વડોદરા / આ જાહેરાતમાં ભરમાતા નહીં! સફાઈ સેવકની ભરતીનું ફેક ફોર્મ વાયરલ, અરજીના થક્કા લાગતાં વહીવટી ઓફિસરની ચોખવટ

• વડોદરામાં ફેક ભરતીના મેસેજથી સફાઇ સેવક બનવા દોડતા થયા લોકો
• જનસેવા કચેરીએ 300 અરજી સ્વીકાર્યા બાદ ખબર પડી કે ફેક ભરતી મેસેજ
• ભૂલનું ભાન થતાં અધિકારીએ બોર્ડ લગાવ્યું આવી કોઇ ભરતી નથી

આજનાં આધુનિક યુગમાં લોકો સોશિયલ મીડિયાનો વધુને વધુ ઉપયોગ કરી રહ્યા છે. તેમજ નોકરી વાંચ્છુક લોકો માટે પણ સોશિયલ મીડિયામાં અનેક ગ્રુપ હોય છે. ત્યારે આજે વડોદરા મ્યુનિસિપલ કોર્પોરેશનમાં સફાઈ સેવકની ભરતી માટેની ભરતીનો મેસેજ ફરતો થતા લોકો સફાઈ સેવક બનવા દોડતા થયા હતા. જે બાદ મહાનગર પાલિકાનાં જનસેવા કેન્દ્ર ખાતે લોકો ઉમટી પડ્યા હતા. 300 અરજી સ્વીકાર્યા બાદ ખબર પડી કે સફાઈ સેવકની આવી કોઈ જ ભરતી ન હોવાની જાણ થતા અરજદારોમાં રોષ ભભૂકી ઉઠ્યો હતો. તેમજ સોશિયલ મીડિયામાં ફરતો મેસેજ ફેક હોવાનું સામે આવ્યું હતું.  

અધિકારીનાં કહેવાથી અરજી સ્વીકારીઃ કર્મચારી (જનસેવા કચેરી)
વડોદરા મહાનગર પાલિકામાં સફાઈ સેવકની ભરતીનાં મેસેજને લઈ રોજગાર વાંચ્છુક હજારો લોકોએ સફાઈ સેવકની ભરતી માટે દોડ લગાવી હતી. હજારોની સંખ્યામાં લોકો નોકરી મેળવવા માટે વડોદરા મહાનગર પાલિકાનાં જનસેવા  કચેરી ખાતે ઉમટી પડ્યા હતા. જે બાદ જનસેવા કચેરી કર્મચારી દ્વારા કબૂલાત કરી હતી કે અધિકારીનાં કહેવાથી અરજી સ્વીકારી છે. 

નોકરી ઈચ્છતા સફાઈ સેવકોને કોણે ગેરમાર્ગે દોર્યા તે મોટો સવાલ
વડોદરા મહાનગર પાલિકામાં સફાઈ કર્મચારીની ભરતીનો ફેક મેસેજ ફરતો થયા બાદ હજારો લોકો મહાનગર પાલિકાનાં જનસેવા કેન્દ્ર ખાતે ઉમટી પડ્યા હતા. જે બાદ અધિકારીને તેઓની ભૂલનું ભાન થતા અધિકારીએ બોર્ડ લગાવ્યુ હતું કે આવી કોઈ ભરતી નથી. ત્યારે નોકરી ઈચ્છતા સફાઈ સેવકોને કોણે ગેરમાર્ગે દોર્યા તે સૌથી મોટો સવાલ છે.

કોર્પોરેશને આવી કોઈ જાહેરાત કે ફોર્મ બહાર પાડ્યા જ નથીઃ તરૂણ શાહ (વહીવટી ઓફિસર)
વડોદરા સફાઈ સેવકની ભરતી માટેનાં ફોર્મ મામલે વહીવટી ઓફીસર તરૂણ શાહે નિવેદન આપ્યું છે કે, આવી કોઈ ભરતી કોર્પોરેશને હાથ ધરી જ નથી. કોઈએ લોકોને ગેરમાર્ગે દોર્યા છે. તેમજ કોર્પોરેશને આવી કોઈ જાહેરાત કે ફોર્મ બહાર પાડ્યા જ નથી.  તેમજ અરજીનાં સ્વરૂપે લોકો આપી રહ્યા છે તે સુવિધા કેન્દ્રમાં સ્વીકારીએ છીએ. અત્યાર સુધીમાં 700 જેટલી અરજી આવી છે. આવી કોઈ પ્રક્રિયા જ નથી માટે સૂચનાઓ લખવામાં આવી છે. લોકોએ ગેરમાર્ગે ના દોરાવવું જોઈએ.