ઉજવણી / VIDEO : ‘જય રણછોડ માખણચોર’ના નાદ સાથે કૃષ્ણ જન્મના વધામણા, ભક્તિના રંગે રંગાયું ગુજરાત

સમગ્ર ગુજરાતમાં જન્માષ્ટમીનો પવિત્ર તહેવાર ખૂબ જ શ્રદ્ધા અને ઉલ્લાસ સાથે ઉજવવામાં આવ્યો. મંદિરો અને ઘરોમાં વિશેષ પૂજા-અર્ચના, ભજન-કિર્તન અને સાંસ્કૃતિક કાર્યક્રમોનું આયોજન કરવામાં આવ્યું હતું. વહેલી સવારથી જ મંદિરોમાં ભક્તોની ભીડ જોવા મળી હતી. આ વખતે જન્માષ્ટમી રવિવારે આવતા લોકોનો ઉત્સાહ બેવડાયો હતો. રાજ્યના મોટા મંદિરો જેવા કે અમદાવાદના ઇસ્કોન મંદિર, જગન્નાથ મંદિર અને દ્વારકાના જગત મંદિર સહિતના ધામોમાં રોશની અને ફૂલોથી શણગાર કરવામાં આવ્યો હતો. મધ્યરાત્રિએ કૃષ્ણ જન્મના સમયે ભક્તો 'નંદ ઘેર આનંદ ભયો, જય કનૈયા લાલ કી'ના નારા લગાવતા જોવા મળ્યા હતા.

દ્વારકામાં શ્રદ્ધાળુઓનું ઘોડાપૂર

શ્રીકૃષ્ણના જન્મસ્થળ મથુરા પછી તેમનું પૌરાણિક નિવાસસ્થાન દ્વારકા, જન્માષ્ટમીના તહેવારનું કેન્દ્ર રહ્યું. આ વર્ષે પણ દ્વારકામાં ભક્તોનું ઘોડાપૂર ઉમટ્યું હતું. દ્વારકાધીશના જગત મંદિરને ભવ્ય રીતે શણગારવામાં આવ્યું હતું. મંદિરના પરિસરમાં ફૂલો, રોશની અને વિવિધ ધજાઓથી સજાવટ કરવામાં આવી હતી. આ અવસર પર દ્વારકામાં લોકમેળો પણ ભરાયો હતો. લોકો પરંપરાગત પોશાકોમાં સજીધજીને લોકનૃત્ય અને ભજન-કિર્તનમાં જોડાયા હતા. મધ્યરાત્રિએ કૃષ્ણના જન્મની ઉજવણી માટે લાખો ભક્તો મંદિરમાં અને તેની આસપાસ એકઠા થયા હતા. આ સમયે સમગ્ર વાતાવરણ શંખનાદ અને જયઘોષથી ગુંજી ઉઠ્યું હતું.

વધુ વાંચો : ખેતરો પાણીમાં ડૂબશે, નદી-નાળા છલકાશે, અંબાલાલની ખેડૂતોને ચેતવતી આગાહી

ગુજરાતમાં આનંદની લહેર

જન્માષ્ટમીની ઉજવણી માત્ર મંદિરો સુધી સીમિત ન રહેતા સમગ્ર રાજ્યમાં ફેલાઈ હતી. ઘણા શહેરો અને ગામડાઓમાં મટકી ફોડના કાર્યક્રમોનું આયોજન કરવામાં આવ્યું હતું, જેમાં યુવાનોએ ઉત્સાહભેર ભાગ લીધો હતો. આ પ્રસંગે બાળકોને કૃષ્ણ અને રાધાના પોશાકો પહેરાવીને શણગારવામાં આવ્યા હતા. પરિવારોમાં પારણામાં કૃષ્ણની મૂર્તિને ઝૂલાવીને વિશેષ પૂજા કરવામાં આવી હતી. આ તહેવાર માત્ર ધાર્મિક ઉજવણી જ નહિ, પણ સામાજિક સદભાવ અને એકતાનું પ્રતીક પણ બન્યો છે. જન્માષ્ટમીની આ ઉજવણીએ લોકોને એકસાથે લાવીને હર્ષ અને ઉલ્લાસનું વાતાવરણ સર્જ્યું હતું.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ