ગુજરાત / સાયબર ઠગોને મદદ કરવા બેન્કમાં જ ઊભું કર્યું મ્યુલ એકાઉન્ટનું નેટવર્ક! મહિલા બેન્ક મેનેજર અને તેનો પતિ પોલીસની અટકાયતમાં

સાયબર ગુનેગારોને છેતરપિંડીથી મેળવેલી રકમની હેરફેર કરવામાં મદદ કરવા માટે સંગઠિત બેન્કિંગ નેટવર્ક ઊભું કર્યાની આશંકા વચ્ચે પોલીસે એક મહિલા બેન્ક મેનેજર અને તેના પતિની અટકાયત કરી છે. પ્રાથમિક તપાસમાં બંનેની ભૂમિકા શંકાસ્પદ જણાતાં પોલીસ તેમની પૂછપરછ કરી રહી છે. નિર્દોષ લોકો સાથે સાયબર છેતરપિંડી કરીને મેળવેલા નાણાંની હેરફેર માટે મ્યુલ બેન્ક એકાઉન્ટનો ઉપયોગ કરવામાં આવતો હોવાની આશંકા છે. આ કેસે બેન્કની અંદરથી જ સાયબર ઠગોને મદદ કરવામાં આવી હોવાની ગંભીર શક્યતા ઊભી કરી છે.

વરિષ્ઠ પોલીસ અધિકારીઓના જણાવ્યા અનુસાર રોકાણના નામે થયેલી છેતરપિંડીના એક કેસની તપાસ દરમિયાન પોલીસને મહત્ત્વની કડી મળી હતી. તપાસકર્તાઓએ નાણાંના વ્યવહારોની કડી શોધતાં અનેક બેન્ક ખાતાં સુધી પહોંચ્યા હતા. આશ્ચર્યજનક રીતે આ તમામ ખાતાં એક જ બેન્કનાં હોવાનું સામે આવ્યું હતું.

કડીને પગલે પોલીસનું ધ્યાન બેન્ક તરફ ગયું

આ તમામ ખાતાં કેવી રીતે ખોલાવવામાં આવ્યાં અને તેની પાછળ કોની ભૂમિકા હતી, તેની તપાસ કરતાં બેન્કિંગ વ્યવહારો વચ્ચેની સમાન કડીને પગલે પોલીસનું ધ્યાન બેન્ક તરફ ગયું હતું. ત્યાર બાદ તપાસકર્તાઓએ આ સમગ્ર નેટવર્કનો પર્દાફાશ કર્યો હતો.

નોકરી કરતી હતી ત્યાં ખાતાં ખોલાવવા માટે લલચાવતો

તપાસમાં સામે આવ્યું હતું કે બેન્ક મેનેજરનો પતિ લોકોને પોતાની પત્ની જે બેન્કમાં નોકરી કરતી હતી ત્યાં ખાતાં ખોલાવવા માટે લલચાવતો હતો. પોલીસે બંનેની અટકાયત કરી છે. આરોપ છે કે પતિ આ ખાતાં ખોલાવ્યા બાદ તેની બેન્કિંગ કિટ્સ એવા લોકોને આપતો હતો, જેઓ છેતરપિંડીથી મેળવેલા નાણાંની હેરફેર કરતા હતા.

ખાતાંઓમાં ટ્રાન્સફર કરવામાં આવતી

એક તપાસકર્તા અધિકારીએ જણાવ્યું કે આ મ્યુલ એકાઉન્ટ્સ મારફતે છેતરપિંડીથી મેળવેલી રકમ અન્ય બેન્ક ખાતાંઓમાં ટ્રાન્સફર કરવામાં આવતી હતી. આ કૌભાંડ અંગે બેન્કને જાણ કરવામાં આવી છે.

આ પણ વાંચો : PM મોદીના કાફલા પસાર થવાના રસ્તે 12 સ્ટ્રીટલાઈટ બંધ અને કેટલીક ઝબૂકતી મળી, ડભોઈ નગરપાલિકાના ક્લાર્કને 6 દિવસનું સસ્પેન્શન

તપાસકર્તાઓ હવે એ દિશામાં પણ તપાસ કરી રહ્યા છે કે મહિલા બેન્ક મેનેજરે પોતાના હોદ્દા અથવા બેન્કમાં મળતી આંતરિક સુવિધાઓનો દુરુપયોગ કરીને આ ખાતાં ખોલાવવામાં મદદ કરી હતી કે કેમ.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ