- મધ્યપ્રદેશ ખાતેના કુનો નેશનલ પાર્કમાં ચિત્તાઓના મોતનો ગોજારો સિલસિલો યથાવત
- કુનો નેશનલ પાર્કમાં વધુ એક ચિત્તાનો સુરજ આથમી ગયો
- હવે માત્ર 15 ચિત્તા અને એક જ બચ્ચું રહ્યા
મધ્યપ્રદેશ ખાતેના કુનો નેશનલ પાર્કમાં ચિત્તાઓના મોતનો ગોજારો સિલસિલો અટકવાનું નામ લેતો નથી! આવી સ્થિતિ વચ્ચે કુનો નેશનલ પાર્કમાં વધુ એક ચિત્તાનો સુરજ આથમી જતા નિષ્ણાંતોમાં ચિંતાનું મોજુ ફરી વળ્યું છે. આ ઘટનાને પગલે વન વિભાગમાં દોડધામ મચી જવા પામી હતી. ચિંતાજનક બાબત એ પણ છે કે આ પાર્કમાં અત્યાર સુધીમાં પાંચ ચિત્તા અને ત્રણ બચ્ચાના મૃત્યુ થયા છે. પરિણામે હવે માત્ર 15 ચિત્તા અને એક જ બચ્ચું રહ્યું હોવાનું સત્તાવાર રીતે જાહેર થવા પામ્યું છે. જેને લઈને પાર્કની વ્યવસ્થા અને કામગીરી સામે સો મણનો સવાલ ઉભો થયો છે.
અગ્નિ નામના ચિત્તાને પણ પગમાં ઇજા
અત્રે નોંધનીય છે કે બે દિવસ અગાઉ પાર્કમાં તેજસ નામનો ચિત્તો મોતને શરણ થયો હતો. સૂત્રો જણાવી રહ્યા છે કે તેજસ નામના આ ચિતા અને સુરજ વચ્ચે અગાઉ લડાઈ થઇ હતી. આ લડાઈમાં તેજસની ગરદન પર ઊંડા ઘા લાગ્યા હતા. તો સુરત પણ ગંભીર રીતે ઘાયલ થયો હતો જેમાં તેમનું મોત થયાનું સૂત્રો જણાવી રહ્યા છે. તો વધુ એક અગ્નિ નામના ચિત્તાને પણ પગમાં ઇજા થઇ હોવાનું જાણવા મળી રહ્યું છે.
સારવાર કારગત ન નિવડતા તેજસનું 11 જુલાઈના રોજ મોત
નેશનલ પાર્કની વાત કરવામાં આવે તો ત્રણ દિવસ અગાઉ એટલે કે 11 જુલાઈના રોજ કુનો નેશનલ પાર્કમાં સંબંધિત વિભાગની ટીમ દ્વારા નિરીક્ષણ કરવામાં આવી રહ્યું હતું. આ દરમિયાન તેજસ નામનો ચિત્તો ગંભીર રીતે ઘાયલ થયેલ જોવા મળ્યો હતો. જેની ગરદન પર ઊંડા ઘા હતા અને ઇજાગ્રસ્ત હાલતમાં તે મોનિટરિંગ ટીમની નજરે ચડ્યો હતો. બાદમાં તેને તાત્કાલિક હેડક્વાર્ટરમાં લઈ જઈ ડોક્ટરની મદદ માટે જાણ કરાઈ હતી. ત્યારબાદ તબીબોની ટીમ દ્વારા સ્થળ પર પહોંચી અને ઘાવનું નિરીક્ષણ કર્યા બાદ સારવાર હાથ ધરાઈ હતી. જોકે સારવાર કારગત ન નિવડતા તેજસનું 11 જુલાઈના રોજ બપોરે 2:00 વાગ્યાની આસપાસ મોત નીપજ્યું હતું. બાદમાં વધુ એક ચિત્તાનું મોત થતા ચિંતા ઘેરી બની છે.
