સાવચેત / ‘વર્ક ફ્રોમ હોમ’ની લોભામણી ઓફરમાં ફસાંતા નહીં, પળવારમાં બેન્ક એકાઉન્ટ સાફ થઈ જશે, સાયબર ક્રાઈમે કરી અપીલ

• વોટ્સએપ પર ઈન્ટરનેશનલ નંબરથી કોલ કરી છેતરવાના કિસ્સામાં વધારો
• સાયબર ક્રાઈમ પોલીસે લોકોને એલર્ટ રહેવા અપીલ કરી
• લિંક પર ક્લિક કરતાં જ મોબાઈલનો કંટ્રોલ ઠગ ટોળકીના હાથમાં આવી જશે

કોરોનાકાળથી લઈને આજ દિન સુધી ઓનલાઈન ફ્રોડના કિસ્સામાં જોરદાર ઉછાળો જોવા મળ્યો છે. આજકાલ વોટ્સએપ પર ઈન્ટરનેશનલ નંબર પરથી ફોન કોલ કરીને છેતરવાના કિસ્સામાં ચિંતાજનક વધારો થતાં સાયબર ક્રાઈમ પોલીસે પણ લોકોને સતર્ક રહેવાની અપીલ કરવી પડી છે. આ વખતે ઠગ ટોળકીએ ગજબની મોડસ ઓપરેન્ડી શોધી કાઢી છે. ખાસ કરીને આવા ઈન્ટરનેશનલ નંબર પરથી કોલ આવે અને જવાબમાં તમે ફોન કે મેસેજ કરો તે સાથે જ તમને ‘વર્ક ફ્રોમ હોમ’ની લોભામણી ઓફર આપીને જાળમાં ફસાવવામાં આવે છે. સાયબર એક્સપર્ટનું કહેવું છે કે, આ શાતિર ઠગ ટોળકીએ મોકલેલી લિંક પર ક્લિક કરતા જ તમારા મોબાઈલનો ટોટલ કંટ્રોલ તેમના હાથમાં આવી જાય છે અને પળવારમાં જે તેઓ તમારું બેન્ક એકાઉન્ટ ખાલી કરી નાખે છે.
આવા કોઈ પણ નંબરથી ફોન આવે તે બ્લોક કરી દેજો
પહેલી નજરે કોઈને પણ ઈન્ટરનેશનલ સબસ્ક્રાઈબર ડાઈલિંગ (ISD) કોલ લાગતો આ ફોન કોલ હકીકતમાં તો આપણા દેશના જ કોઈ ખૂણેથી કરવામાં આવી રહ્યો છે. વોટ્સએપ પર આવા કોઈ પણ અજાણ્યા ઈન્ટરનેશનલ નંબર પરથી કોલ આવે તો તરત જ તેને બ્લોક કરી દેજો. જેટલા પણ લોકોએ આ ઠગ ટોળકી સાથે મેસેજ કે કોલથી વાત કરવાની કોશિશ કરી છે તેમને એડવર્ટાઈઝિંગ એજન્સીના નામે ટેલીગ્રામ અને યૂટ્યૂબ જેવી એપ્લિકેશનનો ઉપયોગ કરીને ઘર બેઠા મહિને રૂ.૧૨,૦૦૦થી લઈને રૂ.૨૦,૦૦૦ સુધીની કમાણી કરવાની લલચાવતી ઓફર કરવામાં આવે છે.
થોડીક જ વારમાં તમારૂ એકાઉન્ટ થઈ જશે સાફ
‘વર્ક ફ્રોમ હોમ’નો કોન્સેપ્ટ કોરોનાકાળ પછી ઘણો લોકપ્રિય બન્યો છે અને આથી તેનો લાભ ઉઠાવીને આ ટોળકી જોરદાર કમાણી કરવાની લાલચ આપે છે અને ‘શિકાર’ને એક લિંક મોકલી આપે છે. આ લિંક હકીકતમાં એક માલવેર હોય છે અને તેના પર ક્લિક કરતાની સાથે જ મોબાઈલનો સંપૂર્ણ કંટ્રોલ ઠગ લોકોના હાથમાં આવી જાય છે. તેઓ હજારો કિલોમીટર દૂર બેઠા બેઠા પણ જે તે વ્યક્તિનું બેન્ક એકાઉન્ટ ‘સાફ’ કરી નાખે છે.
જો   તમને વોટ્સએપ પર આંતરરાષ્ટ્રીય નંબર પરથી કોલ આવે છે તો ચેતી જજો. કેમ કે છેલ્લા કેટલાક મહિનામાં આવા ઇન્ટરનેશનલ નંબર પરથી કોલ્સના આવવાના કિસ્સા જોવા મળ્યા છે. ઇન્ટરનેશનલ નંબર પરથી કોલ્સ કરીને સ્કેમર્સ તમારી સાથે છેતરપિંડી કરવાનો ઠગબાજ ગેંગ સક્રિય થઇ છે. 
શું કાળજી રાખશો?
સાયબર એક્સપર્ટ સલાહ આપે છે કે, તમને સહેજ પણ શંકા જાય તેવા ઈન્ટરનેશનલ નંબર પરથી વોટ્સએપ કોલ આવે તો તરત તેનો રિપોર્ટ કરો અને આ નંબરને બ્લોક કરી દો. આવા કોઈ પણ અજાણ્યા નંબર પરથી આવતી કોઈ પણ લિંક પર ક્લિક કરશો નહીં અને જો ભૂલથી આવું કરી બેસો તો તરત જ પોલીસનો સંપર્ક કરો.