ગુજરાત / દ્વારકા જવાના હોય તો જાણી લેજો, આ જગ્યા પર લોકોની અવરજવર પર મુકાયો પ્રતિબંધ

દ્વારકા જિલ્લાની દરિયાઈ સીમામાં આવેલા કેટલાક નિર્જન ટાપુઓ હવે લોકોની અવરજવરથી દૂર રહેશે. દેશની સુરક્ષા અને દરિયાઈ સીમાની સંવેદનશીલતાને ધ્યાનમાં રાખીને જિલ્લા વહીવટી તંત્ર દ્વારા મહત્વપૂર્ણ જાહેરનામું પ્રસિદ્ધ કરવામાં આવ્યું છે. આ જાહેરનામા મુજબ દ્વારકા જિલ્લાના દરિયાઈ વિસ્તારમાં આવેલા 21 નિર્જન ટાપુઓ પર લોકોની અવરજવર પર પ્રતિબંધ મૂકવામાં આવ્યો છે. આ પ્રતિબંધ કોઈ ટૂંકા સમય માટે નહીં, પરંતુ 20 નવેમ્બર, 2026 સુધી અમલમાં રહેશે. એટલે કે આ સમયગાળા દરમિયાન સંબંધિત પરવાનગી વિના કોઈ વ્યક્તિ આ ટાપુઓ પર જઈ શકશે નહીં.

દ્વારકા જિલ્લો દરિયાકાંઠો ધરાવતો હોવાથી અહીં આવેલા ટાપુઓ સુરક્ષાની દૃષ્ટિએ મહત્વપૂર્ણ માનવામાં આવે છે. જિલ્લાના દરિયાઈ વિસ્તારમાં કુલ 24 ટાપુઓ આવેલા છે. જોકે, આ તમામ ટાપુઓ પર માનવ વસાહત નથી. મળતી માહિતી મુજબ કુલ 24 ટાપુઓમાંથી માત્ર 2 ટાપુઓ પર જ માનવ વસાહત છે, જ્યારે બાકીના ટાપુઓ નિર્જન છે. આ જ નિર્જન ટાપુઓમાંથી 21 ટાપુઓ પર લોકોની અવરજવર રોકવાનો નિર્ણય લેવામાં આવ્યો છે.

દેશની સુરક્ષાને ધ્યાનમાં રાખીને આ પ્રતિબંધ લાગુ

જાહેરનામામાં ખાસ કરીને દેશવિરોધી પ્રવૃત્તિઓને અટકાવવા અને દેશની સુરક્ષાને ધ્યાનમાં રાખીને આ પ્રતિબંધ લાગુ કરવામાં આવ્યો હોવાનું જણાવાયું છે. દરિયાઈ વિસ્તારમાં આવેલા નિર્જન ટાપુઓનો કોઈ પણ રીતે ગેરકાયદેસર ઉપયોગ ન થાય અને સુરક્ષા વ્યવસ્થામાં કોઈ ખામી ઊભી ન થાય તે માટે તંત્ર દ્વારા આ પગલું લેવામાં આવ્યું છે. દરિયાઈ સીમા સાથે જોડાયેલા વિસ્તારોમાં અનધિકૃત અવરજવર સુરક્ષાના દૃષ્ટિકોણથી ગંભીર બની શકે છે, તેથી તંત્ર દ્વારા આ અંગે સ્પષ્ટ નિયમો જાહેર કરવામાં આવ્યા છે.

એકસરખા નિયમો લાગુ કરવામાં આવ્યા નથી

જોકે, તમામ ટાપુઓ માટે એકસરખા નિયમો લાગુ કરવામાં આવ્યા નથી. 'નરારા ટાપુ'ને નિયમો અનુસાર લેખિત પરવાનગીમાંથી મુક્તિ આપવામાં આવી છે. એટલે નરારા ટાપુને લઈને જાહેરનામામાં અલગ જોગવાઈ રાખવામાં આવી છે. જ્યારે બાકીના પ્રતિબંધિત 21 નિર્જન ટાપુઓ પર નિર્ધારિત સમયગાળા દરમિયાન લોકોની અવરજવર પર પ્રતિબંધ રહેશે.

પ્રતિબંધનો સમયગાળો 20/11/2026 સુધી રહેશે

આ પ્રતિબંધનો સમયગાળો 20/11/2026 સુધી રહેશે. આ દરમિયાન જાહેરનામામાં કરવામાં આવેલી જોગવાઈઓનું પાલન કરવું ફરજિયાત રહેશે. ખાસ કરીને દરિયાઈ વિસ્તારમાં ફરવા, મુલાકાત લેવા અથવા અન્ય કોઈ હેતુસર ટાપુઓ પર જવાની ઇચ્છા ધરાવતા લોકોએ નિયમોનું ધ્યાન રાખવું પડશે. તંત્રની મંજૂરી વિના પ્રતિબંધિત ટાપુઓ પર પહોંચવાનો પ્રયાસ કરવામાં આવશે તો તેને જાહેરનામાનો ભંગ માનવામાં આવશે.

આ પણ વાંચો : CM ભૂપેન્દ્ર પટેલના હસ્તે ₹584 કરોડના વિકાસકાર્યોનું લોકાર્પણ, વાડજ ફ્લાયઓવર વાહનચાલકોને આપશે ટ્રાફિક રાહત

જિલ્લા તંત્રે સ્પષ્ટ કર્યું છે કે જાહેરનામાનો ભંગ કરનાર વ્યક્તિ વિરુદ્ધ કાયદેસરની કાર્યવાહી કરવામાં આવશે. એટલે પ્રતિબંધિત 21 ટાપુઓ પર અનધિકૃત રીતે અવરજવર કરવી ભારે પડી શકે છે. દેશની સુરક્ષા સાથે જોડાયેલા આ નિર્ણયને પગલે દરિયાઈ વિસ્તારમાં જતાં લોકો માટે પણ નિયમોની જાણકારી રાખવી જરૂરી બની છે. હાલ 21 નિર્જન ટાપુઓ પર લગાવવામાં આવેલો આ પ્રતિબંધ 20 નવેમ્બર સુધી અમલમાં રહેશે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ