બંગાળ / પુરુષોની સેક્સ ડ્રાઈવ ઓછી કરે છે બિરિયાની: પૂર્વ મંત્રીએ કેમ બંધ કરાવી દુકાનો ?

• તૃણમૂલ કોંગ્રેસના નેતાએ કૂચ બિહારમાં બિરયાનીની દુકાનો બંધ કરાવી 
• બિરયાનીના મસાલાને કારણે પુરૂષોની સેક્સ્યુઅલ ડ્રાઈવ ઘટી રહી: પૂર્વ મંત્રી 
• ફરિયાદો પછી જાણવા મળ્યું કે દુકાનો પાસે ટ્રેડ લાઇસન્સ નથી, તેથી દુકાનો બંધ કરવામાં આવી: પૂર્વ મંત્રી 

નોન-વેજ બિરયાની સાથે દેશમાં ઘણી બધી વેજ બિરયાની છે. જોકે તૃણમૂલ કોંગ્રેસના નેતા અને પૂર્વ રાજ્ય મંત્રી રવિન્દ્ર નાથ ઘોષે પશ્ચિમ બંગાળના કૂચ બિહારમાં બે સ્થાનિક બિરયાનીની દુકાનો બંધ કરાવી દીધી છે. વાત જાણે એમ છે કે, ટીએમસી નેતાએ આરોપ લગાવ્યો કે, બિરયાનીમાં પડતા મસાલાને કારણે પુરૂષોની સેક્સ્યુઅલ ડ્રાઈવ ઘટી રહી છે.

મમતા બેનર્જીની સરકારના મંત્રી રવીન્દ્ર નાથ ઘોષે જણાવ્યું હતું કે, ઘણા લોકો તરફથી એવા આક્ષેપો થયા છે કે, બિરયાની બનાવવા માટે વપરાતા ઘટકો અને મસાલાએ પુરૂષોની સેક્સ ડ્રાઇવમાં ઘટાડો કર્યો છે. ઘોષે કહ્યું કે, છેલ્લા ઘણા દિવસોથી વિસ્તારના લોકો તરફથી એવી ફરિયાદો આવી રહી છે કે, તેઓ જાણતા નથી કે બિરયાની બનાવવા માટે કયા મસાલાનો ઉપયોગ કરવામાં આવે છે, જે પુરુષોની જાતીય ઇચ્છાને અવરોધે છે.

આ સાથે કૂચ બિહાર નગરપાલિકા પ્રમુખે આરોપ લગાવ્યો કે, બિહાર અને ઉત્તર પ્રદેશ જેવા રાજ્યોના લોકો આ વિસ્તારમાં બિરયાની વેચતા હતા અને દુકાનો લાયસન્સ વિના ચાલી રહી હતી. તેમણે કહ્યું કે, તમામ ફરિયાદો પછી અમે અહીં આવ્યા અને જાણવા મળ્યું કે દુકાનો પાસે ટ્રેડ લાઇસન્સ નથી, તેથી દુકાનો બંધ કરવામાં આવી હતી.

મહત્વનું છે કે, બિરયાની સૌપ્રથમ ભારતીય ઉપખંડમાં મુસ્લિમો દ્વારા બનાવવામાં આવી હતી. તે ચોખા, ભારતીય મસાલા અને સામાન્ય રીતે માંસ સાથે તૈયાર કરવામાં આવે છે. જોકે તે ક્યારેક કોઈ માંસ વિના પણ રાંધવામાં આવે છે. તેમજ ક્યારેક બિરયાનીમાં ઈંડા અને બટાકાનો ઉપયોગ કરી શકાય છે.