સુરેન્દ્રનગર / આ શું થઈ રહ્યું છે ગુજરાતમાં? બાળકીના મૃતદેહ પર મળ્યા ખરાબ નિશાન, તાંત્રિક વિધિ કરી હોવાની આશંકા

• સુરેન્દ્રનગરમાંથી બાળકીનો મૃતદેહ મળ્યો
• શાપર પાસેથી મળ્યો બાળકીનો મૃતદેહ
• તાંત્રિક વિધિ માટે હત્યા થઈ હોવાની આશંકા

વિજ્ઞાન અને ટેકનોલોજીના જમાનામાં ગુજરાતનો જેટ ગતિએ વિકાસ છતાં ગુજરાતના ગ્રામીણ વિસ્તારોમાં ભૂવા-ભારાડી અને મેલી વિદ્યાનો જનમાનસ પર પ્રભાવ ઓછો નથી થઇ શક્યો. નાની-નાની બાબતોમાં મંત્ર-તંત્ર અને મેલી વિદ્યાના શરણે જઈ પોતાના પરિવારની બરબાદીને નોતરતા સમાજના કેટલાક લોકો આજે પણ અંધશ્રદ્ધા અને વાસ્તવિકતા વચ્ચે ઝોલા ખાતા હોય છે. સમાજમાં એવા કેટલાય કિસ્સો સામે આવે છે કે, તાંત્રિક વિધિના બહાને કાં તો મહિલાની લાજ લૂંટાઈ હોય, કાં તો મરણમૂડી ખોવી પડી હોય. ત્યારે સુરેન્દ્રનગર જિલ્લામાંથી અંધશ્રદ્ધાનો કિસ્સો સામે આવતા ખળભળાટ મચી ગઈ છે. 

નાળામાંથી મળી આવ્યો બાળકીનો મૃતદેહ
સુરેન્દ્રનગરના સાયલા હાઈવે પર શાપર પાસેથી નાળામાંથી બાળકીનો મૃતદેહ મળી આવ્યો છે. એકથી દોઢ વર્ષની બાળકીના મૃતદેહના માથા તેમજ ગળાના ભાગે ઈજાના નિશાન જોવા મળી રહ્યા છે. બાળકીનો તાંત્રિક વિધિ માટે હત્યા કરાયાની આશંકા વ્યક્ત કરવામાં આવી રહી છે. હાલ બાળકીના મૃતદેહને હોસ્પિટલમાં પોસ્ટમોર્ટમ અર્થે ખસેડવામાં આવ્યો છે. પોલીસ દ્વારા બાળકીના ફોટાને અલગ-અલગ પોલીસ સ્ટેશનોમાં મોકલવામાં આવ્યા છે. પોલીસ આ બાળકી કોણ છે અને તેના માતા-પિતા કોણ છે તે અંગે તપાસ ચલાવી રહી છે. 

સંતાન પ્રાપ્તિના નામે દંપતી સાથે છેતરપિંડી
આપને જણાવી દઈએ કે, 3 દિવસ અગાઉ જ રાજકોટ જિલ્લામાંથી અંધશ્રદ્ધાનો કિસ્સો સામે આવ્યો હતો. અંધશ્રદ્ધાનો ભોગ બનેલા દંપતીએ ભુવા સામે પડધરી પોલીસ સ્ટેશનમાં ફરિયાદ નોંધાવી હતી. મળતી માહિતી અનુસાર, રાજકોટના લોધિકાના કાંગશીયાળી ગામે રહેતા અને ડ્રાઈવિંગ કરતા બકુલભાઈ ચાવડાના વર્ષ 2013માં ભારતીબેન સાથે લગ્ન થયા હતા. લગ્ન બાદ તેઓને સંતાન થતું ન હોતું. ઘણી દવાઓ અને અનેક ડોક્ટરોને બતાવ્યા બાદ ભારતીબેનના સારા દિવસો શરૂ થયા હતા. ગર્ભવતી થયાના ત્રણ મહિના બાદ ભારતીબેને સોનોગ્રાફી કરાવતા બાળક ખોડ ખાપણવાળુ હોવાનું ડોક્ટરે જણાવ્યું હતું. જે બાદ તેઓ બીજા ડોક્ટરને બતાવવા માટે ગયા હતા. એ ડોક્ટરે પણ તેમને બાળક ખોડ ખાપણવાળુ હોવાનું જણાવ્યું હતું. જોકે, આ દંપતી ડોક્ટર પાસે દવા કરાવવાની જગ્યાએ ન્યારા ગામના ભુવા પાસે દોરા ધાગા કરાવવા ગયા હતા. 

ભુવાએ કહ્યું હતું- હું બધુ સરખુ કરી દઈશ
ન્યારા ગામના ભુવા મહેન્દ્ર મુછડિયાએ દાણા જોઈને કહ્યું હતું કે, હું બધુ સરખુ કરી દઈશ, તમે ડોક્ટરને બદલી નાખો. આ માટે મારે એક વિધિ કરવી પડશે. જેથી આ બકુલભાઈ અને ભારતીબેન ભુવાની વાતમાં આવી ગયા હતા અને વિધિ કરાવવા માટે તૈયાર થઈ ગયા હતા. ભુવાએ આ દંપતિ પાસેથી વિધિના બહાને સવા લાખથી વધુ રૂપિયા પડાવ્યા હતા. જોકે, ભારતીબેને રૂપિયા આપ્યા બાદ અવિકસિત બાળકને જન્મ આપ્યો હતો. જે બાદ તેઓ બાળકને લઈને ભુવા પાસે ગયા હતા. આ દરમિયાન તેણે જણાવ્યું હતું કે, એક વર્ષમાં તમારું બાળક સરખું થઈ જશે. જે બાદ અંધશ્રદ્ધાનો ભોગ બનેલા આ દંપતીએ વિજ્ઞાનજાથાનો સંપર્ક કર્યો હતો. વિજ્ઞાનજાથા દ્વારા ભુવાનો ભાંડો ફોડવામાં આવ્યો હતો. દંપતી દ્વારા ભુવા સામે પડધરી પોલીસ સ્ટેશનમાં ફરિયાદ નોંધાવવામાં આવી છે.