ફરી હાહાકાર... / 2023ના અંતમાં કોરોનાએ ડરાવ્યાં, અહીં 56,000 કેસ સામે આવતાં હડકંપ, WHO એ જાહેર કરી ચેતવણી

• સમગ્ર વિશ્વમાં ફરી કોરોના મચાવી રહ્યો છે હાહાકાર
• કોવિડ-19ના વધતા જતા કેસોએ ફરી એકવાર ચિંતા વધારી 
• સિંગાપોરમાં બે અઠવાડિયામાં 56 હજાર કેસ નોંધાતા હડકંપ
• વર્લ્ડ હેલ્થ ઓર્ગેનાઈઝેશને આ અંગે ચેતવણી જાહેર કરી 

સમગ્ર વિશ્વમાં તેમજ ભારતમાં કોવિડ-19ના વધતા જતા કેસોએ ફરી એકવાર ચિંતા વધારી છે. સિંગાપોરમાં બે અઠવાડિયામાં નોંધાયેલા 56 હજાર કેસોએ ફરી એકવાર લોકોમાં માસ્કની જરૂરિયાત વધારી દીધી છે. સિંગાપોરમાં બે અઠવાડિયામાં 56,043 કોવિડ-19 કેસ નોંધાયા છે, જ્યારે ગયા સપ્તાહે 32,035 કેસ નોંધાયા હતા. વિવિધ દેશોમાં કોરોનાએ ફરી માથું ઉંચકવાનું શરૂ કર્યું છે. વર્લ્ડ હેલ્થ ઓર્ગેનાઈઝેશન (WHO) એ આ અંગે ચેતવણી જાહેર કરી છે. WHO પહેલાથી જ વિવિધ દેશોને આ બાબતે વધુ સાવચેત રહેવાની સલાહ આપી ચૂક્યું છે. આ દિવસોમાં કોરોનાનું નવું સબ-વેરિઅન્ટ JN.1 લોકોમાં ઝડપથી ફેલાઈ રહ્યું છે, અમેરિકા અને ચીનમાં લોકો આ નવા વેરિઅન્ટથી વધુ પ્રભાવિત છે. ભારતમાં આ પ્રકારનો પ્રથમ કેસ કેરળમાં જોવા મળ્યો હતો.

Dr @mvankerkhove talks about the current surge in respiratory diseases #COVID19 and JN.1 subvariant.

WHO continues to assess the situation. Follow WHO's public health advice to keep your families and friends safe during this holiday season. pic.twitter.com/HvAZVMMN49

— World Health Organization (WHO) (@WHO) December 17, 2023

ચીનમાં કોરોનાનો નવો ખતરો 

સિંગાપોરમાં કોરોનાના વધતા જતા કેસોને જોતા ત્યાંના સ્વાસ્થ્ય મંત્રાલયે લોકો માટે એડવાઈઝરી જારી કરી છે. મંત્રાલયે લોકોને ભીડવાળી જગ્યાઓ ટાળવા અને બજારો, એરપોર્ટ અને અન્ય જાહેર સ્થળોએ માસ્ક પહેરવાની સલાહ આપી છે. અહેવાલ મુજબ લગભગ એક મહિનામાં કોવિડ -19 ના સબવેરિયન્ટ JN.1 ના સાત કેસ ચીનમાં મળી આવ્યા છે. 10 ડિસેમ્બર સુધીમાં આ સબવેરિયન્ટ ઓછામાં ઓછા 40 અન્ય દેશોમાં નોંધવામાં આવ્યું હતું.

અમેરિકામાં કોરોનાના કેસમાં 200 ટકાનો વધારો થયો

અમેરિકામાં પણ કોવિડ-19ના કેસમાં સતત વધારો જોવા મળ્યો છે. ન્યૂઝના રિપોર્ટ અનુસાર અમેરિકામાં છેલ્લા ચાર અઠવાડિયામાં કોરોનાને કારણે હોસ્પિટલમાં દાખલ લોકોની સંખ્યા વધીને 23,432 થઈ ગઈ છે. યુએસમાં ગયા મહિને કોરોનાને કારણે હોસ્પિટલમાં દાખલ લોકોની સંખ્યામાં 200 ટકા અને ફ્લૂ માટે 51 ટકાનો વધારો થયો છે. કોરોનાનો JN.1 કેસ હાલમાં અમેરિકા અને ચીનમાં ઝડપથી ફેલાઈ રહ્યો છે.

ભારતમાં પણ કોરોના ફેલાઈ રહ્યો છે

છેલ્લા 24 કલાકમાં દેશમાં કોરોનાના 335 નવા કેસ નોંધાયા છે. આ બીમારીને કારણે પાંચ લોકોના મોત થયા છે. હાલમાં ભારતમાં કોરોના દર્દીઓની સંખ્યા 1,701 છે. કેરળમાં કોરોનાના નવા પ્રકાર, JN.1ના આગમન સાથે, દેશના તમામ રાજ્યોએ આરોગ્ય સંબંધિત સુરક્ષામાં વધારો કર્યો છે. કેરળમાં કોરોનાનો સૌથી ઘાતક પ્રકાર જોવા મળ્યો છે. તેમાંથી બોધપાઠ લઈને કર્ણાટક સરકારે એડવાઈઝરી જારી કરી છે. આરોગ્ય પ્રધાન દિનેશ ગુંડુ રાવે રાજ્યના તમામ વરિષ્ઠ નાગરિકો અને અન્ય રોગોથી પીડિત લોકો માટે માસ્ક પહેરવાની સલાહ આપી છે.