સુવિધા / હવેથી અમદાવાદ RTO ઇન્સ્પેક્ટર બોડી વોર્ન કેમેરાથી થશે સજ્જ, ગેરરીતિ પર રખાશે બાજનજર

 

• RTO ઇન્સ્પેક્ટર બોડીવોર્ન કેમેરાથી સજ્જ
• ટેસ્ટ ટ્રેક કામ માટે બોડીવોર્ન કેમેરા ફરજિયાત
• 3 RTOને 25 કેમેરાની ફાળવણી કરાઈ

અમદાવાદ RTOમાં હવે કોઈ ગેરરીતિ નહીં આચરી શકે. અમદાવાદ RTOમાં આજથી બોડી વોર્ન કેમેરા ફરજિયાત કરવામાં આવ્યા છે. RTO ઇન્સ્પેક્ટર અને વાહનોના ફિટનેસની ચકાસણી કરતા કર્મચારીઓએ બોડી વોર્ન કેમેરા ફરજિયાત પહેરવા પડશે. આ કેમેરાથી ઉચ્ચ અધિકારીઓ સીધી નજર રાખી શકશે. અમદાવાદમાં RTOના દરેક ઇન્સ્પેક્ટરને 8 કલાક સુધી કેમેરો પહેરીને રાખવો પડશે. RTOમાં ટેસ્ટ ટ્રેક કામ માટે બોડીવોર્ન કેમેરા ફરજિયાત કરાયા છે. પાયલોટ પ્રોજેક્ટ હેઠળ શહેરની 3 RTOને 25 કેમેરાની ફાળવણી કરવામાં આવી છે. 

કેમેરાથી ઉચ્ચ અધિકારીઓ સીધી નજર રાખી શકશે
RTOમાં કોઈ પણ પ્રકારની ગેરરીતિ રોકવા માટે હવે ટેસ્ટ ટ્રેક, દંડ વસુલતા અને ફિટનેસ ચકસતા અધિકારીઓના ખભા પાસે બોડી વોર્ન કેમેરા લાગશે. જેથી આ કેમેરાથી ઉચ્ચ અધિકારીઓ સીધી નજર રાખી શકશે. મહત્વનું છે કે, આ કેમેરામાં કર્મચારીનો વીડિયો અને ઓડિયો રેકોર્ડ થશે.  

બોડી વોર્ન કેમેરા શું છે? 
બોડી વોર્ન કેમેરા એક નાનું ઉપકરણ છે. તે ખભા પાસે યુનિફોર્મ ઉપર ફીટ કરવામાં આવે છે. આ કેમેરામાં એક લેન્સ છે, જેને ચારેય દિશામાં ફેરવી શકાય છે. એટલે કે રેકોર્ડિંગ કોઈપણ એંગલથી કરી શકાય છે. એક કેમેરાની અંદાજિત કિંમત 25 હજાર રૂપિયા છે. કેમેરામાં ડેટા 15 દિવસ સુધી સ્ટોર કરી શકાય છે. આ કેમેરા GPS (ગ્લોબલ પોઝિશનિંગ સિસ્ટમ) અને GPRS (જનરલ પોકેટ રેડિયો સર્વિસ) દ્વારા સીધા જ કંટ્રોલ રૂમ સાથે લિંક કરી શકાય છે. ત્યાં બેઠેલા અધિકારીઓ કોઈપણ સમયે દરેક જવાનની એક્ટિવિટી ઓનલાઈન જોઈ શકશે.

મોબાઈલ ફોન પર મોકલાશે મેમો
અત્યાર સુધી ટ્રાફિક પોલીસ દ્વારા દંડ વસુલવામાં આવતો હતો. આ ઉપરાંત મેમો ઘરે મોકલવામાં આવતા હવે હવે સીસીટીવીથી નિયમભંગની નોંધ કરીને મોબાઈલ ફોનથી મેમો મોકલીને દંડ ઓનલાઈન વસુલવામાં આવશે. અત્યાર સુધી ટુ વ્હીલર ચાલકોને સ્ટોપલાઈન કે સિગ્નલ ભંગ  અને હેલમેટ ન પહેરવાના ત્રણ નિયમો તોડવા બદલ ઈ-મેમો મોકલવામાં આવતા હતા. હવે સ્માર્ટ સિટી પ્રોજેક્ટ અંતર્ગત 16 નિયમોના ભંગ બદલ મેમો મોકલમાં આવશે. જો કોઈ વાહનચાલકો ટ્રાફિકના નિયમો તોડશે તો જેમના નામે વાહન હશે અને જે મોબાઈલ ફોન નંબર રજિસ્ટર્ડ હશે તેના ઉપર દંડનો મેસેજ મોકલવામાં આવશે.