- ઈમરાન ખાનની મુશ્કેલીમાં વધારો
- જામીન મળ્યાનાં થોડા જ કલાકોમાં ફરી થઈ ધરપકડ
- PM પદ પર રહીને ગોપનીય દસ્તાવેજોનો ઉપયોગ કર્યાનો આરોપ
ઈમરાન ખાન તોશખાના કેસ: પાકિસ્તાનનાં તહરીક-એ- ઈંસાફનાં અધ્યક્ષ અને પૂર્વ PM ઈમરાન ખાનને તોશખાના મામલે ઈસ્લામાબાદ હાઈકોર્ટે મોટી રાહત આપી હતી. કોર્ટે તેમની સજા સ્થગિત કરી અને જામીનનાં આદેશ આપ્યાં હતાં. પરંતુ જામીનનાં આદેશ મળ્યાનાં કેટલાક કલાકોમાં જ તેમની ફરી ધરપકડ કરવામાં આવી. આ વખતે તેમને Cipher Caseમાં પકડવામાં આવ્યાં છે. તેમના પર આરોપ છે કે તેમણે PM પદ પર રહીને ગોપનીય દસ્તાવેજોનો રાજનીતિમાં ઉપયોગ કરીને દેશની સુરક્ષાને દાવ પર મુકી છે.
Cipher કેસ
જેલથી જામીન મળ્યાંની સાથે જ ઓફિશિયલ સીક્રેટ્સ એક્ટ અંતર્ગત ઈમરાન ખાનની સાઈફર કેસમાં ફરી ધરપકડ કરવામાં આવી છે.ઈમરાન ખાન પર આરોપ છે કે તેમણે PM પદ પર રહીને સાઈફરનો રાજનૈતિક ઉદેશ્યો માટે ઉપયોગ કર્યો હતો. Cipher એવાં ગુપ્ત દસ્તાવેજો હોય છે જેની મદદથી 2 મિત્ર દેશો જાસૂસો તરફથી મળેલી જાણકારીઓ લખે છે. આ જાણકારીઓ ક્યારેય પણ સાર્વજનિક નથી કરવામાં આવતી.
જામીનનાં નિર્ણય બાદ શાહબાઝ શરીફ ભળક્યાં હતાં
કોર્ટનાં જામીનનાં નિર્ણય બાદ પાકિસ્તાનનાં પૂર્વ PM અને પાકિસ્તાન મુસ્લિમ લીગનાં અધ્યક્ષ શહબાઝ શરીફે પોતાની પ્રતિક્રિયા આપી હતી.શહબાઝ શરીફે ટ્વીટની એક પોસ્ટમાં કહ્યું કે લાડલાની સજા સ્થગિત થઈ છે, પૂરી નથી થઈ ગઈ. ચુકાદો આવવાથી પહેલા બધાને ખબર હોય છે કે ચુકાદો શું હશે તેથી જ હાઈકોર્ટનાં આ નિર્ણય પર કોઈને આશ્ચર્ય થવું ન જોઈએ.
ઈતિહાસનાં કાળા અધ્યાયમાં લખાશે આ દિવસ
તેમણે કહ્યું કે નવાઝ શરીફની સજા સુનિશ્ચિત કરાવવા માટે એક મોનિટરિંગ જજની નિયુક્તિ કરવામાં આવી પરંતુ લાડલાને બચાવવા માટે ચીફ જસ્ટિસ પોતે જ મોનેટરિંગ જજ બની ગયાં. ન્યાય વ્યવસ્થાની આ ભૂમિકા ઈતિહાસનાં કાળા અધ્યાયમાં લખવામાં આવશે. એક તરફી અને ન્યાયને કમજોર કરતી ન્યાયપ્રણાલી સ્વીકાર્ય નથી.
આ પહેલા પણ કોર્ટે ધરપકડ ગેરકાનૂની જણાવી હતી
અત્રે ઉલ્લેખનીય છે કે આ પહેલાં ઈમરાન ખાનની અલ કાદિર ટ્રસ્ટ ભ્રષ્ટાચાર મામલે ધરપકડ કરવામાં આવી હતી જેના પર સુપ્રીમ કોર્ટે નારાજગી વ્યક્ત કરતાં તેમની ધરપકડને ગેરકાનૂની જણાવી હતી. આ બાદ જ્યારે ઈમરાન ખાન હાઈકોર્ટમાં હાજર થયાં ત્યારે ચીફ જસ્ટિસ ઉમર અતા બંદિયાલ, જસ્ટિસ મુહમ્મદ અલી મઝહર અને જસ્ટિસ અતર મિનલ્લાહની ત્રણ સદસ્યની પીઠે પણ ઈમરાન ખાન પર કરવામાં આવેલી કાર્યવાહીને અમાન્ય કરાર કરી હતી. આ સાથે જ ચીફ જસ્ટિસ બંદિયાલે ઈમરાનને કહ્યું હતું કે તમને જોઈને સારું લાગ્યું.
