છેતરપિંડી / ગુજરાતની વધુ એક શૈક્ષણિક સંસ્થામાં શિક્ષણનો વેપાર, લાખો પડાવીને અપાતી હતી બોગસ માર્કશીટ

• હાવીસ ઇન્ટરનેશનલમાં બોગસ માર્કશીટ કૌભાંડ
• 5 લાખમાં બનાવાતી હતી બોગસ માર્કશીટ
• મુખ્ય સૂત્રધાર વડોદરાનો જીતુ ફરાર

રાજ્યમાં શિક્ષણ જાણે કે ધંધો બની ગયુ છે.  શાળા કોલેજોમાં વિદ્યાર્થીઓને શૈક્ષણિક સાથે જીવનના પાઠ પણ શીખવવામાં આવે છે પરંતુ હવે તો કેટલીક શૈક્ષણિક સંસ્થાઓ જાણે કે વેપાર કરી રહી છે તેમ કહેવામાં કોઇ નવાઇ નથી.  આણંદમાં આવી જ એક ઘટના સામે આવી છે. જેમાં વિદ્યાર્થીઓને ગુજરાત યુનિવર્સિટીની બોગસ ડિગ્રી બનાવીને વિદેશ મોકલવામાં આવતી હતી.

બોગસ માર્કશીટના 5 લાખ

આણંદની હાવીસ ઇન્ટરનેશનલમાં બોગસ માર્કશીટ બનાવવાનું કૌભાંડ ઝડપાયુ છે.આણંદ સાયબર ક્રાઇમ સેલે આ કૌભાંડ ઝડપી પાડ્યુ છે. 3 વ્યક્તિઓ સાથે છેતરપિંડી થતા સમગ્ર કૌભાંડ બહાર આવ્યુ હતું. આ કૌભાંડ પાછળ મુખ્ય સૂત્રધાર વડોદરાનો જીમી ઉર્ફે જીતુ હાલમાં ફરાર થઇ ગયો છે. જો કે જીમી સાથે હજી કેટલા લોકો જોડાયેલા છે તે તપાસનો વિષય છે.  પરંતુ આ કૌભાંડીઓ એક માર્કસીટના 5 લાખ રૂપિયા પડાવતા હતા.  ગુજરાત યુનિવર્સિટીની બોગસ માર્કશીટ બનાવીને વિદ્યાર્થીઓને વિદેશમાં પહોંચાડતા હતા.

તપાસનો ધમધમાટ શરૂ

શિક્ષણ જગતમાં વારંવાર આવી ઘટનાઓ સામે આવી રહી છે. તે પછી ડિગ્રી કૌભાંડ હોય કે પેપર લીક થવાની ઘટના. આણંદની હાવીસ ઇન્ટરનેશનલમાં આવા ગોરખધંધા સામે આવતા તપાસનો ધમધમાટ શરૂ થયો છે. આ ધંધો ક્યારથી ચાલી રહ્યો હતો. કોણ કોણ તેમાં જોડાયેલુ છે. તેમજ અત્યાર સુધીમાં આવી કેટલી બોગસ ડિગ્રી આપીને લાખો રૂપિયા પડાવવામાં આવ્યા આ તમામ સવાલોને લઇને હાલમાં તપાસ તેજ કરવામાં આવી છે.