- રેલવે કર્મચારીઓને સરકારની દિવાળી ભેટ
- 78 દિવસનુ પર્ફોમન્સ લિંક્ડ બોનસ મળશે
- કેન્દ્રીય કેબિનેટે લીધો નિર્ણય
- 11 લાખથી વધુ રેલવે કર્મચારીઓને થશે ફાયદો
રેલવેમાં કામ કરતા કર્મચારીઓ માટે સારા સમાચાર છે. કેન્દ્ર સરકારે તેમને 78 દિવસનુ પર્ફોમન્સ લિંક્ડ બોનસ આપવાનો નિર્ણય લીધો છે. મોદી કેબિનેટની આજે મળેલી બેઠકમા બોનસ સંબંધિત નિર્ણય લેવાયો હતો. જોકે રેલવે પોલીસને આ લાભથી વંચિત રાખવામાં આવી છે. મોદી સરકારના આ નિર્ણયથી 11 લાખથી વધુ રેલવે કર્મચારીઓને બોનસનો લાભ મળશે.
દરેક કર્મચારીને 17 હજાર રુપિયા સુધીનું બોનસ મળી શકે
રેલવે મંત્રાલયના જણાવ્યા પ્રમાણે રેલવે કર્મચારીઓને પ્રોત્સાહન રૂપે બોનસ આપવામાં આવી રહ્યું છે. સાથે જ આગામી તહેવારોને ધ્યાનમાં રાખીને આ નિર્ણય લેવામાં આવ્યો છે, જેથી રેલવે કર્મચારીઓ પોતાની કાર્યક્ષમતા વધારી શકે, સાથે જ આ નિર્ણયથી અર્થવ્યવસ્થામાં પણ વધારો થશે. એક અંદાજ મુજબ રેલવે કર્મચારીઓને 78 દિવસના બોનસ પાછળ લગભગ 1.83 કરોડ રૂપિયા ખર્ચ કરવામાં આવશે. એટલે કે દરેક કર્મચારીને લગભગ 17 હજાર રૂપિયા ચૂકવી શકાય છે.
લોકડાઉન દરમિયાન કર્મચારીઓએ મહત્વની ભૂમિકા ભજવી હતી
રેલવે મંત્રાલયે પોતાની રિલીઝમાં જણાવ્યું છે કે કોરોના મહામારી દરમિયાન ખોરાક, ખાતર, કોલસા જેવી આવશ્યક ચીજવસ્તુઓની હેરફેર સુનિશ્ચિત કરવામાં રેલવે કર્મચારીઓએ યોગદાન આપ્યું છે. આ સાથે જ રેલ દ્વારા માલ પરિવહન અને મુસાફરો પાસેથી ભાડું વસૂલવા જેવા ઘણા નીતિગત પગલાં લેવામાં આવ્યા છે, જેનો ફાયદો ખોટમાં ચાલી રહેલી રેલવેને મળ્યો છે. મંત્રાલયના જણાવ્યા અનુસાર, નાણાકીય વર્ષ 2021-22 દરમિયાન, ખોટમાં ચાલતી રેલ્વેએ તેના આર્થિક લક્ષ્યને પ્રાપ્ત કર્યું, જે કોરોના રોગચાળા દરમિયાન ડાઉન રહ્યું હતું. રેલ્વેએ જણાવ્યું હતું કે રોગચાળા દરમિયાન લગભગ 184 મિલિયન ટન નૂર પરિવહન કરવામાં આવ્યું હતું. મોદી સરકારે લીધેલા આ નિર્ણયથી રેલવે કર્મચારીઓ ખૂબ ખુશ છે. રેલવે પ્રધાન અશ્વિની વૈષ્ણવે બોનસને મંજૂરી આપવા બદલ વડા પ્રધાનનો આભાર માન્યો. તેમણે ટ્વિટ કરીને કહ્યું કે, મહામારી દરમિયાન રેલવે કર્મચારીઓએ મહત્વની ભૂમિકા નિભાવી છે, જેના કારણે અર્થવ્યવસ્થા મજબૂત થઈ છે.
