- કાશ્મીરના બારામૂલામાં રેલીને સંબોધિત કરી અમિત શાહે
- પાકિસ્તાન સાથે નહીં થાય કોઈ પણ પ્રકારની મંત્રણા
- સરકાર આતંકને જરા પણ સાંખી નહીં લે
જમ્મુ-કાશ્મીરના બારામૂલામાં એક મોટી રેલીને સંબોધિત કરતા કેન્દ્રીય ગૃહમંત્રી શાહે કહ્યું કે પાકિસ્તાન સાથે કોઈ પણ પ્રકારની વાત નહીં થાય. તેમણે ભારપૂર્વક જણાવ્યું હતું કે નરેન્દ્ર મોદી સરકાર જમ્મુ-કાશ્મીરમાંથી આતંકવાદનો સફાયો કરશે અને તેને દેશનું સૌથી શાંતિપૂર્ણ સ્થળ બનાવશે.
1990થી અત્યાર સુધી આતંકને કારણે 42,000 લોકોના મોત
શાહે પૂછ્યું હતું કે શું આતંકવાદથી ક્યારેય કોઈને ફાયદો થયો છે કારણ કે તેણે 1990ના દાયકાથી અત્યાર સુધીમાં જમ્મુ-કાશ્મીરમાં 42,000 લોકોના જીવ લીધા છે. શાહે કહ્યું કે જ્યારે અહીં (બારામૂલા)માં રેલીની વાત ચાલતી હતી ત્યારે કેટલાક લોકોએ શંકા ઉઠાવી કે અહીંની રેલીમાં કોણ આવશે પરંતુ હું આજે તેમને કહેવા માંગું છું કે આ કાર્યક્રમમાં કાશ્મીરની આ સુંદર ખીણમાં વિકાસની ગાથા સાંભળવા અને મોદીજીને સમર્થન આપવા માટે હજારો લોકો અહીં હાજર છે.
આતંકી હૉટસ્પૉટ વાળો વિસ્તાર હવે ટૂરિઝમ હોટસ્પોટ બન્યો
અમિત શાહે ખૂબ જ ગર્વ વ્યક્ત કરતા કહ્યું કે જે વિસ્તાર પહેલા આતંકી હૉટસ્પૉટ હતો, હવે ટૂરિઝમ હૉટસ્પૉટ છે. જમ્મુ-કાશ્મીરમાં વધતા જતા પર્યટનને કારણે અહીંના ઘણા યુવાનોને રોજગાર મળ્યો છે. "છેલ્લા 70 વર્ષથી, મુફ્તી એન્ડ કંપની, અબ્દુલ્લાના પુત્રો અહીં સત્તામાં હતા, પરંતુ તેમણે 1 લાખ બેઘર લોકોને આવાસ પૂરા પાડ્યા ન હતા. મોદીજીએ 2014-2022 વચ્ચે આ 1 લાખ લોકોને ઘર આપ્યા હતા.
જમ્મુ-કાશ્મીરમાં થશે શાંતિપૂર્ણ ચૂંટણી
અમિત શાહે વધુમાં જણાવ્યું હતું કે, મતદાર યાદી તૈયાર કરવાનું કામ પૂર્ણ થતાં જ જમ્મુ-કાશ્મીરમાં સંપૂર્ણ પારદર્શિતા સાથે ચૂંટણી યોજાશે. મોદીજીએ જમ્મુ-કાશ્મીરમાં સૌથી પહેલું કામ લોકશાહીને ગામમાં લઈ જવાનું કર્યું છે. 5 ઓગસ્ટ પછી મોદીજીએ લોકતંત્રને જમીન પર, જમ્મુ-કાશ્મીરના ગામમાં લઈ જવાનું કામ કર્યું છે. આજે, 30,000 થી વધુ લોકો ખીણ અને જમ્મુ-કાશ્મીરમાં પંચાયતો, તહસીલ પંચાયતોનું નેતૃત્વ કરી રહ્યા છે.
