- અમદાવાદના મણિનગર વિસ્તારની ઘટના
- હોટેલમાં ગ્રાહકના સ્વાંગમાં ઘૂસ્યો લૂંટારું
- લૂંટારુને ઝડપીને પોલીસને સોંપ્યો હતો
અમદાવાદના નવા નરોડા વિસ્તારમાં આવેલી જ્વેલર્સની શોપમાં લૂંટ કરવા માટે આવેલા શખ્સને દબોચી લેવાની ચોંકાવનારી ઘટનાની શાહી હજુ સુકાઇ નથી ત્યારે ગઇકાલે મણિનગરમાં આવેલી હોટલ પ્રેજન્ટ લેકમાં લૂંટનો પ્રયાસ કરવા માટે આવેલા એક શખ્સને લોકોએ ઝડપી પાડ્યો હોવાની ઘટના સામે આવી છે. હોટલ પ્રેજન્ટ લેકના કર્મચારીને માથાના ભાગે હથોડી મારીને લૂંટનો પ્રયાસ કરવામાં આવ્યો હતો. જો કે બૂમાબૂમ થતાં સિક્યોરિટી ગાર્ડ સહિતના લોકો આવી પહોચ્યા હતા અને લૂંટારુને ઝડપીને પોલીસને સોંપ્યો હતો.
મણિનગરના પુષ્પકુંજ ચાર રસ્તા પાસે આવેલ હોટલ પ્રેજન્ટ લેકમાં છેલ્લા આઠ મહિનાથી નોકરી કરતા વિશાલ ઠાકોરે મણિનગર પોલીસ સ્ટેશનમાં લૂંટના પ્રયાસની ફરિયાદ કરી છે. રાતના સાડા ત્રણેક વાગ્યાની આસપાસ વિશાલ નોકરી પર હાજર હતો અને રિસેપ્શન ટેબલ પાસે આવેલ સોફા પર આરામ કરી રહ્યો હતો ત્યારે એક ગ્રાહકને હોટલ તરફ આવતો જોઇને વિશાલે કાચનો દરવાજો ખોલીને તેને આવકાર આપ્યો હતો.
હું ચોરી લૂંટ કરવા માટે આવ્યો છું, પૈસા રૂપિયા તેમજ લોકરની ચાવી ક્યાં છે
હોટલમાં એન્ટ્રી થતાંની સાથે જ ગ્રાહકે તેની પાસે રહેલી બેગમાંથી લોખંડની હથોડી કાઢીને વિશાલના કપાળના ભાગે મારી દીધી હતી. બીજો ઘા મારવા જતાં વિશાલે તેનો હાથ પકડી લીધો હતો. ત્યારે ગઠિયાએ કહ્યું હતું કે, હું ચોરી લૂંટ કરવા માટે આવ્યો છું, પૈસા રૂપિયા તેમજ લોકરની ચાવી ક્યાં છે.
ચક્કર આવતાં વિશાલ નીચે પડી ગયો
જો કે વિશાલને ચક્કર આવતાં તે નીચે પડી ગયો હતો. પડતાં પડતાં તેણે ચોર ચોરની બૂમો પાડતાં સિક્યોરિટી ગાર્ડ અને હોટલનો અન્ય સ્ટાફ આવી ગયા હતા અને ગઠિયાને ઝડપી લીધો હતો. જ્યારે સમગ્ર ઘટનાની જાણ પોલીસને કરાતાં પોલીસ પણ તાત્કાલિક ઘટનાસ્થળ પર પહોંચી હતી. પોલીસે લૂંટારુને પકડીને ઇજાગ્રસ્ત વિશાલને સારવાર માટે હોસ્પિટલ ખસેડ્યો હતો. હાલમાં પોલીસે આ સમગ્ર મામલે ફરિયાદ નોંધીને વધુ તપાસ શરૂ કરી છે.
