8th Pay Commission / ના હોય, ખરેખર 2027માં વધી જશે કેન્દ્રીય કર્મચારીઓની સેલરી? જાણો અપડેટ

કેન્દ્ર સરકારના કર્મચારીઓ અને પેન્શનધારકો માટે આઠમા પગાર પંચને લઈને એક મહત્વપૂર્ણ અપડેટ સામે આવ્યું છે. આઠમા પગાર પંચની ભલામણોના આધારે સંશોધિત પગાર અને પેન્શન મેળવવા માટે કર્મચારીઓએ વર્ષ 2027 સુધી રાહ જોવી પડી શકે છે.

આઠમું પગાર પંચ કેન્દ્ર સરકારના કર્મચારીઓ, સંરક્ષણ કર્મચારીઓ, અખિલ ભારતીય સેવાઓના અધિકારીઓ, કેન્દ્ર શાસિત પ્રદેશોના કર્મચારીઓ, ન્યાયિક અધિકારીઓ તેમજ કેટલાક વિશિષ્ટ ન્યાયાલયો, નિયમનકારી સંસ્થાઓ અને સરકારી વિભાગોના કર્મચારીઓના પગાર, ભથ્થાં અને અન્ય લાભોની સમીક્ષા કરશે અને તેમાં ફેરફાર માટેની ભલામણો કરશે. આઠમા પગાર પંચની રચના 3 નવેમ્બર 2025 ના રોજ કરવામાં આવી હતી. આ પંચને પોતાની ભલામણો સોંપવા માટે 18 મહિનાનો સમય આપવામાં આવ્યો છે. આ હિસાબે પંચે પોતાનો અહેવાલ મે 2027 સુધીમાં સરકારને સુપરત કરવાનો રહેશે.

ક્યારથી વધેલા પગારનો લાભ મળશે?

મે 2027 માં અહેવાલ આવ્યા બાદ પણ સરકાર તેની ઊંડાણપૂર્વક સમીક્ષા કરશે, નાણાકીય ભારણનું આકલન કરશે અને મંજૂરી આપશે. આ પ્રક્રિયાને કારણે, વધેલો પગાર અથવા નવું પગાર માળખું વાસ્તવિક સ્વરૂપમાં વર્ષ 2027 ના બીજા અર્ધવાર્ષિક ગાળામાં અથવા તેના પછી જ કર્મચારીઓના ખાતામાં જમા થવાની શરૂઆત થવાની સંભાવના છે.

મે મહિનામાં પંચ દ્વારા અહેવાલ સોંપાયા બાદ સરકાર તેની ચકાસણી કરશે. આ દરમિયાન એ વાતનું પણ આકલન કરવામાં આવશે કે પગાર પંચમાં પગાર વધારો અને એરિયર્સની ચૂકવણી કરવાથી સરકારી તિજોરી પર કેટલો નાણાકીય બોજ પડશે. આ સમગ્ર પ્રક્રિયામાં થોડો વધુ સમય લાગશે, તેથી એવું માનવામાં આવી રહ્યું છે કે કર્મચારીઓને વધેલો પગાર વર્ષ 2027 ના બીજા અર્ધવાર્ષિક ગાળા કે ત્યારબાદ જ મળી શકશે.

1 જાન્યુઆરીથી અસરકારક બનવાનો અર્થ

ભારતમાં દર 10 વર્ષે નવું પગાર પંચ લાગુ કરવાની પરંપરા રહી છે. અગાઉનું એટલે કે સાતમું પગાર પંચ 1 જાન્યુઆરી 2016 ના રોજ લાગુ થયું હતું. 1 જાન્યુઆરી 2026 ના રોજ તેના 10 વર્ષ પૂરા થઈ રહ્યા છે, તેથી નવા પગાર પંચના આ તારીખથી જ પ્રભાવી થવાની અપેક્ષા રાખવામાં આવી રહી છે. ઓક્ટોબર 2025 માં કેન્દ્રીય મંત્રીમંડળે જ્યારે આઠમા પગાર પંચની રચના અને તેની શરતોને મંજૂરી આપી હતી, ત્યારે સરકારે સ્પષ્ટ કર્યું હતું કે સામાન્ય રીતે પગાર પંચ દર 10 વર્ષે લાગુ થાય છે અને આ જ ક્રમમાં આઠમા પગાર પંચની ભલામણો 1 જાન્યુઆરી 2026 થી પ્રભાવી થવાની અપેક્ષા છે.

આ પણ વાંચોઃ ડિજિટલ ફ્રોડ પર સુપ્રીમ કોર્ટ સખ્ત: WhatsAppથી બેન્કો સુધી સુપ્રીમ કોર્ટનો એક્શન પ્લાન

હવે જોકે પંચનો અહેવાલ મે 2027 સુધીમાં આવશે અને ત્યારબાદ જ ફિટમેન્ટ ફેક્ટર તેમજ પગાર વધારા પર સરકાર અંતિમ નિર્ણય લેશે, તેથી ભલે વધેલો પગાર તમારા ખાતામાં મોડો આવે, પરંતુ તમારો હિસાબ-કિતાબ 1 જાન્યુઆરી 2026 થી જ શરૂ થશે. એટલે કે સરકારે 1 જાન્યુઆરી 2026 થી લઈને નવું પગાર માળખું અમલમાં આવે તે મહિના સુધીના સમયગાળાનો પૂરો તફાવત જોડીને કર્મચારીઓને એરિયર્સ તરીકે ચૂકવણી કરવી પડશે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ