SHORT & SIMPLE / જુનિયર ક્લાર્ક પરીક્ષાઃ ટ્રકના કારણે ટ્રાફિકજામ થતાં મૂંઝવણમાં મુકાયા પરીક્ષાર્થીઓ, જાંબાજ પોલીસે કરી મદદ

• પોલીસની સરાહનીય કામગીરી
• ઉમેદવારોને કેન્દ્ર સુધી પહોંચાડ્યા
• ટ્રાફિકજામને કારણે અટવાયા હતા ઉમેદવારો

રાજ્યમાં શાંતિપૂર્ણ માહોલમાં જુનિયર ક્લાર્કની પરીક્ષા પૂર્ણ થઈ છે. રાજ્યના 3 હજાર કેન્દ્ર પર 7.28 લાખ ઉમેદવારોએ પરીક્ષા આપી છે. પેપર વધુ લાંબુ હોવાને કારણે ઉમેદવારોને સમય ઓછો પડ્યો હોવાનું જણાવા મળી રહ્યું છે. તો આજે પરીક્ષા આપવા જતી વખતે અનેક પરીક્ષાર્થીઓને મુશ્કેલીનો સામનો કરવો પડી રહ્યો હતો, આ દરમિયાન ગુજરાત પોલીસના જાંબાજ કર્મચારીઓ દેવદૂત બનીને ઉભર્યાં હતા. 

અમરેલી પોલીસે પરીક્ષાર્થીઓની કરી મદદ 
અમરેલીના ખાંભાના નાની ધારી નજીક બંધ પડેલા ટ્રકને કારણે 11 પરીક્ષાર્થીઓ મુશ્કેલીમાં મુકાયા હતા. ત્યારે પોલીસ દેવદૂત બની પહોંચી હતી અને 60 કિલોમીટર જેટલા દૂરના અંતરે 11 પરીક્ષાર્થીઓને પહોંચાડ્યા હતા. મળતી માહિતી અનુસાર, ખાંભાના નાની ધારી નજીક હાઈવે પર ટ્રક બંધ પડી જતાં ટ્રાફિકજામના દ્રશ્યો સર્જાયા હતા. આ દરમિયાન કોડીનાર-કૃષ્ણનગર એસટી બસમાં પરીક્ષા આપવા અમરેલી જઈ રહેલા પરીક્ષાર્થીઓ મૂંઝવણમાં મુકાયા હતા. 

સમયસર પહોંચાડ્યા પરીક્ષા કેન્દ્ર ખાતે
જેથી આ તમામે ટ્રાફિક હળવો કરાવી રહેલા પોલીસકર્મીઓને પોતાની સમસ્યા જણાવી હતી. જે બાદ ગીર સોમનાથ જિલ્લાના 11 પરીક્ષાર્થીઓને પોલીસ વાનમાં પરીક્ષા કેન્દ્ર સુધી પહોંચાડવામાં આવ્યા હતા. સમયસર સેન્ટર પર પહોંચાડવા બદલ વિદ્યાર્થીઓએ પોલીસનો આભાર માન્યો હતો..