- PM મોદીના ગુજરાત પ્રવાસના સમયમાં ફેરફાર
- આજે રાત્રે 10 વાગે અમદાવાદ એરપોર્ટ પર આવશે PM મોદી
- આવતીકાલે નવી સરકારના શપથવિધિમાં હાજર રહેશે PM
ગુજરાત વિધાનસભાની ચૂંટણીમાં ભાજપે ઐતિહાસિક જીત મેળવી છે. ત્યારે આવતીકાલે ભૂપેન્દ્ર પટેલ અને તેમના મંત્રીઓનો શપથ ગ્રહણ સમારોહ યોજાવા જઈ રહ્યો છે. જેમાં વડાપ્રધાન નરેન્દ્ર મોદી, કેન્દ્રીય ગૃહમંત્રી અમિત શાહ સહિતના દિગ્ગજ નેતાઓ હાજર રહેશે. વડાપ્રધાન નરેન્દ્ર મોદીના ગુજરાત પ્રવાસના સમયમાં ફેરફાર થયો છે. તેઓ આજે ગોવાથી સીધા ગુજરાત પહોંચશે.
ગોવાથી સીધા ગુજરાત આવશે PM મોદી
વડાપ્રધાન મોદી આજે રાત્રે જ ગુજરાત આવશે. આજે રાત્રે 10 વાગ્યે PM મોદી અમદાવાદ એરપોર્ટ પર આવશે. જે બાદ આવતીકાલે બપોરે PM મોદી નવી સરકારની શપથવિધિમાં સામેલ થશે. ઉલ્લેખનીય છે કે, અગાઉ પ્રધાનમંત્રી સોમવારે ગુજરાતના પ્રવાસે આવાના હતા. આ દરમિયાન પ્રધાનમંત્રી મોદી અમદાવાદ એરપોર્ટથી શપથગ્રહણના સ્થળ સુધી રોડ-શૉ પણ કરવાના હતા. જોકે, હવે વડાપ્રધાન મોદી ગોવાથી સીધા આજે રાત્રે અમદાવાદ આવશે.
ભૂપેન્દ્ર પટેલના મંત્રી મંડળના 12 ડિસેમ્બરે શપથગ્રહણ
રાજ્યના મુખ્યમંત્રી તરીકે ભૂપેન્દ્ર પટેલ અને તેમના નવા મંત્રી મંડળ આગામી 12 ડિસેમ્બરે શપથ લેશે. તેઓ ગાંધીનગરમાં હેલિપેડ ગ્રાઉન્ડ ખાતે બપોરે 12-00 વાગ્યે શપથગ્રહણ કરશે. જોકે, અહી નોંધનીય બાબત એ છે કે, આવતીકાલે જ ભૂપેન્દ્ર પટેલ અને તેમના મંત્રીમંડળના તમામ સભ્યો સાથે જ શપથગ્રહણ કરશે.
ભાજપશાસિત રાજ્યોના મુખ્યમંત્રીઓને પણ અપાયું આમંત્રણ
આ શપથગ્રહણ સમારોહમાં વડાપ્રધાન નરેન્દ્ર મોદી અને કેન્દ્રીય ગૃહમંત્રી અમિત શાહ પણ હાજર રહેશે. પ્રદેશ ભાજપ દ્વારા પરસોત્તમ રૂપાલા, સ્મૃતિ ઇરાની, નીતિન ગડકરી, મનસુખ મંડવીયા સહિતના કેન્દ્રીય મંત્રીઓને આમંત્રણ આપવામાં આવ્યું છે. સાથે જ સમારોહમાં ભાજપશાસિત રાજ્યોના મુખ્યમંત્રીઓ નાયબ મુખ્યમંત્રીઓને પણ આમંત્રણ આપવામાં આવ્યું છે. નવી સરકારના શપથગ્રહણ સમારોહ માટે ઉત્તર પ્રદેશના મુખ્યમંત્રી યોગી આદિત્યનાથ, મહારાષ્ટ્રના મુખ્યમંત્રી એકનાથ શિંદે, નાયબ મુખ્યમંત્રી દેવેન્દ્ર ફડણવીશ, ગોવાના મુખ્યમંત્રી પ્રમોદ સાવંત, મધ્યપ્રદેશના મુખ્યમંત્રી શિવરાજસિંહ ચૌહાણ, હરિયાણાના મુખ્યમંત્રી મનોહરલાલ ખટ્ટર, ઉત્તરાખંડના મુખ્યમંત્રી પુષ્કરસિંહ ધામી અને કર્ણાટકના મુખ્યમંત્રી બસવરાજ બોમ્મઈને આમંત્રણ આપવામાં આવ્યું છે.
