- વલસાડના પારડીની DCO સ્કૂલમાં સત્રાંત પરીક્ષાનું પેપર ફૂટ્યું
- ધોરણ 12ના કેમેસ્ટ્રી વિષયનું OMR પેપર ફૂટ્યું
- વિદ્યાર્થિની પાસેથી કાપલી મળતા પેપર ફૂટ્યાનું આવ્યું સામે
સૌરાષ્ટ્ર યુનિવર્સિટીના BBA અને BComની પરીક્ષાના પેપર લીક થતા સમગ્ર તંત્ર હલબલી ઉઠ્યું છે. ચૂંટણી પહેલા પેપર લીકનો મુદ્દો ફરી ગરમાયો છે. ત્યારે વધુ એક પેપર ફૂટ્યાની ઘટના સામે આવતા હડકંપ મચી ગયો છે. વલસાડ જિલ્લામાં શુક્રવારે ત્રિમાસિક ( સત્રાંત ) પરીક્ષાનું ધોરણ 12નું કેમેસ્ટ્રીનું પેપર લીક થયું છે. ચાલુ પેપરમાં વિદ્યાર્થિની પાસેથી જવાબ સાથેની કાપલી મળી આવતા પેપર લીકનો સમગ્ર મામલો પ્રકાશમાં આવ્યો છે. આ સમગ્ર મામલો સોશિયલ મીડિયાના માધ્યમથી જિલ્લામાં વાયુવેગે ફેલાઈ જતા ચર્ચાનો વિષય બન્યો છે.
વિદ્યાર્થિની પાસેથી OMR પેપરના સોલ્યુશન સાથેની મળી કાપલી
નવરાત્રી પૂર્ણ થયા બાદ હાલ ધો.9થી 12ના વિદ્યાર્થીઓ શાળા કક્ષાએ લેવાતી પરીક્ષા આપી રહ્યાં છે. ત્યારે વલસાડના પારડીની ધી પારડી એજ્યુકેશન સોસાયટી દ્વારા સંચાલિત DCO સાર્વજનિક સ્કૂલમાં ગતરોજ ધોરણ 12 વિજ્ઞાન પ્રવાહના કેમેસ્ટ્રીના પેપર દરમિયાન એક વિદ્યાર્થિની પાસેથી OMR પેપરના સોલ્યુશન સાથેની કાપલી મળી આવી હતી.
પ્રિન્સિપાલે જાણ કરતા શિક્ષણ વિભાગે તપાસ હાથ ધરી
આ મામલે સુપરવાઇઝરે સ્કૂલના પ્રિન્સિપાલને જાણ કરી હતી. જે બાદ પ્રિન્સિપાલે જિલ્લા શિક્ષણ વિભાગને આ અંગે જાણ કરી કરતા એજયુકેશન નિરીક્ષક સ્કૂલ ખાતે દોડી આવ્યા હતા. તેમના દ્વારા પ્રશ્નપત્ર અને આ કાપલીમાં રહેલા જવાબોની ચકાસણી કરવામાં આવી રહી છે. મળેલી કાપલી અને પેપરની ચકાસણી કર્યા બાદ પેપર લીક અંગે માહિતી બહાર આવશે. શિક્ષણાધિકારી કે.એફ.વસાવાએ જણાવ્યું હતું કે, કોઇ પણ વિદ્યાર્થીઓને અન્યાય ન થાય અને સંપૂર્ણ માહિતી બહાર આવે તે દિશામાં શિક્ષણ વિભાગ તપાસ કરી રહ્યું છે.
જિલ્લા આચાર્ય સંઘ અને જિલ્લા પરીક્ષા સમિતિ દ્વારા તૈયાર કરાય છે પેપરો
આપને જણાવી દઈએ કે, વલસાડ જિલ્લા આચાર્ય સંઘ અને વલસાડ જિલ્લા પરીક્ષા સમિતિ દ્વારા ત્રિમાસિક પરીક્ષાના પેપરો તૈયાર કરવામાં આવ્યાં છે. શાળાની એક વિદ્યાર્થીની પાસે OMR પેપરના સોલ્યુશનની કાપલી મળી આવતા હડકંપ મચી ગયો છે.
પેપર લીક મામલે FSLની પણ મદદ લેવાઈ
અત્રે ઉલ્લેખનીય છે કે, રાજકોટની સૌરાષ્ટ્ર યુનિવર્સિટીમાં પેપર લીક થવા મામલે ચોંકાવનારો ખુલાસો સામે આવ્યો છે. આ ઘટનામાં એક પણ પેપરનાં કવરનાં સીલ તૂટ્યા ન હોવાનો ખુલાસો થયો છે. જે ખરેખર ચોંકાવનારી ઘટના કહી શકાય. ત્યારે હજુ સુધી આ મામલે પેપર કોણે ફોડ્યું અને ક્યાંથી ફૂટ્યું તે રહસ્ય હજુ પણ અકબંધ છે. જોકે, પેપર યુનિવર્સિટી અથવા તો ઓફસેટમાંથી લીક થયાની આશંકા સેવવામાં આવી રહી છે. આ મામલે ભક્તિનગરના PI સરવૈયાએ ખુદ યુનિવર્સિટીમાં જઈને તપાસ હાથ ધરી હતી. હાલમાં આ પેપર લીક મામલે FSLની પણ મદદ લેવાઈ છે.
