કાર્યવાહી / ડૉન અબ્દુલ લતીફના શાર્પ શૂટર તસ્લીમને અમદાવાદ પોલીસે દબોચ્યો, દાઉદ સાથે કનેક્શન, સાંસદની કરી હતી હત્યા

Ahmedabad Mohammad Taslim : ગુજરાતના અપરાધિક ઇતિહાસ સાથે જોડાયેલા એક મહત્વપૂર્ણ કેસમાં પોલીસને મોટી સફળતા મળી છે. અમદાવાદ ક્રાઈમ બ્રાન્ચે લાંબા સમયથી ફરાર રહેલા મોહમ્મદ તસ્લીમ ઉર્ફે તસ્લીમ ઉમર શેખને રાજસ્થાનમાંથી ઝડપી પાડ્યો છે. વાસ્તવમાં તસ્લીમનું નામ 1990ના દાયકાના ચર્ચિત ગેંગવોર અને હત્યાકાંડ સાથે જોડાયેલું રહ્યું છે અને તે અબ્દુલ લતીફ ગેંગનો નજીકનો સાથી અને શાર્પશૂટર માનવામાં આવતો હતો.

પોલીસ માહિતી મુજબ તસ્લીમ 2019માં પેરોલ પર બહાર આવ્યા બાદ પરત જેલમાં હાજર થયો ન હતો અને ત્યારબાદ સતત પોતાની ઓળખ અને રહેઠાણ બદલતો રહ્યો હતો. લાંબા સમયથી શોધખોળ ચાલી રહી હતી અને અંતે સંયુક્ત ઓપરેશન દરમિયાન તેની ધરપકડ કરવામાં આવી.

તસ્લીમ કોણ છે? અબ્દુલ લતીફ ગેંગનો વિશ્વાસુ શૂટર

આ કેસની ચર્ચા ફરી એટલા માટે પણ તેજ બની છે કારણ કે, તસ્લીમનું નામ 1992ના રાધિકા જીમખાના હત્યાકાંડ સાથે જોડાયેલું છે. અમદાવાદના ઓઢવ વિસ્તારમાં બનેલી આ ઘટના તે સમયના સૌથી ચર્ચિત ગેંગ હુમલાઓમાં સામેલ હતી. ગેંગ વચ્ચેના સંઘર્ષમાં થયેલા ગોળીબારથી અનેક લોકોના જીવ ગયા હતા અને સમગ્ર રાજ્યમાં ભારે ચકચાર મચી હતી. આ ઘટના પછી ગુજરાતમાં સંગઠિત ગુનાખોરી અને ગેંગ પ્રવૃત્તિઓને લઈને ગંભીર ચર્ચાઓ શરૂ થઈ હતી. તસ્લીમનું નામ માત્ર આ કેસ પૂરતું મર્યાદિત નહોતું. ભૂતપૂર્વ રાજ્યસભા સાંસદ રૌફ વલીઉલ્લાહ હત્યા કેસમાં પણ તેનું નામ સામે આવ્યું હતું. તે સમયગાળા દરમિયાન ગુજરાતમાં ગેરકાયદેસર નેટવર્ક, ગેંગ પ્રભાવ અને અપરાધિક ગતિવિધિઓ અંગે અનેક પ્રશ્નો ઊભા થયા હતા.

રાધિકા જીમખાના મર્ડર કેસ શું છે?

અમદાવાદના ઓઢવ વિસ્તારમાં આવેલું રાધિકા જીમખાના તે સમયના ગેરકાયદેસર જુગાર અને દારૂના અડ્ડા તરીકે ઓળખાતું હતું. 3 ઓગસ્ટ, 1992ના રોજ અહીં ગુજરાતના અંડરવર્લ્ડ ઇતિહાસની સૌથી ચર્ચાસ્પદ અને ભયાનક ગેંગ વોરની ઘટના બની હતી. અબ્દુલ લતીફ ગેંગે અહીં આડેધડ ગોળીબાર કર્યો હતો. પોલીસ તપાસ મુજબ આ હુમલાનું મુખ્ય નિશાન હરીફ બુટલેગર હંસરાજ ત્રિવેદી હતો, જે લતીફના નેટવર્કમાંથી દારૂ લેવા તૈયાર નહોતો. હુમલાખોરો ભારે હથિયારો સાથે આવ્યા હતા અને અંધાધૂંધ ફાયરિંગ કર્યું હતું. આ હુમલામાં નવ લોકોના મોત થયા હતા જ્યારે અનેક લોકો ગંભીર રીતે ઘાયલ થયા હતા. ગુજરાતમાં AK શ્રેણીના હથિયારોનો ગેંગ વોરમાં પ્રથમ વખત થયેલો ઉપયોગ ગણાતો આ હુમલો સમગ્ર રાજ્ય માટે ચોંકાવનારો સાબિત થયો હતો. બાદમાં આ કેસ હેઠળ ટાડા કાયદા મુજબ કાર્યવાહી હાથ ધરાઈ હતી અને વર્ષો બાદ અનેક આરોપીઓને આજીવન કેદની સજા ફટકારવામાં આવી હતી.

રૌફ વલીઉલ્લાહ હત્યા કેસ: રાજકીય અને અંડરવર્લ્ડ જોડાણની ચર્ચાઓ

રાધિકા જીમખાના ઘટનાના થોડા સમય બાદ ઓક્ટોબર 1992માં પૂર્વ રાજ્યસભા સાંસદ રૌફ વલીઉલ્લાહની અમદાવાદના પાલડી વિસ્તારમાં ગોળી મારીને હત્યા કરવામાં આવી હતી. તે સમયની તપાસ અને કોર્ટ પ્રક્રિયામાં એવો દાવો સામે આવ્યો હતો કે તેઓ કેટલાક સંવેદનશીલ મુદ્દાઓ અને સંભવિત સાંઠગાંઠ અંગે અવાજ ઉઠાવી રહ્યા હતા. આ કેસમાં પણ અબ્દુલ લતીફ ગેંગનું નામ ચર્ચામાં આવ્યું હતું.

2019 થી ફરાર: પેરોલ જમ્પ અને નવી ઓળખ

આજીવન કેદ ભોગવી રહેલા તસ્લીમને વર્ષ 2019 દરમિયાન કામચલાઉ પેરોલ પર મુક્તિ આપવામાં આવી હતી. પરંતુ પેરોલ પૂર્ણ થયા બાદ તે જેલમાં પરત ફર્યો નહોતો અને ફરાર જાહેર થયો હતો. પોલીસના જણાવ્યા મુજબ તે પોતાની ઓળખ, રહેવાનું સ્થળ અને સંપર્કની રીતો સતત બદલતો રહ્યો હતો જેથી તપાસ એજન્સીઓને ચકમો આપી શકે. વર્ષો સુધી તેની શોધખોળ બાદ મળેલી ગુપ્ત માહિતીના આધારે અમદાવાદ ક્રાઈમ બ્રાન્ચે રાજસ્થાનમાં ઓપરેશન હાથ ધરી તેની ધરપકડ કરી હોવાનું સામે આવ્યું છે. હવે તેની સામે આગળની કાનૂની કાર્યવાહી અને જેલ ટ્રાન્સફરની પ્રક્રિયા આગળ વધી રહી છે.

આ પણ વાંચો : ખેડૂતોના સમર્થનમાં હકાભા ગઢવીએ કર્યો લોકડાયરો, અમરણાંત ઉપવાસને ચાર દિવસ પૂર્ણ

1990ના દાયકાનું ગુજરાત અંડરવર્લ્ડ: લતીફનું વધતું સામ્રાજ્ય

1990ના દાયકામાં ગુજરાતમાં ગેરકાયદેસર દારૂના વેપાર અને ગેંગ નેટવર્કનો મોટો પ્રભાવ જોવા મળ્યો હતો. અબ્દુલ લતીફે નાના સ્તરેથી શરૂઆત કરીને પોતાનું ગેરકાયદેસર સામ્રાજ્ય ઉભું કર્યું હતું. બાદના વર્ષોમાં તેનું નામ દેશના મોટા અપરાધિક નેટવર્ક અને મુંબઈ અંડરવર્લ્ડ સાથે પણ જોડાયું હતું. 1995માં તેની ધરપકડ થઈ હતી અને 1997માં પોલીસ એન્કાઉન્ટરમાં તેનો અંત આવ્યો હતો. તસ્લીમની ધરપકડ માત્ર એક ફરાર આરોપીની ધરપકડ તરીકે નહીં પરંતુ લાંબા સમયથી પેન્ડિંગ રહેલી કાયદાકીય પ્રક્રિયામાં એક મહત્વપૂર્ણ પગલું તરીકે જોવામાં આવી રહી છે. સાથે જ આ ઘટના એ પણ યાદ અપાવે છે કે વર્ષો જૂના કેસોમાં પણ તપાસ એજન્સીઓ કાર્યવાહી ચાલુ રાખે છે અને કાયદાકીય પ્રક્રિયા આગળ વધતી રહે છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ