ટ્રાવેલ / ઓક્ટોબર મહિનામાં સોલો ટ્રીપ પ્લાન કરી રહ્યા છો? તો આ જગ્યા છે તમારા માટે બેસ્ટ

• ફરવા માટે બેસ્ટ ઓક્ટોબર મહિનો છે
• આ મહિનામાં ફરવાની એક અલગ જ મજા હોય છે
• સોલો ટ્રિપ મારવી હોય તો ઓક્ટોબર મહિનામાં આ જગ્યા પર જાવ 

ઓક્ટોબરનો મહિનો આમ બધાનો ફેવરિટ હોય છે. આ મહિનામાં ગુલાબી ઠંડીની શરુઆત તેને વધુ ખાસ બનાવી દે છે. આવા મોસમમાં ફરવાની એક અલગ જ મજા હોય છે. જો તમે સોલો ટ્રીપ લવર હોવ અને કુદરતની નજીક જવા ઇચ્છતા હો, કુદરતને મહેસુસ કરવા ઇચ્છતા હો અને કુદરતી સૌંદર્યને વધુ નજીકથી માણવા ઇચ્છતા હો તો એવી કેટલીક જગ્યાઓ છે જે આ સીઝનને વધુ ખાસ બનાવશે. ઓક્ટોબર મહિનાની સોલો ટ્રિપ તમને આજીવન યાદ રહેશે તે અમારી ગેરંટી છે.

વાદળોથી શણગારાયેલુ સિક્કિમ
સિક્કીમ આમ તો કોઇ પણ સીઝન માટે સુંદર જગ્યા છે, પરંતુ ઓક્ટોબરમાં તે વધુ આકર્ષક બની જાય છે. અહીં પહાડોને સ્પર્શતા વાદળોને જોઇને તમને લાગશે કે જાણે વાદળ પહાડની મહેમાનગતિ માણી રહ્યા હોય અથવા તો પહાડોએ વાદળને આભુષણ રુપે ધારણ કર્યા હોય. આ ઉપરાંત અહીં ગવાતુ નેપાળી કાવ્ય પણ તમને પોતાની તરફ ખેંચે છે.

વરસાદમાં વધુ નિખરતુ શિલોંગ
મેઘાલય સ્થિત શિલોંગ શાનદાર હિલસ્ટેશનોમાંનુ એક છે. વરસાદ બાદ તે વધુ સુંદર બની જાય છે. ઓક્ટોબર મહિનામાં અહીં કરાયેલી સોલો ટ્રિપ તમારા માટે ખુબ યાદગાર સાબિત થશે. ઉલ્લેખનીય છે કે શિલોંગ પીકથી તમે આખા શહેરનો ભવ્ય નજારો જોઇ શકશો. આ ઉપરાંત લેડી હૈદરી પાર્ક, કેલોન્ગ રોગ અને વાર્ડ્સ ઝરણાની સુંદરતાને નજીકથી જોઇ શકાય છે. આ કૃત્રિમ ઝરણુ છે. તેની ચારે બાજુ ગાઢ જંગલો તેની સુંદરતામાં ચાર ચાંદ લગાવે છે.

સૌથી મોટુ પર્વતીય સ્થળ કુન્નુર
ઉંટી બાદ બીજુ સૌથી મોટુ પર્વતીય સ્થળ તમિલનાડુનું કુન્નુર ખાસ કરીને ટ્રેકિંગ માટે જાણીતુ છે. જો તમને પણ સોલો ટ્રીપ અને ટ્રેકિંગનો શોખ છે તો કુન્નુર જરુર જાવ. અહીં ઘણા બધા પાર્ક છે તો સાથે ઘણા ઝરણાં પણ છે. જે આ જગ્યાને વધુને વધુ સુંદર બનાવે છે. આ ઉપરાંત જો તમને વૃક્ષ અને છોડ ગમતા હોય તો સિમ્સ પાર્ક બેસ્ટ જગ્યા છે. અહીં છોડની 1000થી પણ વધુ પ્રજાતિ જોવા મળશે. તેની ખાસ વાત એ છે કે આ વનસ્પતિ ઉદ્યાનને થોડે અંશે જાપાની શૈલીમાં બનાવાયું છે.