતો, જ્યારે કેટલાક લોકોએ સત્ય બહાર આવવાની રાહ જોવાની વાત કરી હતી. જોકે થોડા સમય બાદ નેહલે આ વીડિયો પોતાના સોશિયલ મીડિયા એકાઉન્ટ પરથી ડિલીટ કરી દીધો હતો, પરંતુ ત્યાં સુધીમાં વીડિયો અને સ્ક્રીનશોટ અનેક પ્લેટફોર્મ પર ફેલાઈ ચૂક્યા હતા.

આ પણ વાંચો : 'લાલો'ના કરણ જોષી પર 'તારક મહેતા' ફેમ એક્ટ્રેસના ગંભીર આરોપ, હચમચાવતી Insta ચેટ વાયરલ

નેહલ વડોલિયા કોણ છે.

નેહલ વડોલિયા ટીવી અને OTT દુનિયાનું જાણીતું નામ માનવામાં આવે છે. તેણે લોકપ્રિય ટીવી શો ‘તારક મહેતા કા ઉલ્ટા ચશ્મા’માં નાની પરંતુ નોંધપાત્ર ભૂમિકા ભજવી હતી. આ ઉપરાંત તે અનેક વેબ સિરીઝ અને બોલ્ડ પ્રોજેક્ટ્સમાં પણ જોવા મળી ચૂકી છે. બીજી તરફ કરણ જોષી ગુજરાતી ફિલ્મ ઇન્ડસ્ટ્રીમાં ઉભરતો અભિનેતા માનવામાં આવે છે અને તાજેતરમાં ચર્ચાસ્પદ બનેલી ગુજરાતી ફિલ્મ ‘લાલો’ને કારણે ખાસ ચર્ચામાં રહ્યો હતો

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ