- શાહરૂખ ખાનની ફિલ્મ જવાન ટૂંક સમયમાં રિલીઝ થશે
- ગીત "ઝિંદા બંદા" જોઈ આનંદ મહિન્દ્રાએ કર્યા SRKના વખાણ
- મહિન્દ્રાના ટ્વિટ પર આવી હતી શાહરૂખની પ્રતિક્રિયા
બોલિવૂડના કિંગ કહેવાતા શાહરૂખ ખાનની ફિલ્મ જવાન ટૂંક સમયમાં રિલીઝ થશે અને થોડા સમય પહેલા ફિલ્મનો પ્રીવ્યૂ સામે આવ્યો હતો જે લોકોને ખૂબ પસંદ આવ્યું હતું એ બાદ તાજેતરમાં જ ફિલ્મનું પહેલું ગીત "ઝિંદા બંદા" રિલીઝ થયું હતું. ત્યારથી આ ફિલ્મ ખૂબ ચર્ચામાં છે.
આ બધા દરમિયાન હવે બિઝનેસ ટાયકૂન આનંદ મહિન્દ્રાનું રીએક્શન પણ સામે આવ્યું છે. એ વાત તો જાણીતી જ છે કે આનંદ મહિન્દ્રા સોશિયલ મીડિયા પર ખૂબ જ એક્ટિવ છે. શાહરુખની ફિલ્મના આ ગીતનો વીડિયો જોયા બાદ આનંદ મહિન્દ્રા પોતાની જાતને રોકી ન શક્યા અને તેમણે એક ટ્વિટ કરીને વાત કહી હતી. હાલ આનંદ મહિન્દ્રાનું ટ્વીટ ઘણું વાયરલ થઈ રહ્યું છે.
શાહરૂખનો 'ઝિંદા બંદા' અવતાર પસંદ આવ્યો
આનંદ મહિન્દ્રાએ પોતાના ટ્વિટમાં લખ્યું, 'આ હીરો 57 વર્ષનો છે? દેખીતી રીતે તેની વૃદ્ધત્વ પ્રક્રિયા ગુરુત્વાકર્ષણના દળોને અવગણે છે! તે મોટાભાગના લોકો કરતા 10 ગણો વધુ જીવંત છે. #ઝિંદાબંદા હો તો ઐસા...' આનંદ મહિન્દ્રાના વખાણ કરવાની આ સ્ટાઈલ લોકોને ઘણી પસંદ આવી. શાહરૂખ ખાન પણ આ ટ્વીટ વાંચીને પોતાની જાતને પ્રતિક્રિયા આપતા રોકી શક્યો નહીં અને તેને રીટ્વીટ કરીને પોતાના વિચારો શેર કર્યા હતા.
આવી હતી શાહરૂખની પ્રતિક્રિયા
આનંદ મહિન્દ્રાના એ ટ્વિટને શાહરૂખ ખાને રીટ્વીટ કરીને લખ્યું કે, 'જીંદગી ખૂબ ટૂંકી અને ઝડપી છે સર, બસ તેને ચાલુ રાખવાનો પ્રયાસ કરી રહ્યો છું. બને તેટલા લોકોનું મનોરંજન કરવાનો પ્રયાસ કરો...હસો, રડો.. ચોંકી જાઓ અને ઊડો...આશા છે કે કેટલાક લોકો સીતારાઓ સાથે તરી શકે છે...ખુશીની થોડી ક્ષણોનું સપનું જોઈ શકે.' શાહરૂખના રિએક્શન બાદ આ ટ્વીટ ઝડપથી વાયરલ થઈ ગયું.
આ દિવસે રિલીઝ થનારી ફિલ્મ
જણાવી દઈએ કે, શાહરૂખ ખાનનું ગીત 'ઝિંદા બંદા' હવે હિન્દી , તમિલ અને તેલુગુના તમામ મોટા મ્યુઝિક પ્લેટફોર્મ પર ઉપલબ્ધ છે. 'જવાન' એ રેડ ચિલીઝ એન્ટરટેઈનમેન્ટ પ્રોડક્શન છે જેનું દિગ્દર્શન એટલી દ્વારા કરવામાં આવ્યું છે અને ગૌરી ખાન દ્વારા નિર્મિત અને ગૌરવ વર્મા દ્વારા સહ-નિર્માણ કરવામાં આવ્યું છે. આ ફિલ્મ 7 સપ્ટેમ્બર 2023ના રોજ વિશ્વભરના સિનેમાઘરોમાં હિન્દી, તમિલ અને તેલુગુ ભાષાઓમાં રિલીઝ થશે.
