ગુજરાત / અમદાવાદના લો ગાર્ડનના રૂ. 100 કરોડના કાયાકલ્પ સામે સવાલો, પાર્કિંગ વસૂલાત અને ગેરકાયદે શેડની ફરિયાદ

શહેરની ઓળખ સમાન લો ગાર્ડનના બજારને વધુ આકર્ષક, વ્યવસ્થિત અને રાહદારીમૈત્રી બનાવવાના એએમસીના મોટા આયોજન સામે હવે જમીની હકીકત સવાલો ઊભા કરી રહી છે. એએમસીએ ૨૦૨૫માં લો ગાર્ડન-મીઠાખળી વિસ્તારના 6.6 કિમીના છ રસ્તાના પ્રિસિંક્ટ ડેવલપમેન્ટ માટે રૂ. 99.90 કરોડ તથા રૂ. 13.02 કરોડ જીએસટી સાથેનો પ્રોજેક્ટ મંજૂર કર્યો હતો. આયોજનમાં સુંદર ફૂટપાથ, સંગઠિત પાર્કિંગ, વેન્ડિંગ ઝોન, લેન્ડસ્કેપિંગ, બેન્ચ, ગઝિબો, શિલ્પો અને થીમ લાઇટિંગ જેવી સુવિધાઓ સામેલ હતી.

પ્રોજેક્ટનો હેતુ માત્ર રસ્તો સુંદર બનાવવાનો નહીં, પરંતુ લો ગાર્ડન જેવા વ્યસ્ત બજાર વિસ્તારમાં રાહદારી, વેપારી, વાહનચાલક અને પાર્કિંગ વચ્ચે વ્યવસ્થિત સંતુલન ઊભું કરવાનો હતો. પરંતુ ફૂટપાથની ડિઝાઇનને લઈને વિવાદ થતાં પ્રોજેક્ટના કામને રોકવું પડ્યું હતું. એક તબક્કે ફૂટપાથ અને યુટિલિટી માટેની જગ્યા વધતાં વાહનવ્યવહાર માટે ઉપલબ્ધ રસ્તો ઘટી જતો હોવાની ફરિયાદો સામે આવી હતી. હાલ કમિશનરની સ્થળ મુલાકાત બાદ પ્રોજેક્ટ ફરી આગળ વધતો દેખાઈ રહ્યો છે. હવે નજર એ પર રહેશે કે રૂ. 99.90 કરોડનો પ્રોજેક્ટ જમીન પર લો ગાર્ડનને ખરેખર વધુ વ્યવસ્થિત બનાવે છે કે માત્ર રસ્તા-ફૂટપાથના સૌંદર્યીકરણ સુધી સીમિત રહે છે.

હવે ફરી કામની હિલચાલ, કમિશનરની સ્થળ મુલાકાત

આ પ્રોજેક્ટ સંપૂર્ણપણે પડતો મુકાયો નથી. ૧ ઓક્ટોબર, ૨૦૨૬ના રોજ મ્યુનિસિપલ કમિશનર બંછાનિધિ પાનીએ લો ગાર્ડન પ્રિસિંક્ટ ડેવલપમેન્ટની સ્થળ મુલાકાત લઈ ચાલી રહેલી કામગીરીની સમીક્ષા કરી હતી. અધિકારીઓ સાથે પ્રોજેક્ટની પ્રગતિ અંગે ચર્ચા પણ કરવામાં આવી હતી. એટલે લાંબા વિલંબ બાદ પ્રોજેક્ટને ફરી ગતિ આપવાનો પ્રયાસ થઈ રહ્યો હોવાનું જણાય છે.

સૌથી પહેલાં પાર્કિંગ વ્યવસ્થા જ પ્રશ્નમાં

રૂ. 100 કરોડના કાયાકલ્પની વાત વચ્ચે લો ગાર્ડન હેપી સ્ટ્રીટમાં તાજેતરમાં પાર્કિંગ ફી ગેરકાયદે વસૂલાતની ફરિયાદ સામે આવી છે. એએમસીના જણાવ્યા મુજબ હેપી સ્ટ્રીટ અને આસપાસના વિસ્તારનો પે-એન્ડ-પાર્ક કોન્ટ્રાક્ટ લગભગ છ મહિના અગાઉ પૂર્ણ થઈ ગયો હતો, છતાં વાહનચાલકો પાસેથી વસૂલાત થતી હોવાની ફરિયાદ સ્ટેન્ડિંગ કમિટીમાં કરવામાં આવી હતી. એએમસીએ તપાસ અને જરૂરી કાર્યવાહીનો આદેશ આપ્યો છે.

આ પણ વાંચો : અમદાવાદમાં ગાંધીજી અને સ્વતંત્રતા આંદોલનની ઐતિહાસિક ધરોહરને હેરિટેજ સ્ટેટસનું કવચ, 382 ઈમારતોને સંરક્ષણ

વેન્ડિંગ ઝોન બનાવવાનો પ્લાન ત્યાં ગેરકાયદે શેડની ફરિયાદ

એએમસીની મૂળ યોજના જ વ્યવસ્થિત વેન્ડિંગ ઝોન ઊભો કરવાની હતી. પરંતુ હાલ હેપી સ્ટ્રીટમાં કેટલાક વેપારીઓ દ્વારા પરવાનગી વિના લોખંડની શીટના શેડ ઊભા કરાયા હોવાની ફરિયાદ પણ સામે આવી છે. એએમસીએ શેડ કામચલાઉ છે કે કાયમી અને જરૂરી મંજૂરી લેવામાં આવી છે કે નહીં તેની તપાસ કરવાની વાત કરી છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ