ક્રિકેટ / VIDEO: PM મોદી સાથે મુલાકાત કરવા દિલ્હી પહોંચી મહિલા ટીમ ઈન્ડિયા, થયું ભવ્ય સ્વાગત

Indian Women Cricket Team: વિશ્વ ચેમ્પિયન ભારતીય મહિલા ક્રિકેટ ટીમ દિલ્હી પહોચી છે. ટીમ બુધવારે વડા પ્રધાન નરેન્દ્ર મોદીને મળશે. ભારતે રવિવારે દક્ષિણ આફ્રિકાને હરાવીને આઇસીસી મહિલા વન ડે વર્લ્ડ કપ 2025 જીત્યો હતો.

હરમનપ્રીત કૌરની કપ્તાનીમાં વર્લ્ડ કપ વિજેતા ભારતીય મહિલા ક્રિકેટ ટીમ બુધવારે વડા પ્રધાન નરેન્દ્ર મોદીને મળવા મંગળવારે સાંજે દિલ્હી પહોંચી હતી. રવિવારે નવી મુંબઈમાં રમાયેલી ફાઇનલમાં દક્ષિણ આફ્રિકાને 52 રનથી હરાવીને ભારતે પ્રથમ વખત વર્લ્ડ કપ જીત્યો હતો. ટીમના સભ્યોનું એરપોર્ટ પર સ્વાગત કરવામાં આવ્યું હતું. દિલ્હીમાં તાજ પેલેસ હોટેલમાં પહોંચ્યા પછી ખેલાડીઓ અને સપોર્ટ સ્ટાફ પર ગુલાબની પાંખડી વરસાવી સ્વાગત કરાયું હતું.

દિલ્હીના ઇન્દિરા ગાંધી આંતરરાષ્ટ્રીય એરપોર્ટ પર ખાનગી અને ચાર્ટર્ડ વિમાનો માટે નિયુક્ત એવિએશન ટર્મિનલ (GA) પર ફક્ત પત્રકારોનું એક સમૂહ હાજર હતું, કારણ કે સુરક્ષા પ્રોટોકોલને કારણે સામાન્ય લોકોને પ્રવેશની મંજૂરી આપવામાં આવી ન હતી. સ્ટાર એરની ખાસ ચાર્ટર્ડ ફ્લાઇટ (S5 8328) દ્વારા ટીમ મુંબઈથી દિલ્હી આવી હતી.

ભારતીય ટીમ માટે મજબૂત સુરક્ષા પગલાં લેવામાં આવ્યા છે. પોલીસ કર્મચારીઓએ ટીમ બસ અને આસપાસના રૂટનું નિરીક્ષણ કર્યું હતું, વડા પ્રધાન નરેન્દ્ર મોદી વર્લ્ડ કપ વિજેતા ભારતીય મહિલા ટીમનું સન્માન કરશે. સમારોહ તેમના સત્તાવાર નિવાસસ્થાને યોજાશે. બુધવારે સાંજે વડા પ્રધાન મોદીને મળ્યા પછી તેઓ પોતપોતાના શહેરો માટે રવાના થશે. શેફાલી વર્મા પરત ફરશે તેને નાગાલેન્ડમાં ઇન્ટર-ઝોન ટી20 ટુર્નામેન્ટમાં ઉત્તર ઝોન ટીમની કમાન સંભાળવાની છે.

આ પણ વાંચોઃ મહિલા ટીમ ઈન્ડિયાને ચેમ્પિયન બનાવવામાં ગુજરાતી કોચનો સિંહફાળો, કોચિંગ એવું કે શીખવે તે ખેલાડી સો ટચનું સોનું

પીએમ મોદીએ અભિનંદન આપ્યા

વડા પ્રધાન મોદીએ રવિવારે સોશિયલ મીડિયા પર ભારતીય ટીમને અભિનંદન પાઠવ્યા હતા. 2 નવેમ્બરના ભારતીય ટીમે ફાઇનલમાં દક્ષિણ આફ્રિકાને 52 રનથી હરાવીને પ્રથમ વખત વર્લ્ડ કપ જીત્યો. ટીમ ઈન્ડિયાને આ ઐતિહાસિક વિજય બદલ અભિનંદન આપતા પ્રધાનમંત્રી નરેન્દ્ર મોદીએ લખ્યું, "મહિલા વર્લ્ડ કપ 2025 ની ફાઇનલમાં ભારતીય ટીમની શાનદાર જીત. ફાઇનલમાં ખેલાડીઓનું પ્રદર્શન કૌશલ્ય અને આત્મવિશ્વાસથી ભરેલું હતું. ટીમે અસાધારણ એકતા અને દૃઢ નિશ્ચય દર્શાવ્યો. અમારા બધા ખેલાડીઓને અભિનંદન. આ ઐતિહાસિક જીત આવનાર ચેમ્પિયનોને પ્રેરણા આપશે."

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ