ક્રિકેટ / "ઉંમર નહીં, જુસ્સો જુઓ..." આલોચકો પર વરસ્યા રોહિત શર્માના બાળપણના કોચ, 2027 વર્લ્ડ કપ અંગે કર્યો મોટો દાવો

Team India: રોહિત શર્માની ફિટનેસ અને ફોર્મ અંગે પ્રશ્નો ઉભા થઈ રહ્યા છે. 39 વર્ષીય ખેલાડી આઇપીએલ 2026 માં ઘણી મેચો ચૂકી ગયો હતો. હવે તેની અફઘાનિસ્તાન સામેની વન ડે શ્રેણીમાં રમવાની સંભાવના છે. રોહિત ટૂંક સમયમાં બીસીસીઆઇ સેન્ટર ઓફ એક્સેલન્સ પહોંચશે, જ્યાં તેનો ફિટનેસ ટેસ્ટ થશે.

ટીમ ઈન્ડિયાના પૂર્વ કેપ્ટન રોહિત શર્માની ફિટનેસ અને ભવિષ્યને લગતા પ્રશ્નો વચ્ચે તેના બાળપણના કોચ દિનેશ લાડે એક મહત્વપૂર્ણ નિવેદન આપ્યું છે. લાડ માને છે કે અનુભવી બેટ્સમેન રોહિત શર્માને કંઈપણ સાબિત કરવાની જરૂર નથી અને તે ચોક્કસપણે 2027 વન ડે વર્લ્ડ કપમાં રમશે. તેમણે ટીકાકારોને પણ જવાબ આપતા કહ્યું કે રોહિતે ફક્ત તેની રમતનો આનંદ માણવો જોઈએ અને બહારની વાત પર ધ્યાન આપવું ન જોઈએ.

તાજેતરના મહિનાઓમાં રોહિત શર્માની ફિટનેસ અને ફોર્મ અંગે પ્રશ્નો ઉભા થયા છે. ન્યુઝીલેન્ડ સામેની છેલ્લી વન ડે શ્રેણીમાં તેનું પ્રદર્શન અપેક્ષાઓ પર ખરું ઉતર્યું ન હતું, જેના કારણે ઘણા પૂર્વ ખેલાડીઓ અને નિષ્ણાતો તેના ભવિષ્યની ચર્ચા કરવા લાગ્યા. જોકે દિનેશ લાડ આ ટીકાઓ સાથે અસંમત છે.

એક સમાચાર એજન્સી સાથે વાત કરતા દિનેશ લાડે કહ્યું, "કોચ તરીકે મને નથી લાગતું કે રોહિત શર્માને કોઈને કંઈ સાબિત કરવાની જરૂર છે. તે 2027નો વનડે વર્લ્ડ કપ જીતવા માંગે છે અને તે લક્ષ્ય વિશે સંપૂર્ણપણે સ્પષ્ટ છે. તેની ઉંમર વિશે વાતો થઈ રહી છે, પરંતુ તે હજુ પણ સંપૂર્ણપણે ફિટ છે."

ટીકા કરવી લોકોનું કામ: લાડ

દિનેશ લાડે કહ્યું કે ભારતીય ટીમને મોટી ટુર્નામેન્ટમાં રોહિત શર્માના અનુભવની જરૂર પડશે. તેમણે કહ્યું કે રોહિતની ટેકનિકમા કોઇ કમી આવી નથી. 50 ઓવરના ક્રિકેટમાં તેની બેટિંગ શૈલી હજુ પણ ખૂબ અસરકારક છે. તેમણે કહ્યું, "ટીકા કરવી લોકોનું કામ છે, પરંતુ જો ભારત ફાઇનલમાં પહોંચવા માંગે છે, તો તેમને રોહિત જેવા ખેલાડીની જરૂર પડશે. તેની ટેકનિક શાનદાર છે. તે ઇનિંગ્સ કેવી રીતે સંભાળવી તે જાણે છે અને મોટા શોટ પણ રમી શકે છે." આઈપીએલમાં પણ તેણે ફક્ત ચોગ્ગા અને છગ્ગા જ નહીં, પણ જવાબદારીપૂર્વક બેટિંગ પણ કરી, સિંગલ્સ અને ડબલ્સ લીધા.

દિનેશ લાડ માને છે કે રોહિત શર્માનો ક્રિકેટ પ્રત્યેનો જુસ્સો અકબંધ છે, અને વર્લ્ડ કપ જીતવાની ઇચ્છા જ તેને આગળ ધપાવશે. તેમણે કહ્યું, "રોહિત જાણે છે કે જો તે રમવા માંગે છે, તો તેની પાછળ એક મજબૂત કારણ હોવું જોઈએ. તે ભારત માટે વન ડે વર્લ્ડ કપ જીતવા માંગે છે. મને વિશ્વાસ છે કે તે આ લક્ષ્ય પ્રાપ્ત કર્યા પછી જ તેના ભવિષ્ય વિશે નિર્ણય લેશે." કોચે એમ પણ કહ્યું કે ટેસ્ટ અને ટી20 ક્રિકેટથી દૂર રહેવાનો અર્થ એ નથી કે રોહિત આરામ કરી રહ્યો છે. તે સતત પ્રેક્ટિસ કરી રહ્યો છે અને તેની ફિટનેસ પર કામ કરી રહ્યો છે.

આ પણ વાંચોઃ સ્પોર્ટ્સ / સૂર્યકુમાર યાદવથી બેસ્ટ બેટ્સમેન તો મળી જશે! પરંતુ એવો કેપ્ટન...! જુઓ આંકડા

દિનેશ લાડે અંતમાં કહ્યું, "જ્યારે રોહિત ક્રીઝ પર સમય વિતાવે છે, ત્યારે તે વિશ્વના સૌથી ખતરનાક બેટ્સમેનોમાંના એકમાં પરિવર્તિત થાય છે. હું ઇચ્છું છું કે તે 2019 વર્લ્ડ કપમાં જે રીતે બેટિંગ કરતો હતો તેવી જ બેટિંગ કરે. તેની ટેકનિક, સ્વભાવ કે ફિટનેસમાં કોઈ સમસ્યા નથી. તે વર્લ્ડ કપ પહેલા સંપૂર્ણપણે તૈયાર રહેશે. તેણે ફક્ત તેની રમતનો આનંદ માણવો જોઈએ અને ટીકાઓ પર ધ્યાન ના આપવું જોઈએ."

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ