ક્રિકેટ / IPLને લઈને જય શાહનું મોટું એલાન, ક્રિકેટ રસિયાઓને પડી જશે મોજ જ મોજ

IPL 2024 : ભારતીય ક્રિકેટ કંટ્રોલ બોર્ડ એટલે કે BCCI એ દેશમાં આ વર્ષે યોજાનારી લોકસભાની ચૂંટણીને કારણે IPL 2024ના માત્ર અડધા શેડ્યૂલની જાહેરાત કરી છે.  ભારતીય બોર્ડે ગયા મહિને જ IPLનું શેડ્યૂલ જાહેર કર્યું હતું પરંતુ તે માત્ર 17 દિવસનું શેડ્યૂલ હતું, જેમાં માત્ર 21 મેચોના શેડ્યૂલનો ઉલ્લેખ કરવામાં આવ્યો હતો. BCCI લોકસભા ચૂંટણીની તારીખોની જાહેરાત પર નજર રાખી રહ્યું હતું, જેથી તે દેશમાં IPLની 17મી સિઝનનું આયોજન કરી શકે. જો કે આ દરમિયાન કેટલાક અહેવાલો સામે આવ્યા હતા. જેમાં કહેવામાં આવ્યું હતું કે IPL 2024ની અડધી સિઝન UAEમાં યોજવામાં આવી શકે છે.  પરંતુ લોકસભા ચૂંટણીની તારીખોની જાહેરાત થતાં જ BCCIએ આ તમામ અટકળો પર પૂર્ણવિરામ મૂકી દીધું હતું. ભારતીય ક્રિકેટ કંટ્રોલ બોર્ડના સચિવ જય શાહે સ્પષ્ટ કર્યું છે કે IPL 2024 સિઝન સંપૂર્ણપણે ભારતમાં રમાશે અને બોર્ડની તેને UAE અથવા અન્ય કોઈ દેશમાં લઈ જવાની કોઈ યોજના નથી. IPLની નવી સિઝન 22 માર્ચથી શરૂ થઈ રહી છે. 

ચૂંટણી વચ્ચે દેશમાં બીજીવાર આઇપીએલનું આયોજન

આ બીજી વખત છે જ્યારે BCCI લોકસભાની ચૂંટણી વચ્ચે દેશમાં IPLની આખી સિઝનનું આયોજન કરશે. અગાઉ 2019માં બોર્ડે આવું કર્યું હતું. જ્યારે 2014માં અડધી સિઝન ભારતમાં અને અડધી યુએઈમાં રમાઈ હતી અને 2009માં આ લીગ દક્ષિણ આફ્રિકામાં રમાઈ હતી. જય શાહે અખબારને જણાવ્યું હતું કે, "સમગ્ર આઈપીએલ ભારતમાં થશે. બીસીસીઆઈ સંપૂર્ણ શેડ્યૂલ પર કામ કરી રહ્યું છે અને તેને ટૂંક સમયમાં જાહેર કરશે." તમને જણાવી દઈએ કે લોકસભા ચૂંટણી સાત તબક્કામાં યોજાશે. જે 19 એપ્રિલથી શરૂ થશે અને 4 જૂને મતગણતરી થશે.  BCCIએ 2019ની સામાન્ય ચૂંટણી દરમિયાન આવી જ પરિસ્થિતિનો સામનો કરવો પડ્યો હતો પરંતુ બોર્ડે ભારતમાં IPLનું સફળતાપૂર્વક આયોજન કર્યું હતું.

વધુ વાંચોઃ નેશનલ હેલ્થ મિશન હસ્તકના કર્મચારીઓ ખુશખુશાલ, પગારમાં કરાયો આટલાં ટકાનો વધારો

21 મેચોના શેડ્યુલ જાહેર

અત્યાર સુધી IPL 2024 ની માત્ર 21 મેચોના શેડ્યૂલની જાહેરાત કરવામાં આવી છે. ટુર્નામેન્ટની પ્રથમ મેચ ડિફેન્ડિંગ ચેમ્પિયન ચેન્નાઈ સુપર કિંગ્સ અને રોયલ ચેલેન્જર્સ બેંગ્લોર વચ્ચે 22 માર્ચે રમાશે. જ્યારે ચાલુ શેડ્યૂલની છેલ્લી મેચ 7 એપ્રિલે છે. તેના પછી પણ ટૂર્નામેન્ટનું ભારતમાં જ આયોજન થશે. BCCI ટૂંક સમયમાં જ લોકસભાની ચૂંટણી બાદ બાકીના કાર્યક્રમની જાહેરાત કરશે.
VTV Gujarati Newsની તમામ અપડેટ સૌથી પહેલા મેળ​વ​વા માટે અમારી WhatsApp ચેનલ ફોલો કરો