- અમદાવાદ RTOની બેદરકારીનો પર્દાફાશ
- સરકારના લાખો રૂપિયા ખાઈ રહ્યા છે ધૂળ
- અમદાવાદ RTOને પેટ્રોલિંગ માટે આપ્યા હતા બુલેટ
જનતાના હકના નાણાંનો વેડફાટ થઈ રહ્યો છે તેવું જણાઈ રહ્યું છે. કોરોના કાળ પહેલા આરટીઓ અધિકારીઓ માટે બુલેટ ખરીદવામાં આવ્યા હતા. કરોડો રૂપિયાનો ખર્ચ કરકસરભર્યા પેટ્રોલિંગ માટે કરવામાં આવ્યો હતો. પરંતુ RTO અધિકારીઓને ફોરવ્હીલ સિવાય ફાવતું નથી, પરિણામે જનતાના ટેક્સમાંથી વસાવેલા કરોડો રૂપિયાના બુલેટ આરટીઓ કચેરીઓમાં ધૂળ ખાઈ રહ્યા છે.
ઈંધણની બચતનો વિચાર ધૂળમં ભળી ગયો
એક મોટા હોલમાં કતારમાં સ્ટેન્ડ કરીને પાર્ક કરેલા આ મોંઘાદાટ બુલેટ અને તેમના પર જામી ગયેલી અનેક દિવસોની ધૂળ જોઈને આપને લાગશે કે, આ વાહનો પોલીસે જપ્ત કરેલા હશે અને અને તેનો માલિક તેને છોડાવવા નહીં આવ્યો હોય પરંતુ ના. હકીકત એ છે કે, આ વાહનો અમદાવાદ RTO કચેરીની જ મિલકત છે. સરકારે જ આરટીઓના અધિકારીઓને પેટ્રોલિંગ માટે આ બુલેટ ફાળવ્યા હતા. પરંતુ આ બુલેટનો ફિલ્ડવર્કમાં ઉપયોગ થવાના બદલે આરટીઓના કચેરીના પાર્કિંગમાં જ ધૂળ ખાઈ રહ્યા છે.
RTO અધિકારીઓને ફોરવ્હીલ સિવાય ફાવતુ નથી
RTO દ્વાર આ બુલેટ વસાવવા પાછળનો આશય ફોરવ્હીલરમાં થતાં ડીઝલના વપરાશ અને ખર્ચને ઘટાડવાનો હતો. ચેક પોસ્ટ પર ચેકિંગ કરવા એટલે કે કોઈ પણ એન્ફોર્સમેન્ટની કાર્યવાહી કરવા ઈન્સ્પેક્ટરોએ આ રોયલ એનફીલ્ડનો ઉપયોગ કરવાનું જે તે સમયે નક્કી કરાયું હતું. ઉપરાંત અકસ્માતના કેસમાં અન્ય એજન્સી સાથે મળીને સ્પોટ વિઝિટ ફરજિયાત હોવાથી તેવી કામગીરી માટે પણ બુલેટ પર જ જવાનું નક્કી કરાયું હતું. એટલું જ નહીં તે વખતે આરટીઓમાં નવા ભરતી થયેલા અધિકારીઓમાં એક સમયે બુલેટનો ક્રેઝ પણ હતો. પરંતુ અમલીકરણ અને ઈચ્છાશક્તિના અભાવે આરટીઓ અધિકારીઓ દ્વારા બુલેટનો વપરાશ વધારે સમય થયો નહીં. પરિણામે સરકારનો સમય અને ઈંધણની બચત માટેનો આ આઈડિયા હવે ધૂળ ખાઈ રહ્યો છે.
જનતાના ટેક્સના નાણાં આ રીતે વેડફાય છે
આમ, હાલમાં આરટીઓ અધિકારીઓ કોઈ પણ સંજોગામાં તડકો, ઠંડી અને વરસાદ સહન કરવા માંગતા નથી. પરિણામે તેઓને ટુવ્હીલ ક્લાસીક બુલેટની સૂગ ચડી રહી છે. એવામાં બુલેટ પર આરટીઓ અધિકારીઓને મોકલવાનો સરકારનો આઈડિયા હાલ તો ‘ધૂળ’ જ ખાઈ રહ્યો છે. ત્યારે હવે જોવું એ રહ્યું કે અન્ય વાહનોની જેમ પણ આ ક્લાસીક બુલેટ કંડમ થઈ જાય છે કે તેને ફરીથી આરટીઓ ઓફિસના ખૂણામાંથી ધૂળ ખંખેરીને ઈન્સ્પક્ટોરને ફિલ્ડમાં લઈ જવાની ફરજ પડાય છે.
