- GLS કોલેજ રેગિંગ મામલે વિવાદ વકર્યો
- રેગિંગ મામલે નિષ્પક્ષ તપાસની કરી માંગણી
- ABVPએ વિદ્યાર્થીનું રેગિંગ થયું ન હોવાનો કર્યો દાવો
અમદાવાદની GLS કોલેજમાં રેરિંગ મામલે વિવાદ વકર્યો છે. આ મામલે NSUIની વિધાર્થી પાંખ તેમજ વડગામ ધારાસભ્ય જીગ્નેશ મેવાણી નવરંગપુરા પોલીસ મથક પહોંચ્યા હતા જ્યાં પોલીસ સ્ટેશનમાં ડીસીપી ઝોન 1 ને મળી આવેદનપત્ર આપવામાં આવ્યું હતું. અને હલ્લાબોલ કરવામાં આવ્યો હતો.
રેગિંગ મામલે નિષ્પક્ષ તપાસની કરી માંગણી
જ્યારે ABVPની મહિલા કાર્યકરો પણ પોલીસ મથક પહોંચી હતી અને પોલીસ કમિશનરને આવેદનપત્ર આપી રજૂઆત કરી હતી કે રેગિંગ મામલે નિષ્પક્ષ તપાસ થવી જોઈએ જીગ્નેશ મેવાણીના દબાણને વશ થયા વગર તપાસ કરવામાં આવે. ABVPની મહિલા કાર્યકરોએ મેવાણી પર જાતિય રંગ આપવાનો આક્ષેપ કરતા કહ્યું કે મેવાણી રાજકીય સ્ટંટબાજી કરીને ફરિયાદ નોંધવાનું દબાણ કરી રહ્યા છે. મહિલાઓએ એમ પણ જણાવ્યું કે છેડતી કરનાર કોઈ પણ જાતિનો હોય તપાસ થવી જોઈએ
ABVPએ વિદ્યાર્થીનું રેગીંગ થયું ન હોવાનો કર્યો દાવો
બીજી તરફ સમગ્ર મામલે પોલીસ અધિકારીનું કહેવું છે કે, પીડિત યુવકની કોલેજમાંથી રેગિંગની કોઈ ફરિયાદ નથી આવી. યુવકની સામે એક યુવતીએ 323ની ફરિયાદ કરી હતી જે મુજબ તેની સામે કાર્યવાહી કરી છે. કોલેજ પાસેથી અમે રિપોર્ટ માગ્યો છે જેના આધારે આગળની કાર્યવાહી થશે. આપને જણાવી દઈએ કે અમદાવાદની GLS યુનિવર્સિટીમાં ABVP ના કાર્યકર્તાઓ દ્વારા રેગિંગ કરવાનો આક્ષેપ લગાવવામાં આવ્યો હતો. જેમાં વિદ્યાર્થીઓને ખેસ પહેરાવીને જય શ્રીરામ બોલવા મજબૂર કરવામાં આવ્યા હતા. આ સમગ્ર ઘટનાનો વીડિયો વાયરલ થતા વિવાદ સર્જાયો હતો જે બાદ વિવાદ વધુ વકર્યો છે.
GLS કોલેજમાં વિદ્યાર્થીનું ABVP એ રેગિંગ કર્યાનો છે આક્ષેપ
મહત્વનું છે કે અમદાવાદની GLS કોલેજ બહાર થયેલા કથિત રેગિંગકાંડ મુદ્દે નવરંગપુરા પોલીસ મથકે કોંગ્રેસના યુવા કાર્યકરોએ હોબાળો મચાવ્યો. જેમાં વડગામના ધારાસભ્ય જીગ્નેશ મેવણીએ પણ હલ્લાબોલ કરી હતી, જો કે કથિત રીતે રેગિંગ કરનાર આરોપી સામે જ ફરિયાદ નોંધાવાને બદલે ભોગ બનવાર યુવકને જ આરોપી બનાવી દેવામાં આવ્યો છે. આ મામલે જીજ્ઞેશ મેવાણીએ આરોપ લગાવ્યો કે, પોલીસે આરોપી વિરુદ્ધ એટ્રોસિટી એક્ટ મુજબ ફરિયાદ નોંધાવની જગ્યાએ ભોગ બનનારા યુવક વિરુદ્ધ જ ફરિયાદ નોંધી છે સાથે જ ચીમકી ઉચ્ચારી છે કે જો પોલીસ આરોપી વિરુદ્ધ ફરિયાદ નહીં નોંધે તો રસ્તા પર ઉતરીશું. જીગ્નેશ મેવાણી અને NSUI વિદ્યાર્થી પાંખ દ્વારા આવતીકાલે પોલીસ કમિશ્નરનાં ઘરે અથવા ઓફિસ પર આશ્ચર્યજનક કાર્યક્રમ યોજવામાં આવશે એવું જીગ્નેશ મેવાણી એ જાહેરમાં જણાવ્યું હતું. ઉલ્લેખનીય છે કે, વિદ્યાર્થીનાં રેગીંગનો આ મુદ્દો ધીરે ધીરે રાજકીય રંગ લઈ રહ્યો હોય તેવું લાગી રહ્યું છે.
