કામની વાત / PAN કાર્ડને આધાર સાથે લિંક કરવાનો વધુ એક મોકો, 31 મે સુધી લિંક નહીં કરો તો થશે નુકસાન

શું તમે PAN કાર્ડ હજુ સુધી તમારા આધાર કાર્ડ સાથે લિંક નથી કરાવ્યુ? તો તમારે ટેન્શન લેવાની જરુર નથી. એવા લોકો માટે એક રાહતની ખબર સામે આવી છે. ઈન્કમ ટેક્સ અને CBDT એટલે કે સેન્ટ્રલ બોર્ડ ઓફ ડાયરેક્ટ ટેક્સ વિભાગે એક રાહત જાહેર કરીને 31 મે 2024 સુધી પોતાનું પાન કાર્ડ આધાર કાર્ડ સાથે લિંક કરવાનો સમય આપ્યો છે. જો તમે 31 મે સુધી PAN કાર્ડને તમારા આધાર સાથે લિંક કરાવી દો છો તો TDSના કપાત પર કોઈ કાર્યવાહી નહીં કરવામાં આવે. ઈન્કમ ટેક્સનો નિયમ છે કે, જો PAN કાર્ડને આધારથી નથી લિંક કરતા તો TDS બમણો કાપવામાં આવશે.

ટેક્સ પેયર્સ પાસેથી અનેક ફરિયાદો મળી

સેન્ટ્રલ બોર્ડ ઓફ ડાયરેક્ટ ટેક્સ વિભાગે એક પરિપત્રમાં જણાવ્યુ કે, ટેક્સ પેયર્સ પાસેથી અનેક ફરિયાદો મળી છે જેમાં તેમને નોટિસો મળી હતી. નોટિસમાં કહેવાયુ છે કે, જ્યાં PAN કાર્ડ ડિએક્ટિવ હતા તેવી લેવડ-દેવડ વખતે TDS/TCSનું ઓછુ ડિડક્શન, કલેકશનની ચૂક થઈ છે. કપાત અને કલેકશન હાઈએસ્ટ દરના નથી કરવામાં આવ્યા જેથી વિભાગે TDS/TCSના ડિટેઈલ્સની પ્રોસેસિંગ વખતે ટેક્સની માગ કરી છે.

TDSની કપાત પર કોઈ કાર્યવાહી નહીં કરવામાં આવે

આ સંબંધે આવેલી ફરિયાદોના સમાધાન માટે સેન્ટ્રલ બોર્ડ ઓફ ડાયરેક્ટ ટેક્સ વિભાગે રાહત આપતા જણાવ્યુુ કે, 31 માર્ચ 2024 સુધી કરવામાં આવેલી લેવડ-દેવડના સંબંધમાં જો 31 મે 2024 સુધી PAN કાર્ડ આધાર સાથે લિંક કરી એક્ટિવ થઈ જાય છે તો TDSની કપાત પર કોઈ કાર્યવાહી નહીં કરવામાં આવે.

વધુ વાંચો: ફરી સોનાએ મારી છલાંગ! આટલા રૂપિયા વધી ગયા ભાવ, જાણો કેવી રહેશે ચાલ

ઉલ્લેખનીય છે કે, લોકસભામાં સરકારે લેખિતમાં જવાબ આપ્યો હતો કે, જુલાઈ 2023થી જાન્યુઆરી 2024 સુધી PAN કાર્ડને આધાર સાથે નહીં જોડવાની બાબતે 601.97 કરોડ રુપિયા દંડ વસુલવામાં આવ્યો છે. 29 જાન્યુઆરી 2024 સુધી 11.48 કરોડ PAN કાર્ડ આધાર સાથે લિંક નથી થયા.

VTV Gujarati Newsની તમામ અપડેટ સૌથી પહેલા મેળ​વ​વા માટે અમારી WhatsApp ચેનલ ફોલો કરો