કાર્યવાહી / જામનગર જિલ્લા પંચાયતના રેકોર્ડ ગુમ થવા મામલે DDO એક્શનમાં, આપ્યા તપાસના આદેશ

 

• જિલ્લા પંચાયતના રેકોર્ડ ગુમ થવા મામલે કાર્યવાહી
• DDO વિકલ્પ ભારદ્વાજે આપ્યા તપાસના આદેશ
• ઈલેક્ટ્રીક શાખાની ઓફિસમાં રેકોર્ડ થયા હતા ગુમ

જામનગર જિલ્લા પંચાયતના રેકોર્ડ ગુમ થવા મામલે તપાસનો આદેશ આપવામાં આવ્યો છે. DDO વિકલ્પ ભારદ્વાજે ઈલેક્ટ્રીક શાખાની ઓફિસમાંથી રેકોર્ડ ગુમ થવા મામલે તપાસના આદેશ આપ્યા છે. મહત્વનું છે કે, જિલ્લા પંચાયતની ઓફિસથી આરોપી ટ્રેક્ટરની ટ્રોલી ભીરને 1 હજાર 582 ફાઈલ અને 220 રજિસ્ટર લઈ ગયા હતા. 

ટ્રેક્ટર ભરીને કોઈ ઉપાડી ગયું હતું અગત્યની ફાઈલો
જામનગરમાં જિલ્લા પંચાયતની કચેરી સીસીટીવી ઉપરાંત સિક્યોરિટીથી સુસજ્જ છે, છતાં રાત્રીના સમયે ટ્રેક્ટર ભરી અગત્યના દસ્તાવેજો કોઈક ઉપાડી ગયા હતા, સરકારી કચેરીમાં આ રીતે રેકર્ડ ગુમ થવાથી સિક્યોરિટી, અધિકારીઓ સહિતની મોટી બેદરકારી સામે આવી હતી. આજથી બે મહિના પહેલાં ટ્રેક્ટરમાં કોઇ શખ્સ ઇલેક્ટ્રીક વિભાગના રેકોર્ડ રૂમમાંથી સંખ્યાબંધ ફાઈલો ઉઠાવી ગયો હોવાનું સામે આવ્યું હતું. 

ફાઈલ મંગાવતા સમગ્ર ઘટના આવી હતી સામે
જિલ્લા પંચાયતમાં બાંધકામ વિભાગ હેઠળના ઈલેક્ટ્રીક વિભાગની રેકર્ડની ફાઈલ માટે એક અલગ રેકર્ડ રૂમ આવેલો છે, જેમાં વર્ષોથી તમામ સાહિત્ય અકબંધ રાખવામાં આવ્યું છે. જે રેકર્ડ રૂમમાંથી કોઈ પ્રકરણમાં નાયબ કાર્યપાલક ઇજનરે તાજેતરમાં કેટલીક ફાઈલો મંગાવી હતી, જે દરમિયાન રેકર્ડ રૂમમાં સંખ્યાબંધ ફાઈલો ગુમ થઈ ગઈ હોવાનું સામે આવ્યું હતું. જેથી સમગ્ર મામલો જિલ્લા વિકાસ અધિકારી સમક્ષ લઈ જવામાં આવ્યો હતો. આ વાત સાંભળી જિલ્લા વિકાસ અધિકારી વિકલ્પ ભારદ્વાજ પણ ચોંકી ગયા હતા અને તાત્કાલિક તપાસના આદેશ આપ્યા હતા અને આ મામલે સી.ટી.એ ડિવિઝન પોલીસ સ્ટેશનમાં ફરિયાદ દાખલ કરવાની પણ સૂચના આપી હતી.

નાયબ કાર્યપાલક ઈજનેરે નોંધાવી હતી ફરિયાદ
રેકોર્ડ ગુમ થયા બાદ સિટી એ-ડિવિઝન પોલીસમાં ફરિયાદ નોંધાઈ હતી. નાયબ કાર્યપાલક ઈજનેર જયવીરસિંહ દ્વારા ઈલેક્ટ્રીક શાખાના ઈન્ચાર્જ નાયબ કાર્યપાલ હરિસિંહ ગોહિલ સામે ફરિયાદ નોંધાઈ હતી.