ગુજરાત / લગ્ન સર્ટિફિકેટમાં હવે પતિ-પત્નીનો ફોટો પણ! અમદાવાદમાં નવી ઓનલાઈન સેવા શરૂ

અમદાવાદ મ્યુનિસિપલ કોર્પોરેશન (AMC) દ્વારા નાગરિકોની સુવિધાને ધ્યાનમાં રાખીને લગ્ન નોંધણી પ્રક્રિયામાં મોટો ફેરફાર કરવામાં આવ્યો છે. 1 ઓગસ્ટથી લગ્ન નોંધણીની સમગ્ર પ્રક્રિયા ઓનલાઈન કરવામાં આવશે. નવી વ્યવસ્થા હેઠળ હવે અરજદારો પોતાના ઘરે બેઠા ઓનલાઈન અરજી કરી શકશે, જ્યારે લગ્ન પ્રમાણપત્ર પણ વર અને કન્યાના ફોટા સાથેનું આપવામાં આવશે. આ સાથે અત્યાર સુધી ચાલતી ઓફલાઈન લગ્ન નોંધણીની સિસ્ટમ સંપૂર્ણપણે બંધ કરવામાં આવી છે.

નવી ઓનલાઈન વ્યવસ્થા અમલમાં મૂકવા માટે અમદાવાદ મ્યુનિસિપલ કોર્પોરેશન દ્વારા પોતાની વેબસાઈટ https://ahmedabadcity.gov.in પર લગ્ન નોંધણી માટે નવું પોર્ટલ ઉપલબ્ધ કરાવવામાં આવશે. આ પોર્ટલ પર જઈને અરજદારે ઓનલાઈન ફોર્મ ભરવાનું રહેશે તેમજ જરૂરી તમામ દસ્તાવેજો અપલોડ કરવાના રહેશે. જેથી સમગ્ર પ્રક્રિયા વધુ સરળ, ઝડપી અને પારદર્શક બની રહેશે.

31 જુલાઈના રોજ લગ્ન નોંધણીની કામગીરી

નવી સિસ્ટમ લાગુ કરવામાં આવતી હોવાથી જૂની ઓફલાઈન પ્રક્રિયા બંધ કરવામાં આવી છે. તેના કારણે 31 જુલાઈના રોજ લગ્ન નોંધણીની કામગીરી બંધ રાખવામાં આવશે. ત્યારબાદ 1 ઓગસ્ટથી માત્ર ઓનલાઈન અરજી જ સ્વીકારવામાં આવશે.

વેબસાઈટ પર લગ્ન નોંધણી માટે અલગ ટાસ્ક અને જરૂરી માર્ગદર્શિકા પણ મૂકવામાં આવી છે. તેમાં ઓનલાઈન અરજી કેવી રીતે કરવી, કયા દસ્તાવેજો અપલોડ કરવાના રહેશે તેમજ આગળની પ્રક્રિયા અંગે વિગતવાર માહિતી આપવામાં આવી છે. અરજદાર દ્વારા ઓનલાઈન અરજી અને જરૂરી દસ્તાવેજો અપલોડ કર્યા બાદ સંબંધિત કચેરી દ્વારા તેની ચકાસણી કરવામાં આવશે.

રજાના દિવસ સિવાયનો સમય અને તારીખનો સ્લોટ ઓનલાઈન બુક કરી

જો દસ્તાવેજોની ચકાસણી દરમિયાન કોઈ વાંધો નહીં હોય તો અરજદારને સંબંધિત લગ્ન નોંધણી વોર્ડ ઓફિસમાં હાજર રહેવા માટે તારીખ અને સમય પસંદ કરવાની સુવિધા આપવામાં આવશે. અરજદાર પોતાની અનુકૂળતા મુજબ જાહેર રજાના દિવસ સિવાયનો સમય અને તારીખનો સ્લોટ ઓનલાઈન બુક કરી શકશે.

પતિ-પત્નીએ સંબંધિત લગ્ન નોંધણી વોર્ડ ઓફિસ ખાતે રૂબરૂ હાજર રહેવાનું

બુક કરાયેલા દિવસ અને સમયે પતિ-પત્નીએ સંબંધિત લગ્ન નોંધણી વોર્ડ ઓફિસ ખાતે રૂબરૂ હાજર રહેવાનું રહેશે. ત્યાં લગ્ન નોંધણી રજીસ્ટરમાં બંનેએ સહી કરવાની રહેશે તેમજ નિયમ મુજબ લગ્ન નોંધણી ફી ભરવાની રહેશે. આ પ્રક્રિયા પૂર્ણ થયા બાદ તરત જ અરજદારના લોગિનમાં વર અને કન્યાના ફોટા સાથેનું ડિજિટલ લગ્ન પ્રમાણપત્ર ઉપલબ્ધ થઈ જશે.

આ પણ વાંચો : સવારમાં ફરનારા ધ્યાન આપે! ભારે વરસાદની આગાહી બાદ અમદાવાદમાં લેક-ગાર્ડન બંધ રહેશે

અમદાવાદ મ્યુનિસિપલ કોર્પોરેશનના જણાવ્યા મુજબ આ નવી ઓનલાઈન વ્યવસ્થાથી નાગરિકોને મોટી રાહત મળશે. હવે લોકોને વારંવાર કચેરીના ધક્કા ખાવાની જરૂર નહીં રહે. ઘરે બેઠા અરજી કરવી, જરૂરી દસ્તાવેજો અપલોડ કરવા, અરજીની સ્થિતિ ઓનલાઈન તપાસવી, ફિઝિકલ વેરિફિકેશન માટે અનુકૂળ સમય નક્કી કરવો અને અંતે ડિજિટલ સહી તેમજ વર-કન્યાના ફોટા સાથેનું લગ્ન પ્રમાણપત્ર મેળવવું વધુ સરળ બનશે. નવી વ્યવસ્થા લગ્ન નોંધણી પ્રક્રિયાને વધુ ઝડપી, પારદર્શક અને નાગરિકમૈત્રી બનાવશે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ