અમદાવાદ / ટ્રેનમાંથી અધવચ્ચે ઉતર્યો યુવક, કોઈ હેરાન કરતું હોવાની ફરિયાદ કરી શહેરકોટડા પોલીસ સ્ટેશનમાં જ ગળેફાંસો ખાઈ જીવન ટૂંકાવ્યું

અમદાવાદના શહેરકોટડા પોલીસ સ્ટેશનમાં એક યુવકે ગળેફાંસો ખાઈ જીવન ટૂંકાવતાં પોલીસ તંત્રમાં ચકચાર મચી છે. મૂળ ઉત્તર પ્રદેશનો રહેવાસી રાજુ નામનો યુવક જામનગરથી ઉત્તર પ્રદેશ જવા માટે ટ્રેનમાં નીકળ્યો હતો. જોકે, છેલ્લા કેટલાક દિવસોથી તે ટેન્શનમાં અને માનસિક રીતે પરેશાન હોવાનું સામે આવ્યું છે.

રાજુ જામનગરથી ઉત્તર પ્રદેશ જતી ટ્રેનમાં સવાર થયો હતો

મળતી માહિતી મુજબ, રાજુ જામનગરથી ઉત્તર પ્રદેશ જતી ટ્રેનમાં સવાર થયો હતો, પરંતુ રસ્તામાં અમદાવાદ ખાતે ટ્રેનમાંથી ઉતરી ગયો હતો. ત્યારબાદ તેણે પોલીસને ફોન કરીને કોઈ વ્યક્તિ દ્વારા પોતાને હેરાન કરવામાં આવતું હોવાની ફરિયાદ કરી હતી. ફરિયાદ બાદ શહેરકોટડા પોલીસે તેને પોલીસ સ્ટેશન ખાતે લાવી પૂછપરછ કરી હતી.

પોલીસે રાજુની તેના ભાઈ સાથે ફોન પર વાત પણ કરાવી

પોલીસે રાજુની તેના ભાઈ સાથે ફોન પર વાત પણ કરાવી હતી. રાજુએ પોતાની પાસે પૈસા ન હોવાનું જણાવ્યું હતું, જેના પગલે તેના ભાઈએ એક દિવસમાં રૂપિયા મોકલી આપવાની ખાતરી આપી હતી. આ દરમિયાન એક પોલીસ કર્મચારીએ રાજુને નાસ્તા માટે રૂ.100 પણ આપ્યા હોવાનું જાણવા મળ્યું છે.

રાજુ ગઈકાલ રાતથી પોલીસ સ્ટેશનમાં જ હતો

રાજુ ગઈકાલ રાતથી પોલીસ સ્ટેશનમાં જ હતો. દરમિયાન પોલીસ સ્ટેશનમાં તક મળતા તે ઇલેક્ટ્રિક રૂમમાં જતો રહ્યો હતો. થોડા સમય બાદ પોલીસને તે રૂમમાં ગળેફાંસો ખાધેલી હાલતમાં મળી આવ્યો હતો. ઘટનાને પગલે પોલીસ દ્વારા સમગ્ર મામલે તપાસ શરૂ કરવામાં આવી છે.

આ પણ વાંચોઃ કચ્છમાં મેઘરાજાની ધમાકેદાર એન્ટ્રી, અંજારમાં 7.5 ઈંચ વરસાદથી જળાશયો છલકાયા!

પોલીસે તપાસ હાથ ધરી

રાજુએ કયા સંજોગોમાં આ અંતિમ પગલું ભર્યું તે અંગે પોલીસે તપાસ હાથ ધરી છે. પ્રાથમિક માહિતી અનુસાર, તે છેલ્લા ચાર દિવસથી જામનગરમાં ટેન્શનમાં અને માનસિક રીતે પરેશાન હતો. આ ઉપરાંત, રાજુ સાથે રહેલા તેના એક મિત્રનો ફોન ન ઉપાડતા પોલીસે તેની પણ તપાસ શરૂ કરી છે

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ