રાજ્યમાં વધુ એક હનીટ્રેપનો કિસ્સો સામે આવ્યો છે. જેતપુરનો એકાઉન્ટન્ટ યુવક હનીટ્રેપનો શિકાર બન્યો છે. યુવતીએ મિત્રતા કેળવીને યુવકને ખંખેરી લેતા યુવકે આજીડેમ પોલીસ સ્ટેશનમાં ફરિયાદ નોંધાવી છે.
ગુજરાતમાં આજકાલ હનીટ્રેપના કિસ્સા વધતા જઈ રહ્યા છે. ખાસ કરીને સોશયિલ મીડિયા અને ઈન્ટરનેટ આ પ્રકારની હનીટ્રેપનું મોટુ સંસાધન બની રહ્યા છે. ત્યારે રાજકોટ જિલ્લાનો એક યુવક હનીટ્રેપનો શિકાર બનતા તેણે આજી ડેમ પોલીસ સ્ટેશનના દરવાજા ખખડાવ્યા છે અને કુલ છ લોકો સામે ફરિયાદ નોંધાવી છે.
યુવતીએ મિત્રતા કેળવીને યુવકને મળવા બોલાવ્યો
ફરિયાદ મુજબ, જેતપુરના ભીખાભાઇ વિઠ્ઠલભાઇ ગજેરા નામના યુવકનો રાજકોટની હિરલ નામની યુવતી સાથે પરિચય થયો હતો. હિરલે ભીખા ગજેરા સાથે મિત્રતા કેળવી હતી. જે બાદ યુવકને આજીડેમ ચોકડી ખાતે મળવા બોલાવ્યો હતો. યુવક આજી ડેમ ચોકડીએથી હિરલને બાઇકમાં બેસાડી ત્રંબા ગામ તરફ જઈ રહ્યો હતો. આ વેળાએ એક ઓટો રિક્ષાએ બાઇકને ઓવરટેક કરીને અટકાવ્યું હતું.
પોલીસ ફરિયાદની આપી ધમકી
જેમાંથી બે શખ્સોએ નીચે ઉતરીને બાઈકની ચાવી કાઢી લીધી હતી અને ભાખાભાઈ તેમજ હિરલને રિક્ષામાં બેસાડી રિક્ષાને ત્રંબા પોલીસ ચોકી લઈ જવા કહ્યું હતું. આ બંને શખ્સો પૈકીના એક શખ્સે હિરલનો ભાઈ ભૂરો હોવાની ઓળખ આપી હતી. ત્રંબા હાઈવે પર ભૂરાએ કોઈને ફોન કરીને કોઈને બોલાવ્યા હતા.
પોલીસની ઓળખ આપી કરી પૂછપરછ
થોડીવાર બાદ એક કાર આવી જતા હિરલને રિક્ષામાં અન્ય સ્થળે મોકલી પોતાને યુવકને કારમાં બેસાડી દીધો હતો. કારમાં બેઠેલા અન્ય એક શખ્સે પોતાની ઓળખ પોલીસ તરીકે આપી પૂછપરછ કરી હતી. જે બાદ તેઓએ યુવક(ભીખાભાઈ)ને માર માર્યો હતો અને ફરિયાદ ન કરવા માટે 1 લાખ રૂપિયાની માંગ કરી હતી. જોકે, તેની પાસે એટલા પૈસા ન હોવાથી આ શખ્સોએ પાકિટ, સોનાની ચેઈન, વીંટી, મોબાઈલ સહિત 1 લાખનો મુદ્દામાલ લઇ લીધો હતો અને યુવકને ત્રંબા ગામ પાસે ઉતારીને જતા રહ્યા હતા. જે બાદ તે તાત્કાલિક આજી ડેમ પોલીસ સ્ટેશન ખાતે પહોંચ્યો હતો અને 6 લોકો સામે ફરિયાદ નોંધાવી હતી.
