મનોરંજન / યુદ્ધ અને બલિદાનની કહાની લઈને આવી સલમાનની 'માતૃભૂમિ', જાણો રિલીઝ ડેટ!

સલમાન ખાન આ વખતે રોમાન્સ કે સામાન્ય એક્શન નહીં, પરંતુ દેશ માટે લડતા એક સૈનિકની ભૂમિકામાં જોવા મળશે. ફિલ્મના ટ્રેલરમાં ભારત અને ચીન વચ્ચેનો તણાવ, સરહદ પરની લડાઈ અને સૈનિકોના બલિદાનની ઝલક જોવા મળે છે. લગભગ સાડા ચાર મિનિટના ટ્રેલરમાં અનેક એક્શન દૃશ્યો સામેલ કરવામાં આવ્યા છે. સલમાન ખાનનો ફૌજી અંદાજ અને દમદાર ડાયલોગ્સ દર્શકોનું ધ્યાન ખેંચી રહ્યા છે. હવે ફિલ્મ 4 ડિસેમ્બર 2026ના રોજ સિનેમાઘરોમાં રિલીઝ થવાની છે.

'માતૃભૂમિ'ના ટ્રેલરમાં શું છે ખાસ?

ફિલ્મના ટ્રેલરની શરૂઆત ચીની સૈનિકોના દૃશ્યોથી થાય છે. તેઓ ભારતીય સેના વિશે વાત કરતા જોવા મળે છે. ત્યારબાદ ભારતીય અને ચીની સૈનિકો વચ્ચેના તણાવ અને અથડામણનાં દૃશ્યો બતાવવામાં આવે છે. ટ્રેલરમાં સરહદ પર યુદ્ધ જેવી સ્થિતિ અને બંને દેશોની સેનાઓ વચ્ચે વધતા સંઘર્ષની ઝલક જોવા મળે છે.ટ્રેલરમાં એક તરફ દેશની રક્ષા માટે સરહદ પર જતા સૈનિકો જોવા મળે છે, તો બીજી તરફ તેમના પરિવાર સાથે વિતાવેલી ભાવુક પળો પણ બતાવવામાં આવી છે. સૈનિકો જ્યારે પોતાના પરિવારને છોડીને દેશની રક્ષા માટે નીકળે છે ત્યારે તેમની પાછળ પરિવારની ચિંતા અને લાગણીઓ પણ જોડાયેલી હોય છે. આ રીતે ફિલ્મમાં માત્ર યુદ્ધ જ નહીં પરંતુ સૈનિકોના અંગત જીવનને પણ જગ્યા આપવામાં આવી છે.

સલમાન ખાનનો દમદાર ફૌજી અંદાજ

ટ્રેલરમાં સલમાન ખાન એક સૈનિકના પાત્રમાં જબરદસ્ત એક્શન કરતા જોવા મળે છે. ભારત અને ચીન વચ્ચે તણાવ વધતો હોવા છતાં સલમાનનું પાત્ર કહે છે કે આપણી તરફથી એક પણ ગોળી નહીં ચાલે. ત્યારબાદ બંને દેશોના સૈનિકો વચ્ચે જોરદાર ટકરાવ જોવા મળે છે.ટ્રેલરના અંતિમ ભાગમાં બંને દેશોના સૈનિકો એકબીજાને અભિવાદન કરતા પણ જોવા મળે છે. આ દૃશ્ય ફિલ્મની કહાનીમાં અલગ સંદેશ આપે છે. સલમાનના એક્શનની સાથે ફિલ્મમાં દેશભક્તિ, સૈનિકોની હિંમત અને બલિદાનને પણ દર્શાવવામાં આવ્યું છે.

View this post on Instagram

A post shared by Salman Khan (@beingsalmankhan)

ચિત્રાંગદા સિંહ સલમાનની પત્નીના રોલમાં

આ ફિલ્મમાં ચિત્રાંગદા સિંહ પણ મહત્વની ભૂમિકામાં જોવા મળશે. તે સલમાન ખાનની પત્નીનું પાત્ર ભજવી રહી છે. ટ્રેલરમાં બંને વચ્ચે રોમેન્ટિક દૃશ્યો પણ જોવા મળે છે. સરહદ પર ચાલી રહેલા સંઘર્ષની વચ્ચે સલમાન અને ચિત્રાંગદાના સંબંધો ફિલ્મની કહાનીને ભાવનાત્મક બનાવે છે.ફિલ્મમાં અનૂપ બિક્રમ શાહી, મુકેશ ઋષિ, અંકુર ભાટિયા અને અભિલાષ ચૌધરી જેવા કલાકારો પણ મહત્વની ભૂમિકામાં છે. આ તમામ કલાકારો સાથે મળીને યુદ્ધની કહાનીને પડદા પર રજૂ કરશે.

આ પણ વાંચોઃ અભય દેઓલના ગ્લાસ હાઉસની અંદરથી જુઓ ઝલક, પ્રાઇવેટ પૂલ સહિતની ખાસ સુવિધાઓ!

ક્યારે રિલીઝ થશે સલમાનની 'માતૃભૂમિ'?

સલમાન ખાનની આ ફિલ્મ 4 ડિસેમ્બર 2026ના રોજ સિનેમાઘરોમાં રિલીઝ થવાની છે. અગાઉ ફિલ્મ આ વર્ષે એપ્રિલ મહિનામાં રિલીઝ થવાની હતી. જોકે, VFX અને પોસ્ટ પ્રોડક્શનનું કામ બાકી હોવાથી તેની રિલીઝ આગળ ધકેલવામાં આવી હતી.હવે ફિલ્મનું ટ્રેલર સામે આવ્યા બાદ દર્શકોમાં તેને લઈને ઉત્સુકતા વધી છે. ફિલ્મના નિર્માતા સલમાન ખાન છે, જ્યારે તેનું નિર્દેશન અપૂર્વ લાખિયાએ કર્યું છે. ફિલ્મનું નિર્માણ સલમાન ખાન ફિલ્મ્સના બેનર હેઠળ કરવામાં આવ્યું છે.

ગલવાન ઘાટીની 2020ની ઘટના પર આધારિત છે ફિલ્મ

'માતૃભૂમિ: મે વોર રેસ્ટ ઇન પીસ'ની કહાની વર્ષ 2020માં ભારત અને ચીનના સૈનિકો વચ્ચે ગલવાન ઘાટીમાં થયેલી અથડામણની ઘટનાઓથી પ્રેરિત છે. આ અથડામણ દરમિયાન બંને દેશોના સૈનિકો વચ્ચે હિંસક સંઘર્ષ થયો હતો. ફિલ્મમાં આ ઘટનાની સાથે સરહદ પર તૈનાત ભારતીય સૈનિકોની હિંમત અને દેશ માટેના બલિદાનને દર્શાવવાનો પ્રયાસ કરવામાં આવ્યો છે.સલમાન ખાન આ ફિલ્મમાં કર્નલ બી. સંતોષ બાબુના પાત્રમાં જોવા મળશે. આ પાત્ર માટે તેણે પોતાની ફિટનેસ અને શારીરિક ક્ષમતા પર ખાસ મહેનત કરી છે. એક સૈનિકની જેમ શરીરને તૈયાર કરવા માટે તેણે કડક ફિટનેસ રૂટિન અપનાવ્યું હતું. આ ઉપરાંત લદ્દાખની ઊંચાઈ અને મુશ્કેલ પરિસ્થિતિઓને ધ્યાનમાં રાખીને તાલીમ પણ લીધી હતી.

પહેલાં ફિલ્મનું નામ 'બેટલ ઓફ ગલવાન' હતું

સલમાન ખાનની આ ફિલ્મનું નામ શરૂઆતમાં 'બેટલ ઓફ ગલવાન' રાખવામાં આવ્યું હતું. જોકે, બાદમાં તેનું નામ બદલીને 'માતૃભૂમિ: મે વોર રેસ્ટ ઇન પીસ' કરવામાં આવ્યું. નવા નામ સાથે ફિલ્મનો સંદેશ પણ વધુ વ્યાપક રીતે રજૂ કરવામાં આવ્યો છે.હવે 4 ડિસેમ્બરે ફિલ્મ રિલીઝ થયા બાદ સલમાન ખાનનો સૈનિક તરીકેનો અભિનય દર્શકોને કેટલો પસંદ આવે છે તે જોવાનું રહેશે. ખાસ કરીને ગલવાન ઘાટીની ઘટના અને ભારતીય સૈનિકોના બલિદાનને પડદા પર કેવી રીતે રજૂ કરવામાં આવ્યું છે તેના પર સૌની નજર રહેશે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ