- ભાજપ યુવા પ્રમુખ પર હુમલાની ઘટના CCTVમાં કેદ
- હુમલો કરવા સાથે આરોપીએ ધમકી પણ આપી
- હુમલાની ઘટનાને હાર્દિક રામાણીએ પોલીસમાં કરી ફરિયાદ
- પોલીસે CCTVના આધારે આગળની કાર્યવાહી હાથધરી
રાજકોટના ભાયાદવરના ભાજપ યુવા પ્રમુખ હાર્દિક રામાણી પર હુમલાની ઘટના સામે આવતા ચકચાર મચી ગઈ છે. વાત જાણે એમ છે કે, હાર્દિક રામાણીએ ACનો હપ્તો ન ભરાતા 8 લોકોએ તેમના પર હુમલો કર્યો હતો. આ તરફ આ સમગ્ર હુમલાની ઘટના CCTV કેમેરામાં કેદ થઈ છે. જેને લઈ હાર્દિક રામાણીએ પોલીસ ફરિયાદ નોંધાવી છે.
રાજકોટ જિલ્લાના ભાયાદવરના ભાજપ યુવા પ્રમુખ હાર્દિક રામાણી પર AC નો હપ્તો નહિ ભરવા બાબતે હુમલો થયો છે. હાર્દિક રામાણીએ જણાવ્યું હતું કે, મારે ભાયાવદરમા બાલાજી ટેલિકોમ નામની મોબાઈલની જુના બસ સ્ટેન્ડ ચોક પાસે દુકાન છે. જ્યાં હું બજાજ ફાઈનાન્સના હપ્તા પર મોબાઈલની લે-વેચ કરૂ છુ. ગત તા 17.05.2023ના રોજ સાંજના 08.30 વાગ્યાની આસપાસ હું મારી દુકાનની સામેની બાજુથી ચાલીને મારી દુકાન તરફ આવતો હતો. આ દરમ્યાન અચાનક કેટલાક લોકોએ મારી પર હુમલો કર્યો હતો.
અચાનક બાઇક પર આવેલા ઇસમો હાર્દિક પર તૂટી પડ્યા
હાર્દિક રામાણીના કહેવા મુજબ અચાનક 4 મોટરસાયકલ ડબલ સવારીમાં આવેલ અને જેમા પ્રથમ બે જણા કલ્પેશ બારોટ તથા મયંક વાડોદરીયા હતા. તેઓ બને મને પકડી ગાળાગાળી કરી માર માર્યો હતો. જે બાદમાં પ્રકાશ ઉર્ફે કારો જોગલ તથા તેની સાથેના 5 અજાણ્યા માણસો આવેલ અને મને પકડીને માર મારવા લાગ્યા હતા. આ દરમ્યાન મારો ભાઈ અને સ્થાનિકોએ વચ્ચે પડી મને બચાવ્યો હતો. આ બધા લોકો ભેગા મળી બજાજ ફાઈનાન્સનો A.C.નો હપ્તો 2400નો ભરવાનો બાકી હોય હાર્દિકને માર મારી હપ્તો નહીં ભરે તો જાનથી મારી નાખવાની ધમકી આપી હતી.
સારવાર બાદ નોંધાવી ફરિયાદ
આ તરફ હુમલાની ઘટનામાં ઇજાગ્રસ્ત બનેલ હાર્દિક રામાણીને ભાયાવદર સરકારી દવાખાને ખસેડવામાં આવ્યા હતા. આ તરફ હાર્દિકે સારવાર બાદ તમામ ઇસમો સામે ભાયાવદર પોલીસ મથકે ફરિયાદ નોંધાવી છે. જેને લઈ ભાયાવદર પોલીસે CCTV અને હાર્દિકની ફરિયાદને આધારે આ મામલે વધુ તપાસ શરૂ કરી છે.
