સ્પોર્ટ્સ / ટીમ ઈન્ડિયામાં રિષભ પંતની વાપસીને લઇ કાઉન્ટડાઉન શરૂ, ફેન્સ માટે આવી ખુશખબરી

ભારતીય ટેસ્ટ ક્રિકેટ ટીમ માટે ખૂબ જ રાહતના સમાચાર સામે આવ્યા છે. સ્ટાર વિકેટકીપર-બેટ્સમેન ઋષભ પંતની રાષ્ટ્રીય ટીમમાં વાપસીનો માર્ગ લગભગ સાફ થઈ ગયો છે. પડખાના સ્નાયુઓ ખેંચાઈ જવાની ઈજામાંથી સંપૂર્ણપણે ઉગરી ગયા બાદ તેમને ક્રિકેટ બોર્ડના સેન્ટર ઓફ એક્સિલન્સમાંથી ફિટનેસ પ્રમાણપત્ર મળવાની પૂરી સંભાવના છે. તમામ જરૂરી તબીબી પ્રક્રિયાઓ અને રમત સંબંધિત પ્રેક્ટિસ સત્રો સફળતાપૂર્વક પૂર્ણ કર્યા બાદ તેઓ 12 નવેમ્બરે ન્યુઝીલેન્ડ જવા માટે રવાના થઈ શકે છે.

29 વર્ષીય ઋષભ પંતને રેસ્ટ ઓફ ઈન્ડિયા વતી ઈરાની કપમાં રમતી વખતે ઈજા થઈ હતી. ત્યારબાદ તેમને શરતી ફિટનેસ હેઠળ ઈન્ડિયા એ ટીમમાં સ્થાન આપવામાં આવ્યું હતું. ઈન્ડિયા એ ટીમે એક બિનસત્તાવાર ટેસ્ટ મેચ રમવાની હતી, પરંતુ તે સમયે સેન્ટર ઓફ એક્સિલન્સ તરફથી રમત રમવા માટે જરૂરી એવું ફિટનેસ પ્રમાણપત્ર ન મળવાને કારણે તેઓ રમી શક્યા ન હતા.

હાલમાં ઋષભ પંત સંપૂર્ણ રીતે ફિટ જણાાઈ રહ્યા છે. તેઓ બોર્ડના તાલીમ કેન્દ્ર ખાતે મેચ જેવી જ સ્થિતિ વચ્ચે સઘન અભ્યાસ કરી રહ્યા છે. બુધવારે પણ તેમનું એક વિશેષ તાલીમ સત્ર નિર્ધારિત કરવામાં આવ્યું છે. આ બંને સત્રો સફળતાપૂર્વક પૂરા કર્યા બાદ તેઓ 12 નવેમ્બરે વેલિંગ્ટન જવા માટે ઉડાન ભરશે. ન્યુઝીલેન્ડના પ્રવાસ દરમિયાન પંતનો અગાઉનો અનુભવ ભારતીય ટીમ માટે ખૂબ જ ઉપયોગી સાબિત થઈ શકે છે. તેઓ ભારતીય ટીમના અનુભવી ખેલાડીઓમાં સ્થાન ધરાવે છે અને તેમણે 2020 માં ન્યુઝીલેન્ડની ધરતી પર રમાયેલી ટેસ્ટ શ્રેણીમાં ભાગ લીધો હતો.

આ પણ વાંચોઃ દિવાળીએ પૃથ્વી શૉ સાથે આકૃતિનો રોમાન્સ, બર્થડે પર KISS કરી કહ્યું I Love You!

અત્યાર સુધીમાં 52 ટેસ્ટ મેચ રમી ચૂકેલા આ ડાબોડી બેટ્સમેને 43 થી વધુની સરેરાશથી રન બનાવ્યા છે, જેમાં 8 સદી અને 21 અડધી સદીનો સમાવેશ થાય છે. તેઓ દક્ષિણ આફ્રિકા, ઈંગ્લેન્ડ અને ઓસ્ટ્રેલિયામાં ટેસ્ટ સદી ફટકારવાની સિદ્ધિ ધરાવે છે. તેમની વાપસીથી ભારતીય ટીમની વિકેટકીપિંગ ક્ષમતા સુધરવાની સાથે મધ્યમ ક્રમની બેટિંગ પણ વધુ મજબૂત બનશે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ